「哈哈哈哈。。」

Queena 師姐聽到我話鍾意咗佢個女,Margo ,之後既狂笑「反應」。。見佢真係抱住個肚咁笑咗三四十秒,連眼淚水都笑到濕咗雙眼。。而我,則有啲戇居居咁强顏傻笑,慶幸既,係佢無屌柒我想食「天鵝肉」。

點知,原來後尾佢都係屌柒咗我想食「天鵝肉」。。( 佢終於笑完,但都仲係要忍住笑先能講出 ):「米仔,你係一個好男仔,又乖,又高大,仲幾靚仔,又夠單純。。讀書叻唔叻哩,我就唔知啦。。如果,畀我「穿越」,畀我返番去16歲呢,我會揾個好似你咁既男仔做男朋友。。但係,如果我好似 Margo 咁,係真真正正 16 歲。。咁,我就唔會揀你囉 ~」

嘩,咁殘忍既說話都講得出既?到底有冇理會過我感受㗎?都唔知係讚我還是踩我,呢頭話我「好」,但又唔揀我?女人果然是複雜的動物,我强忍羞辱,問:「點解呀?」

可能 Queena 師姐感覺到我股「失意」,所以用雙手去握住我雙手,講:



「米仔,你識咗我個女幾耐吖?」

「見過幾次咁啦。」

「傾過幾多句?」

「。。喔,我哋有緣份,佢對我笑,即係有好感啦。。唔係呀,師姐。。其實我未到武館。。未識你之前,已經見過 Margo 。。」

「哈,但講到尾,都係因為 Margo 靚女,係唔係?因為你根本仲未認識佢。」



「唔係呀,師姐,「一見鍾情」呀,好有 feel 呀!!」

「有 feel 嗰個係你吖嘛!。。米仔,你醒吓啦。。Margo 咁靚女,佢十一歲未夠,已經有男仔追喇,追過佢既男仔,多到排隊入「隧道」過海呀,你憑乜嘢比人强呀?」

無錯。。唉 ~,無錯,我只係好想好想「得到」Margo ,因為佢靚,同曾經見 Margo 對我笑,我就從來無想過。。佢有幾多人追?因為,我覺得 Margo 「 與別不同」。。例如「彤姐」係「女神」, 所以我預咗佢有「兵」,有很多「兵」。但 Margo 係「仙」,不食人間煙火,我好難 picture 到佢同班「凡夫俗子」一齊。。但係,而家 Queena 師姐點醒咗我。。。

我垂下頭,用眼珠斜向上望住 Queena 師姐,問:「佢。。已經有男朋友?還係。。有好多男朋友㗎?」

Queena 師姐深呼吸,之後呼出一口氣:「Margo 個傻女,一個男朋友都無。。」



嘻,我即時又「精神」番,喜形於色。

但 Queena 師姐則笑笑:「你咪開心住啦。。就係過往咁多年,咁多男仔追,佢都仍然未有過男朋友,你話你憑乜嘢改變到佢?」

我心裏頭第一個疑問「唔通 Margo 係「女同」?」,不過我當然無講。反而,Queena 師姐繼續講:「首先。。Margo 係有「情緒病」既。。」

「吓?真㗎?」( 聽到我既病都發作,我有既係「廢話病」)

Queena 師姐罕有地「正經」,用上一個望見都令人心碎、窒息既表情:「米仔,唔通我會講呢啲呃你咩?」

而當佢縮開佢雙手時,我可以感覺到佢雙手在轉冷。。冷得開始冰硬。

「米仔,我講樣秘密你知吖。。,上次,你嚟到我屋企,可能已經發覺只得 Margo 同我一齊住。。」

係喎,而家 Queena 師姐提到。。真係無男人股「味」,全屋都好女性化。



「我係個「單親媽咪」,我 17 歲就已經生咗 Margo 。。而呢一間房,曾經係我哋兩母女既「屋企」,直至到 Margo 5 歲,我哋先至有自己既「家」。。」

我不其然四周望望這間狹小空間,
越聽,我個心就越「寒」。。唔係「鬼故」嗰隻心寒呀,而係好鬼「淒涼」呀!!唔怪得有啲咁既病啦。。

Queena 師姐繼續。。

~ 待續 ~