日子一日一日咁過,我亦開始出現半夜起身嘔嘅症狀,而且起身嘅時候往往成個枕頭都係鼻血。

我已經專登唔開廁所燈同盡量嘔得細聲啲,費事打擾兩老瞓覺,但佢哋自從知道我有事之後,唔知係咪因為神經緊張咗所以好醒瞓,往往我衝入廁所無耐佢哋就會走入嚟幫我清理。

每次一見我半夜嘔,佢哋就叫我去醫院,但我知自己一入醫院就無機會出返嚟,所以次次清理完我都話無事,換件衫就返上床瞓。

只要我一有咩狀況,嗰晚就充滿喊聲、血腥味同嘔吐物嘅酸臭味,我嘔到眼水都飆埋,體重亦一日一日下降。

每朝早起身我都頭暈暈,落地嗰下雙腳無力,要坐喺床邊等暈眩感消失先可以起身擦牙洗面。





因為瞓唔好而佈滿紅筋嘅眼球、開始混濁無神嘅瞳孔、未擦乾淨而留喺鼻翼嘅暗紅血跡、口腔入面徘徊不散嘅酸臭味,同久唔久好似有錐鑿落大腦皮層嘅痛楚,令喺鏡前嘅自己變得好憔悴。
已有 0 人追稿