話說我同 Joyce 經過兩次分離,生死一線,性生活障礙,不過排除萬難,做咗幾十年甜蜜夫妻...

「Carmen,今日咁早?」
「公公,婆婆有冇醒?」
Joyce 已經九十六歲,近年健康急劇惡化,醫生話好多器官出現衰竭,叫我地要有心理準備,於是我地嚮醫院長期留咗間私家房。
Carmen 用濕毛巾幫 Joyce 洗面,我諗起佢 BB 時嚮我地度住,Joyce 幫佢沖涼換片。
Rebecca 小學畢業後,我地去咗美國,一年後 Sherlock 竟然過埋嚟。
佢一直嚮 Rebecca 身邊直到碩士畢業,一齊嘅時間仲長過我同 Joyce,我冇辦法唔承認佢應該可以一世照顧 Rebecca。
佢同 Rebecca 結婚之後我地打本畀佢做生意,無可否認佢生意頭腦同技巧都叻過我,年年盈利翻幾倍,依家已經係城中隱形富豪。
Carmen 就係佢地個女,細細個已經冰雪聰明,深得我地痛錫,不過缺點係性格反覆,經常一時一樣,但 Joyce 睇出其實只係佢諗野太快,我地追唔上。


「婆婆上次醒咗幾耐?」
「愈嚟愈短囉,上次同你媽咪傾傾下偈瞓咗,直到依家。」
「我估佢今日會醒。」
「你點知?」
「直覺... 不過公公你又冇食飯?」
「我怕佢醒咗見唔到我,而且我都唔餓。」
「唔食飯唔得架,可以叫餐廳送上嚟格,你睇你唔食野手都震晒。」
「老人家個個都手震啦,我唔想間房一陣飯味,你婆婆唔鍾意。」
「三文治咪冇味囉,我幫你叫...」
「得喇得喇,知你錫公公喇。」


Carmen 走咗之後,我坐嚮 Joyce 床邊。
佢瞓得好平靜,更準確但唔吉祥嘅形容係好安詳。
雖然皮膚已經失去光彩,雖然肌肉早已缺乏彈性,雖然俏臉經已佈滿皺紋,佢仍然係咁可愛。
當醫生同我地講佢時日無多,我好驚,成個世界好似要冧咁,不過正因為生命有終點先會咁重要,我地先會珍惜。
Joyce,我原本只係一個波牛,係你令我生命變得有意義,你豐富咗我一生,多謝你。
你可能好快要離開我,我唔捨得你,但與其要你受苦,我寧願你嚮睡夢中舒服地走。
不過臨走之前,我可唔可以自私一次? 我好想好似以前咁同你傾偈。
講講下我不自覺瞓著咗...
「老公,你嚮邊?」



<< 未完待續 >>