[人格分裂]我入咗伊利沙伯中學: 密室談判

過咗一個禮拜，學生會啲人終於肯貼我嗰邊幾篇文， 不過 ，小童群益會嗰篇文出咗街之後 ，社工又嚟搵我
"我最近都留意到有啲文章喺民主牆上面係關於我哋小童群益會個喎, 你有冇睇過呀 ?"
"冇呀我冇睇過呀"
" 如果你冇睇過咁你而家睇呀, 睇完呢一篇文章之後有啲乜嘢感受呀? 對於呢位同學嘅睇法唔知你認唔認同呢?"
" 都冇乜特別感覺嘅"
" 咁或者你陣間考完口試之後 ,你嚟搵一搵我, 同你介紹返小童群益會呢一個組織呀， 好唔好？"
" 好 "
佢好似有啲意想不到我竟然會話好
"哦咁好呀,你十一點半嚟社工房嗰度搵我啦 "
入到社工房




"呢本係小童群益會嘅刊物 ，咁首先同你介紹返先，我哋小童群益會 …"
佢打開枱面嗰本書
"我哋小童群益會除咗嗰篇文章所提到嘅香港小特首之外, 仲有好多其他嘅工作㗎喎 ，例如我哋會有輔導服務啦，我哋會幫助返一啲 需要協助嘅人士啦"
佢打開學校輔導服務嗰版 ,嗰板寫住一年小童群益會喺學校有成千幾個個案要接受輔導
"我想問一問呢我係咪呢一千幾個個案入面嘅其中一個個案嚟㗎?"
" 點解你咁想知道你係咪其中 一個個案?"
" 我自己都想了解返自己嘅情況"
" 有啲嘢知道得太多就唔係太好嘅 ,同埋我哋會開始一個個案嘅時候呢都會得到受助人嘅同意嘅"
我好似冇同意喎
"如果我係其中一個個案可唔可以終止咗我呢一個個案 ?"




"咁樣啦, 我再問一問教你嗰幾位老師如果佢哋都覺得你係已經唔再需要協助嘅話,咁我就終止你呢一個個案喇 "
咁都得係你違規開始我呢個個案咋喎
"另外都想你留意返呀 ,管理小童群益會嘅人就唔係淨係得你所講 …得嗰篇文章所講果啲政治人物嘅 ,可以留意番我哋仲有呢一啲人都係冇政治背景嘅 "
"姑娘想多謝你呀 ，因為你將同學對小童群益會嘅意見講咗畀我知，咁我都會將呢啲嘢意見反映返畀我哋總會嗰邊嘅 "
我諗我做到咁樣佢應該唔會再搞我喇啩