多謝一直有追看呢本小說既人,故事終於完結.
雖然連載時間唔係好長,又唔係好多人睇,但係都成4個月.
總共寫咗13萬字,對我呢講都係一個紀錄,
成世人都未試過打咁多字.
如果見到有錯字白字係到講聲唔好意思.

講番呢本小說,
原本無打算再寫忘年戀,
因為一件事,令我見到人性最醜惡既一面,
好唔開心,所以創作咗呢個故事.


現實世界發生既事我無能力改變,但我可以用呢本小說去創造另一個事實.

上卷我係寫得好辛苦,校園生活對我呢講已經年代久遠,
都忘記得九九十十,無咩好寫.
再加上由真事改編,有好多制肘,唔可以太天馬行空.
可能因為咁,上卷寫得比較平淡,
再加上又係呢類題材,對現在睇小說既年齡層既人唔吸引,所以無咩人睇.

到咗下卷無咗上面D包袱,我可以喜歡點寫就點寫,自由度大好多.
其實上下兩卷我都喜歡,



整個上卷係用呢鋪排兩位主角既相識到慢慢喜歡對方,
想用多一點篇幅去描繪雙方心理轉變,
希望可以寫出一種悲而不哀既遺憾出呢,令到之後既情節更合理.

原本我係打算分上,中,下三卷寫,
最初係希望中卷寫兩位主角新生活,最尾先再相遇.下卷就寫多角戀.
但係見上卷出咗之後反應好差,比第一本小說更小人睇.

心諗,如果再拖長,可能會更小人睇,所以先決定中,同下卷,二合一.


亦因為咁攪到Vinci同Christy呢二個角色寫得好差,特別係Vinci,變咗大茄.

唔知大家喜歡邊一個結局?
我係刻意安排Sad ending先,
A結局就好似小說入面所講既黑咖啡一樣,
苦澀,但令人回甘,喜歡既人自然會喜歡.
B結局就係芝士蛋糕,甜品,容易入口,係人都鍾意.
但當你品嚐過一口黑咖啡後,再吃一口芝士蛋糕,
呢種百般滋味在心頭既感覺,係要試個先感受到.
我希望可以比到大家呢種感覺.

喺寫呢本小說同時,自己亦不斷學習,摸索,
嘗試尋找自己寫得最舒服,最喜歡既寫作方法,
所以你地會見到上卷,下卷,或者係故事後期都出現唔同風格.
自己得益不少.



寫第一本小說時我只係玩下,無咩點諗就寫.
而呢本小說我係好認真,好比心機寫,好多野都係諗過計過,改完又改.
希望可以寫到一個結構緊密,一個令人感動既故事.

最後想講下新作,
我一直有睇呢版其他受歡迎作品,
睇下人地點解咁受歡迎,點解自己寫D野咁少人睇,係唔係真係寫得好差.
結果得出一個結論,就係百家貨賣百家客.
每個人都有自己唔同喜好,無話寫得好唔好,只係啱唔啱口味.
我有諗過不如都試下寫現在D受歡迎題材既小說,
不過諗諗下,都係留比其他人寫,teenage小說都係唔啱我寫.
我都係寫返D我鍾意既題材,反正唔多人睇.

下一本會寫D比較成人向既小品,唔係咸故呀.


總之唔啱太後生睇,主角設定都係三十過外,希望可以再寫一個更好故事.
再一次多謝咁多位支持.

如果喜歡呢本小說,可以留言講聲我知.
希望新作可以盡快寫完再同大家見面.