【完】最近我想追一個女仔⋯⋯: 我都住屯門㗎！（上）
那個人脫下了面罩，黑色布料底下的，原來是一張不折不扣的娃娃臉。
.
「大家好！希望大家仲會記得我，我係阿Kit，係動漫學會嘅聯絡幹事。大家頭先玩得開唔開心啊？」她用MC 一樣的腔調道。
.
我當然也認得出她的聲音——她就是剛才拉倒我的那個人。
.
「開心心心心心——」一大群去死去死團的成員舉手吶喊道，但全都是粗獷混濁的男人聲。他們一個個脫下面罩，果然清一色毒男長相，而且全都戴著方框核突眼鏡；身材不是瘦得見骨，就是頂著一個大肚腩，有些甚至開始有禿頭的跡象！這些人一聚在一起，頹廢的氣氛立刻從中散發出來，讓人完全不想靠近。
.
而阿Kit 一說話，這羣噁心的毒男就目不轉睛地瞪著她，彷彿她是甚麼珍禽異獸一樣，由上至下、再由下往上打量數次，有個甚至直接伸手進褲袴中，變態程度令人髮指。
.
但我也可以理解。畢竟Kit 長得很有氣質，不，應該說很可愛。雖然不像阿玲或小藍一樣有玲瓏浮凸的身材，但樣子十分甜美，精細的五官配上纖幼的身軀，整個人就好像活脫脫的從少女漫畫中跳出來一樣。
.
她再次張開櫻桃小嘴，說：「咁就好喇！只可惜歡樂嘅時光過得特別快，Party 時間已經嚟到尾聲喇⋯⋯」
一聽到「Party 時間已經嚟到尾聲」，毒男們馬上發出失望的叫聲。恐怕那是他們每次聚會都引頸以待的環節吧。
話說回來，所謂「Party 時間」是指剛才的惡作劇嗎？一大班人在玩cosplay，然後瘋狂地投入在動漫角色當中⋯⋯
想到此處，我想我明白了先前覺得奇怪的地方了。
此時 Kit 又說：「不過大家唔使擔心，我已經準備咗啲好玩嘅嘢俾大家！」
Kit 剛剛說完，後面的喪女便點一點頭，自動將一個投籤箱捧了出來。
「今次我哋玩嘅遊戲，就叫做『天使的翅膀』。」
毒男們聽到這個極度中二病的名字之後，雙眼不約而同地閃亮起來。真的很難想像我竟與這群怪物同校！
「玩法好簡單，淨間你哋每日出嚟抽一個波，如果你抽到嘅係粉紅色嘅波，咁你就係屬於『天使陣型』；相反如果個波係綠色嘅呢，咁你就係『墮天使陣型』。之後要做啲呢⋯⋯就等你哋抽完再講啦！」Kit 眨了一下眼，台下隨即傳出歡呼聲。
總覺得這個遊戲十分耳熟，究竟在哪裡聽過呢⋯⋯總之先去抽籖吧。
抽籖的過程（意外地）沒甚麼特別，大家都乖乖排隊去抽。
我抽到的是綠色的乒乓球，也就代表我是「墮天使陣型」的。而上面寫著的「13」這個數字，則不知道有甚麼意思。
「好喇大家！抽完波之後，就由我繼續講解玩法喇！」那把悅耳的聲音再度響起。
「其實好簡單。係嚟緊嘅嘅日子直至學期完結，天使都是默默守護住自己嘅墮天使，無論佢遇到咩困難，天使都要盡全力幫助佢；而就算墮天使無事無幹，天使都要努力咁氹佢開心。但係！喺呢個過程入面，天使絕對唔可以被對方知道你嘅身份！」
唓！咁咪即係Secret Angel？天乜鬼嘢使翅膀啫，改嗰名就係新Game 啊？我而家係咪返咗大陸啊？
與此同時我察覺到另一個不對勁的地方，舉手問道：「咁天使點知道對方係邊個？」
Kit 微微一笑，答：「問得好。咁而家墮天使們，請讀出你哋嘅號碼啦！」
號碼應該是指球上面的那個數字吧⋯⋯
就在手持綠色球的人陸續說出自己的號碼後，Kit 一邊玩弄頭上的髮夾，一邊說：「好！咁大家認住佢哋啦！因為有同一組數字嘅人就係一Pair 嚟㗎喇！」
真無聊，無緣無故我為何要對其他人好？話說回來，為甚麼被守護的人要叫「墮天使」啊⋯⋯
聚會之後還有數個環節，包括動漫新番介紹、Cosplayer 介紹、劇情討論⋯⋯總之都是些無聊的活動。
最後完結的時候，我不由得有種解脫的感覺。
「喂，你而家去邊啊？」有人拍了拍我的肩頭，我轉身一看，原來是Kit 。
「返、返屋企囉⋯⋯」我已經不想跟這個學會扯上任何關係了，況且折騰了一天，現在我已經很睏了，恨不得馬上回家躺在床上。
「我都係啊！不如一齊囉！」她異常主動地說。
「吓？但係我住屯門㗎喎⋯⋯」這間學校的人不是住元朗，就是住天水圍，理論上應該不順路的。
「我⋯⋯我咁啱都要去屯門做啲嘢，咁不如一齊行啦！」她眨了兩下那雙貓眸子道。
「咁、咁你鍾意啦。」我嘴裡雖然說得隨意，心裡卻是暗爽，畢竟有美女陪我回家也是一件美事。
* * * * * * * * *
黃昏的陽光如金沙般揮灑在英泥路上。地上有一高一矮的身影，應該說是「一矮一更矮」。
「係呢？聽講你鍾意打機㗎可？」她問。
「吓？係啊。」
「點解嘅？」
「咩點解啊？」
「問你點解鍾意打機啊？」Kit 按一按頭上的髮夾道。
「吓？無嘢做咪打機囉。」從小到大，屋裡都沒錢給我玩甚麼興趣班，自己又不喜歡運動，不在家裡玩online game ，我還可以做甚麼？
「哦⋯⋯其實我都係㗎⋯⋯由細到大都冇乜朋友，每日除咗練琴之外，就係睇動漫同打機。」她看著自己的倒影如是說。
「你都係？」我驚訝問道。潛台詞當然就是「你咁靚女都冇朋友？」
「好出奇咩？有時我覺得，自己一個人舒服好多。唔使理其他人嘅生活有幾精彩，我頹廢，我開心，咁咪得囉！」
我瞪大眼睛看著她，只覺得難以置信。
「做咩眼甘甘咁望住我啊？」Kit 的俏臉上多了一點嫣紅，是因為夕陽嗎？
「冇啊，」我轉了個話題，說：「唔使行過對面，呢度就係喇。」
她差一點走到了對面月台，搭了往相反方向的車。
「啊⋯⋯唔好意思。」她低著頭說。
接下來是一段沒來由的沉默，不知道為何她沒有再說話。
「係呢，有樣嘢我想確認一下⋯⋯」我嘗試一下打破這尷尬的氣氛。
「嗯？」我們坐上了那橙色的二人座位，她的手肘碰上了我的。
「所謂嘅Party 時間，應該係每次聚會都有㗎可？」
「係啊，好受會員歡迎㗎！」
「其實我一直都係度諗，嗰個咁嚴肅嘅Ms. 鍾，點解會肯做動漫學會呢啲學會嘅負責老師呢⋯⋯」
Kit 靜靜聆聽著我說話。
「直至今日我終於明白，既然佢可以著埋啲咁核突嘅衫，咁就代表佢好鍾意呢味嘢⋯⋯但係礙於身分，佢平時唔可以表露出嚟⋯⋯」
她點點頭，大概證實了我的推論正確吧。
「所以所謂嘅Party 時間，應該係俾會員盡情投入角色，唔使好似平時咁扮正常，可以做埋自己，一大班人一齊癲，係咪啊？」
「Bingo!」估唔倒你都幾醒㗎喎！」
「咁我諗我知點解你哋會用倒六樓活動室啦。」我說。
「吓！咁呢樣我又唔知喎！話俾我知吖！」
我奸笑了一聲，說：「唔、話、你、聽。」
「喂啊！講啦講啦講啦講啦講啦講啦！」她不斷拉扯著我的襯衣，八著眉嚷道。如果阿玲會對我這樣做的話，我想我已經爽翻天了吧。不，現在想想就已經很爽了，嘻嘻⋯⋯
然而快樂的時間過得特別快，幾輪拌嘴間，原來我們已經到站了。