[HiHi喇] 好地地落街食枝煙, 點知.......: (11)

威叔駕駛著貨van, 沿著原路返回了破屋。

家強和凱琳早就在屋子外面等待我們的歸來。

「強哥，乜搞到咁狼狽呀？」威叔把頭伸出車窗。

「開你既車啦，咁撚多爹。」家強一跛一跛地走近貨van。

「女士們做咩唔上車呀？」威叔問道。



翠思撓起雙手，用下巴指著家強: 「佢啲誠信破哂產，我哋唔想坐佢隔離。」 

凱琳沒有說話，看樣子深表認同。

無可奈何地，家強只好與我交換位置。

他坐車頭，而我則坐在後排的中間。

待我們全都坐好，威哥便發動了車子。



與來的時候很不同，這次的車速緩慢了很多。 

大家都很安靜，沒有人願意打破沉默。

威哥可能也察覺到氣氛有點奇怪，識趣地閉上了嘴巴。

眾人滿懷心事，各自專注於窗外的夜景。

突然，翠思十指緊扣地拖住了我的左手。



她雖然沒有看過來，但我留意到她的嘴角泛起了微笑。

我立即轉頭觀察凱琳，幸好她沒有發現。

誰知凱琳竟在下一秒拖住了我的右手。

我全身疆硬得動也不敢動。

這到底是什麼狀況?

可恨的是，威哥竟在此時播放起容祖兒的「出賣」。

「威哥，可唔可以轉首歌呀。」我滴著汗問道。

「得。」他再度按下按鈕。



這次居然是「一拍兩散」。

「識貨喎威叔。」家強讚賞道:「呢隻精選我都有買。」

「十蚊隻翻版碟來既者。」威哥沾沾自喜。

為了不著痕跡，我只好默默聽歌。

...

這是在提點我嗎?

「我卻要忠變奸，斗膽一腳踏兩船，想上岸時又晏...」



說得很對，但我該如何收拾這個殘局?

唉，還是等這次旅程結束後，回到香港再作打算吧。

才剛下定主意，貨van竟在拱北關口停了車!

我微微掙脫了凱琳和翠思的手，挨前問家強道：「乜唔係返香港咩?」

「梗係唔係啦。」家強故意提高聲線道:「為左表示我對兩位小姐既歉意，今晚我請大家去澳門豪住一晚。」

 「咩酒店先? 」 翠思第一時間問道。

「梗係五星級啦」。家強答。

「男女同房? 」威叔插嘴道。



「關你撚事咩!」家強的樣子猶如想將威叔就地正法。

「如果要同你一間房我就唔去家啦。」翠思擺明車馬道。

「放心放心。」家強強顏歡笑道: 「分開既，分開既。」

「咁就差唔多。」翠思撇下行李便下了車。

「哈哈，又要辛苦你啦。」凱琳對著我伸了伸舌頭。

不知怎地，我總覺得凱琳看起來好像有點失落。

臨走時，威叔不忘在車上大喊：



「咁多位大哥大姊，祝你地今晚玩得鳩鳩慶慶。」

家強會心微笑，可我卻尷尬得只想找個洞跳進去算了。


我們入住的，是位於氹仔的銀河酒店。

或許是經歷過一整天的風風雨雨，當我置身酒店金碧輝煌的大堂時，真有點恍如隔世的感覺。

家強辦理好Check In的手續，便跛著腳回來派發匙卡。

「嗱，我地住2818, 妳地就住2819，咁唔使驚啦。」

「千祈唔好走過來我地間房呀! 」翠思狠狠地盯了家強一眼，便牽著凱琳往電梯走去。

「死八婆，多謝都無句。」家強怨狠地看著翠思的背影。

「呀豪，我地聽日見啦。」凱琳轉過身向我們揮手作別。

「好呀。」我又和家強一同和應。

家強待她們走遠，才埋怨道: 「你應乜鳩呀，Helen都唔係同你講野。」

「是但啦....」我心煩意亂道:「搞成咁你唔係仲諗住溝人呀嘛。」

「咩唔溝呀!」 家強很大反應。「從Helen肯留低喺果間爛鬼屋度陪我，我就知佢對我仲有好感啦。」

「話時話...」我擔憂道:「家強你喺間屋度有無對Helen做過啲咩呀...」

「我會做啲咩呀？! 」家強激動道:「Helen係我女神來家，我又點會咁輕易褻瀆神靈呢!」

我剛想追問下去，身後一把粗獷的聲音卻打斷了我的說話。

「咦? 你咪係強哥？!」

「點呀成哥! 」家強回抱著一名賤肉橫生的肥佬，親切道:「咁好過來澳門玩呀。」

「來澳門唔係嫖就係賭家啦。」 成哥哈哈大笑。「咁有緣撞到咯，一齊玩啦。」

「哈哈，嫖就免喇!」家強笑道:「不過一場來到，點都要黐下成哥你啲旺氣既。」

我連忙把家強拉到一旁，低聲道:「咁上面啲女點算呀?」

「正所謂情場失意，賭場就自然得意。」家強煞有介事道:「依家啲女咁有戒心，點都要等聽日先做到野啦。我地今晚一於大殺四方，贏返啲水腳返來!」

我可沒他這麼好精力，於是道:「你地玩啦，我想返上去沖涼訓覺。」

家強剛要回答，成哥便把他整個人扯了過去，催促道:「行啦! 啲錢唔等人家! 」

家強只好道：「咁我去玩兩手先啦。」

「去啦去啦。」我擺擺手道:「贏多啲先好返來呀。」

當他們離去的時候，我猶自聽到成哥問家強:「你個friend戇鳩家？來到賭場唔賭錢，咁同去雞竇唔叫雞有咩分別啊？」