一場公司飯局，我們的命運從此改寫: 第五章：傳說中的大客
(第五章：傳說中的大客)
Michelle死左。死因係後腦被硬物重擊。
兇器係一個15KG啞鈴。兇案現場，係Michelle男朋友屋企。
還押中既疑兇，係同Michelle計劃緊結婚既男朋友。
據知被捕一刻，佢仍然好激動，不斷高聲大罵：「八婆！畀綠帽我戴！」
作為與Michelle最後通電既人，我被警察傳召問話。由於我部電話裝有錄音apps，我就將當日既對話，原原本本咁播比警察聽。
「梁家俊先生，請問你同死者係咩關係？」
「同事。」我簡單回答。
「請問死者當日點解打畀你？」
「你咪聽左段錄音囉……」我有點不耐煩。「Michelle好似發現左啲嘢，想同我講……」
我忽然察覺到警員以一種古怪的眼光望著我，那種目光充滿侃意，同時對方的嘴角微微上揚，似笑非笑……
莫非……佢懷疑我就係「畀綠帽疑兇戴」既人，懷疑我係Michelle既情夫？
我好想同個差佬講，雖然我都唔知Michelle話我哋有「罪」係咩意思，但肯定唔係指姦情，因為根本無咁既事！
但我心念一動：Michelle既男朋友當場斷正，已經落網。而我作為最後與Michelle聯絡既人，只係循例問話。
咁其實個差佬點諗我，根本無咩所謂，反而如果我講多左，可能會重煩。
落完口供，我仍然有點耿耿於懷。如果Michelle真係有第三者既話，會唔會係郭Sir？
無理由，Michelle話佢對郭Sir好反感，況且佢嗰日講完，第二日就已經派綠帽兼且畀男朋友捉到，有無咁快呀？
又唔通個第三者係樂仔？
Michelle打畀我嗰陣，話知道樂仔去左邊度，係咪即係樂仔搵過佢黎？
假設樂仔唔係失蹤，而係著左草，依家打電話返黎，淨係搵Michelle一個，咁佢哋兩個既關係可能非比尋常……
但Michelle話「我哋有罪」，到底係咩意思？
罪係一個好嚴重既term，唔會係指一般犯錯，要係犯左法，又或者涉及道德和宗教層面，先至會講有罪。
如果我犯左法，差佬自然會做嘢，所以應該唔關事……而我本身無宗教信仰，亦唔覺得Michelle係一位狂熱教徒，會以自己既宗教價值觀，粗暴咁去審判其他人……
咁剩低既可能性，就只有道德層面……唔通Michelle有妄想症，以為我同佢有私情？……但如果係咁既話，成單嘢又關樂仔咩事？
短短十日，我哋條team失去左兩個人，一位失蹤，一位被殺，所以成個office既氣氛變得好沉重，根本做唔到嘢。
到底我哋條team係咪中左魔咒？如果係既話，下一個中招既人……會唔會係自己？
我坐喺自己個位度，此時有人輕輕吹著口哨經過，我抬頭一望，原來係郭Sir。
「Karson，今日Felix請假，咁下奏同個客既appointment你去喇喎。」
「Okay，我記得呀。」
「重有，我下個星期去泰國玩，依度你同Felix頂住喇喎。」
「完全無問題，郭Sir你玩得開心啲啦！」
之後郭Sir又繼續吹住口哨，步履輕盈咁行左入房。
我不禁心想：團隊最近無左兩個人，點解郭Sir咁冷血，好似完全無感覺咁嘅？
我一向認識既郭Sir，係充滿熱誠同幹勁，而且十分照顧下屬。
但最近郭Sir好似完全變左另一個人，好似樣樣嘢都唔關佢事咁……
依家有人死左，佢重好似好happy咁！
我按照schedule下午來到中環見個大客，這位大客之前係由樂仔搵返黎，之後由Felix接手，今日就由我去見。
由於這位大客在社會上頗有知名度，因此唔方便在此公開他的名字，我姑且稱佢為「W商人」。
我來到W商人的辦公室，與他握手，並解釋因為Felix無返，唔好意思，今日既appointment由我來負責。
我以往經常在報章雜誌看到W商人的照片，今日得見真人，覺得佢比傳聞中更友善，待人無咩架子。
我哋好快就進入正題，傾返project既嘢。我發覺W商人既轉數好高，好彩我準備充足，對於佢提出既問題，我都能夠一一解答。
「好嘢，答得幾好吖，」W商人表示讚賞。「份proposal我好滿意，你哋可以跟返program去做，我哋會喺phase two派人黎support你。」
「多謝你呀W先生，我哋一定會盡力去做，保證令你滿意。」
我說著從自己的西裝口袋拿出一支鋼筆，連同文件遞給W商人。
「W先生，唔該你喺文件上簽個名，咁我哋就可以展開phase one，進度方面保證會on schedule既。」
W商人簽左名，我今日既任務完成。但係佢遞返支筆比我嗰陣，神色一變，好似諗到啲嘢咁。
「Karson，你哋之前係咪有位比較後生既同事，好似叫……阿Lok下話？」
「係呀。」
「點解佢無黎嘅？」
「佢……佢無做喇。」
「哦～之前Felix話佢有事……」他說。「咁佢依家無做啦下話？」
「係呀。」我說。
W商人好像有點猶豫，但佢好快就決定講落去：「上次我見阿Lok，嗰日又係要簽份文件，咁佢又係遞左支筆比我，咁我簽完名之後，支筆佢唔記得拎返。」
「哦～無問題吖，W先生，如果我見到阿Lok，我會同佢講架喇。」
「唔係，」他認真說。「你聽我講，支筆我重keep住左喺度，你可以睇下先。」說著在下方的抽屜找了一會，拿出那支筆遞給我。
「你覺得依支筆有無咩特別呀？」他問。
我看來看去，依支都只係一支普通既鋼筆，不過係比較墜手左少少。
「Sorry，我唔係好熟鋼筆既牌子同款式，所以答唔到你既問題……」
「唔係，」他再次斬釘截鐵地說。「你覺唔覺得，依支筆好重？」
「覺呀。」我點頭說。
「我當時都唔為意，但因為阿Lok漏左喺度，所以我再睇返既時候，發覺，我好似從來都無用過一支咁重既筆。」
W商人續道。
「我份人向來有一股強烈既好奇心，所以我拆開左支筆，睇下入面有啲咩，點解可以令到支筆咁重。結果，我有驚人發現。」
他說著將鋼筆從中間擰開。我大吃一驚，鋼筆內部既結構非常複雜，只有精密既儀器先會有咁複雜既結構。
「你可以睇到，依度有個好細既掣，」他說著將手指放準在掣上。「只要用左依個掣，依支筆既用途就會完全唔同左。」
他輕輕用力，啪動左個掣，然後將支筆擰返好，再用筆頂的尖端對準牆壁，手指在筆身上輕輕一擦，只聽到「咻」一聲，有什麼從筆頂直射到牆壁上。
我當場呆左。我係咪睇緊《占士邦零零七》既電影？
「正如你所見，依支並唔係一支普通既筆。」W商人說。「只要開動左個掣，佢就可以成為一支槍。」
「點解……會有支咁既嘢架？」我勉強回應。
「我唔知，」他說。「不過一件咁精密、以高超科技製造而成既隱藏式工具，我諗，應該只有特務先會用到。」
我心中一震：特務？
「如果你有留意到，依支筆槍既發射口係喺筆頂。照我估計，使用者通常係遞支筆畀人既時候，趁對方唔為意，開槍偷襲對方。」
「咁樣……」我稍為定了定神，立即諗到，一定要同依樣嘢劃清界線。「我唔知依樣嘢係咩黎，sorry，我同我哋公司，同依樣嘢完全無關。」
「唔洗講sorry～」沒想到，W商人竟然撥一撥手，輕鬆地說。「依家又無發生咩事。照我睇，依支筆唔係用黎襲擊我，因為如果係既話，我應該已經瀨左嘢。」
「咁樣，W先生……」我說。「我都唔知點解樂仔會有支咁既嘢……如果你覺得有需要既話，請你選擇報警，保障你既人生安全。」
「唔洗報警～」W商人又再撥一撥手，笑笑口地說。「我都講左啦，依家又無發生咩事。」
他想了一想，問：「Karson，其實你知唔知阿Lok係一個咩人黎架？」
「我唔知呀……阿Lok係我哋既新人，做左一年左右，最近消失左……」
「消失左？」他說。「比你哋公司炒左呀？」
「唔係，佢係真係消失左……」於是我用iPhone上網找到相關報導，展示畀W商人睇，並且向他講述：連閉路電視都影唔到樂仔離開。
「嘩，乜整單咁既嘢呀……」
「我哋都唔知點解阿Lok會消失，」我說。「單嘢已經發生左接近兩個禮拜，而我哋隊team運作正常，完全無受影響。」
「我知～」W商人說。「咁你覺得點解佢會消失左吖？」
「我真係唔知……」我想了一想，試著說。「但既然佢有件咁既裝置，咁可能……佢真係一個特務掛……」
我的視線向下，沒有直望對方的眼睛，而且講得愈來愈細聲……
無計，因為我對自己講既嘢都無信心：唔通樂仔真係一個特務咩？依家拍緊戲呀？
雖然我無望W商人，但我feel到佢一直都望住我。
然後我聽到佢發出「摺」一聲，跟住佢話：「幫我拎返牆上面支嘢過黎吖。」
我依言照做，行到牆邊，先發覺原來支筆槍發射出黎既「子彈」，其實係一支針。
「放心拔出黎啦，無毒架，」他說。「應該無毒架。」
我有點不安，但既然個客話無毒，咁我無理由拎張紙巾出黎包住佢。
於是我在針尾著力，拔左支針出黎，遞給W商人。
「唔洗咁驚喎Karson，你諗下啦，就算支針有毒，正常都係喺個頭度，唔會預成支針入晒落肌膚裡面既。」
我心想有理，而今次好明顯唔係W商人第一次「試射」，既然佢試過，即係大概知道支針係咩料。
「一支咁既針，作為子彈用途，正路都應該係上面帶毒架啦。」我說。
「係吖。」他點頭說。
「咁請問上面有咩毒？」
「麻醉藥囉。」
Oh I see，原來係麻醉藥。
「照我睇，依件事可能好嚴重……W先生，我真係建議你報警……」
「照咩你睇啫，我都話唔洗報警咯。」他說。「你話照你睇……咁你覺得有需要，你可以報警架，你咪報警囉～」
對方講到咁，即係根本唔想我報警，但原因係咩？我真係唔係好明。
W商人好似睇穿我諗啲咩，忽視雙手拍在檯上，傾前身，瞪大對眼咁話：「乜你唔覺得成單嘢好得意架咩？」
下？……
「喂，咁啦，我哋今日就傾住咁多先。依支筆，雖然唔係我既，但亦都唔方便交畀你，既來之則安之，就擺住喺我度先，」
W商人最後說。
「如果你見到阿Lok，記得千其唔好同佢講依支筆既嘢。重有，你以後見到佢，可能你需要小心啲。」
(第五章完)