一場公司飯局，我們的命運從此改寫: 第三章：性騷擾
(第三章：性騷擾)
今日星期五，就係咁，樂仔已經足足消失左一個禮拜。
由於時間拖耐左，但依然搵唔到樂仔，警察方面都開始緊張，發出尋人啟示，報章及網上媒體亦有相關報導。
而成件事最撲朔迷離既地方，係無論牛昇餐廳定係瓊華中心既閉路電視，竟然都影唔到樂仔有離開過。
閉路電視既最後影象，係樂仔行入牛昇外面既洗手間，之後就無再出過黎。
而洗手間，當然，出入口只有一個，係無第二條路可以行返出黎既。
我以前睇過一本小說，書名叫《那夜凌晨，我坐上了旺角開往大埔的紅VAN》，內容大概係講有人憑空消失，雖然結局與時空交錯無關，但多少令我聯想到，莫非樂仔係穿越時空隧道，去左另一個時間／空間？
隨便到討論區瀏覽，都會發現好多關於穿越時空既posts，例如外國有主婦只係出左去買餸，返到黎屋企，發現丈夫老死左，而原本重係小朋友既阿仔，已經長大成人，問阿媽：依廿年黎，你去左邊度呀？
我對世上萬事萬物，都抱持開放的態度，願意接受不同的可能性，例如世上真係有未來人，又或者我哋個世界根本係Matrix，我哋全部人都係畀The Architect擺佈緊。
但如果廁所真係有一條時空隧道，咁會係點架呢，唔通係喺屎坑入面……忽然諗起伊藤潤二既漫畫《呻吟的排水管》，愈諗愈恐怖……
或者簡單d諗，可能係部閉路電視失靈啫。
之但係，依家部閉路電視係有影象，但影唔到個人喎……
況且，樂仔已經失蹤左成個禮拜，連家人同警方都搵佢唔到。
樂仔，你究竟去左邊？
我擔心樂仔既安危，但我有我既生活，而且即使無左樂仔，我哋條team都可以正常運作，所以樂仔既消失，實際上，對我哋影響有限。
當其時我係咁諗，之後才發覺，事件遠比我想像中嚴重得多，所以我當時既想法，實在係太天真。
今日我哋team人一齊食完午飯，如常回到辦公室。有人選擇把握時間午睡片刻，而我就走左入pantry，睇下有咩嘢食，準備黃昏之前可以頂下肚。
忽然有人走左入黎，我眼尾瞄到對方既身影。
「咦，你又入黎搵嘢食嘅，Michelle，頭先食唔飽咩？」
Michelle有點猶豫地望著我，無回答我既問題。
「點呀，係咪有咩事？」
「Karson，發生左d嘢，我想問下你既意見……」
「講啦～」
「今朝早……」Michelle欲言又止。「郭Sir佢……佢摸我呀……」
「下！」我大為驚訝。「咩話！郭Sir摸你？」
Michelle點點頭。
「佢點摸你呀？」
今朝我入郭Sir房，擺低d文件，轉身諗住走嗰陣，佢叫停左我。
佢話：Michelle，你過黎吖。
我不疑有詐，就繞過張檯，行埋佢度。
過到去，佢上下咁打量我，無端端話：「Michelle，有無興趣一齊去泰國玩呀？」
我話：「Okay呀，泰國應該好多嘢玩，幾個人一齊去應該好正。」
跟住佢就話：「唔係幾個人，」佢笑笑口咁話：「係我同你啫。」
「下……」此刻我心知不妙，我睇到佢既目光好淫邪，於是我立即打退堂鼓。
「郭生，無咩嘢我都係出返去先喇。」
就喺我去開門嗰陣，我feel到後面有人一手摸落我pat pat度……我下意識叫左出黎，同時即刻擰轉身。我見到佢喺我前面，似笑非笑個樣充滿慾望……
嗰一刻我好驚，立即雙手交差抱在胸口前面。
「嗱，你唔好同人講呀，」佢用威脅既口吻話。「你唔同人講既話，我可以加你人工，我請埋你去旅行都得。」
我真係好驚，而且我覺得佢個樣好淫賤好樣衰，簡直令我作嘔，我完全唔想望到佢……
我慢慢向後退，直到我個身觸碰到個門柄，我個人就突然醒一醒，於是唔理三七廿一，立即開門出左間房。
出左房，我重未平伏到……Felix見我花容失色，問我咩事，但我好亂，我就話：唔知呀……之後我就衝左去toilet，整理一下自己既情緒……
「竟然發生d咁既事……」我又驚又怒地說。
「我好驚呀……Karson，你覺得我應該點做？」
「但郭Sir……佢不留都唔係咁……」我說到這裡嗄然止住，因為我唔想Michelle覺得我唔信任佢。
「你有無講畀其他人知？」我轉而問Michelle。
「未呀……你係第一個。」
「不如咁啦……」我說。「其實都係第一次有d咁既事喺我身邊發生……依家無證無據，都做唔到d咩嘢……」
「我都唔知呀……我唔想無左份工，我好鍾意喺依度做嘢……我就黎結婚啦，我同honey重要買樓架。」
「我諗，或者現階段可以保守d，但一定要好好防範……」
「點防範呀？」
「盡量減少入佢房囉，同埋避免有二人獨處既機會。」
「咁如果佢叫我入佢房呢？」
「扮病……戴口罩，要扮下咳。入佢房既話唔好關門，即入即出，話有病唔想傳染畀佢。」
我說到這裡，內心暗忖：咁樣都唔係長遠之策，唔通日日扮病咩……
我唯有提議：「或者你可以上網search下，睇下類似既情況，其他人會點處理……又或者去婦團既網站，睇下有無教人點做……」
「但最緊要保持鎮定，」我對Michelle承諾。「如果真係證實左有事發生，我唔會是非不分咁去護駕，我會support你。」
(第三章完)