【完】最近我想追一個女仔⋯⋯: 脫毒夏令營（上）
那雙不知疲倦的眼睛與天花板對望，燈滅的房間裡只透進一點街外的光。
我從床頭櫃裡取出一部小小的投影機，按下開關，一幅夜空星辰圖便落在天花板上，緩緩旋轉起來。投影機悠悠播出童話音樂⋯⋯
妳坐在星光上 在我的思緒裡穿梭
我在平靜的海面上許願
祈盼妳是下一顆流星
憑愛意將妳抱緊
用酒精填滿大海
贈妳一千份甜
「你阿媽搵你！你阿爸搵你！你阿⋯⋯」吵耳的來電鈴聲敗了安眠曲的輕柔。
我不耐煩地下床拿起手機，心中咒罵那阻人入睡的混蛋。
「喂？邊位？」我已經累得快要瘋掉了。
「我係阿Kit 啊！乜你冇set 我電話咩？」另一頭傳來一把甜美的女聲。
「今次又點啊？我唔想再玩你哋啲活動啦⋯⋯」
自從暑期開始之後，百無聊賴的我每天都只在家中打機睇片，頹廢得不似人形，想出街卻不知可以往哪裡逛；每天唯一的樂趣就是撩阿玲whatsapp，然後找哈比人吐苦水、訴說自己的相思之苦。
我開始過著日夜顛倒的生活，結果就得了失眠⋯⋯
「唉啊！你咪咁啦！今次真係好好玩㗎！」
「唉啊！你咪啦！我真係唔想玩啊！」
「嗱，我唔會阻你好耐㗎咋，我講完一分鐘你再決定啦⋯⋯」
「唔使啦！我唔需要。」我呢生人冇嘢多，就係接過嘅傳銷電話最多，自然識得如何應對。
「你唔嚟我就爆你大鑊！」她急了。
「爆咩大鑊啊？易潔鑊？」
「你唔係唔記得⋯⋯你上次喺屋企⋯⋯對我做過嘅嘢呀嘛？」她吞吞吐吐的，不願說起那些不堪回首的往事。
我聽後頓時心神大亂，事關那件事著實不見得光，雖說我王傲風不俗於世，但始終「意圖強姦未成年少女」也不是光彩事啊⋯⋯話說回來，我也未清楚當時我發生了甚麼事。
「你⋯⋯你想點啊⋯⋯」
「如果你唔負責任嘅話⋯⋯我就話哂俾全校知你嘅好事！」她氣急敗壞道。
「你想我點負責任啊姐姐！」
其實我甚麼都沒做過，又談甚麼責任？果然女人都是⋯⋯
「好簡單啫，我陣間whatsapp 份嘢俾你，你之後就明㗎啦！」她的語調又回復輕鬆，隨即就掛了線。
就係咁，我今日先會喺度，企咗喺班毒L 隔離。
喺呢一刻，我覺得自己遁入咗空門成佛，明瞭咗呢個大千世界嘅真理：
孽緣，其實是一個連鎖來的。
「大佬！我哋好耐冇見啦！估唔到喺度撞返你！」
不，原來是兩個連鎖。
「乜係你啊⋯⋯吳同學。」想不到在我面前的，竟然是那個奇怪插班生 Master Joe ！
「豈！唔好唔見外！叫返我 Joe 仔得喇！」他嘻嘻笑道。
Joe 仔今天的裝扮也是不意外的出眾，一身典型西部牛仔的服飾，墨鏡、皮靴、牛仔帽都成功地吸引路人的目光。
「哦⋯⋯你點解會喺度嘅？」我問。
「冇！我聽講呢度幾好玩，咪報咗呢個學會囉！係喎！上次俾你包『水過三巡半句多』用咗未？」
「吓⋯⋯好似唔記得放咗喺邊⋯⋯」他指的應該是那包來歷不明的白色粉末吧。
Joe 仔一臉失望道：「咁就可惜啦⋯⋯呢包嘢⋯⋯」
「嗚啊啊啊啊啊啊！女神降臨喇！」一眾毒男忽然振臂高呼，原來是阿Kit 剛剛來到。
「唔好意思啊，遲咗少少。」Kit 走到我面前笑道，笑時還露出了一雙小虎牙，煞是可愛。她今天輕裝上陣，鬆身T恤配超短熱褲，露出了一大截白皙的大腿。
Kit 不像阿玲一樣有陽光氣息和健康的美態，也不像小藍一樣有著魔鬼身材；卻是可愛嬌小，教人想把她捧在掌心好好呵護，可謂身嬌腰幼⋯⋯咳咳。
與此同時我感受到身上突然聚集了極多怨恨的目光，全都是來自我身邊的毒男，十分明顯是因為Kit 一來到就跟我打招呼吧。
雖然我對 Kit 沒有意思，但能接受到這樣的「禮遇」，我的內心不禁升起了一份自豪。
然後一眾動漫學會的幹事也陸續抵達，除了上次的喪女外，這次還有很多陌生的臉孔，不過共同點都是長得怪模怪樣，其中一個身形矮壯的男同學尤其吸引我的注意，因為他真的長得很抽象，五官都好像放錯了位置似的，使我不由得將他當成藝術品般觀賞。
「你知唔知佢乜水？」我問 Joe 仔。
「佢咪會長囉！大家都叫佢『半獸人』㗎！」這個稱號形容得相當貼切。
不久後，連負責老師 Ms 鍾都來了，不過身邊竟帶著一個令我意想不到的人⋯⋯
「強哥？」我失聲驚呼道，身旁的Joe 仔更嚇得雙腳發抖（詳情請回顧前文）！
想不到校工強哥長得一臉正氣，竟也會參加這種烏煙瘴氣的活動！不，其實只有我一個覺得烏煙瘴氣嗎？
只見他結實的身軀上背著大大小小的行李，卻是臉不紅氣不喘，反而含情脈脈地看著Ms 鍾。
「如果大家準備好嘅話，我哋就即刻出發！我哋已經準備咗好精彩好好玩嘅節目俾大家玩！大家跟我一齊講：動漫精神，FF超人！估你唔到，超級美好！」Ms 鍾此時呼召大家高呼口號！
「動、動漫精神，FF⋯⋯」想不到我生存了十多年，如今竟要淪落到在巴士站、眾目睽睽之下大叫這種羞恥的口號！但為甚麼我周圍的人都喊得那麼起勁啊啊啊啊啊！難不成我才是最奇怪的人嗎？
不，有「動漫學會」這四字作招倈的活動，無論構思有多好，到最後都必然會變得業餘、不專業、不認真，就算那是看起來十分正常的夏令營也是一樣！
「你想我入camp ？@@」當晚我收到whatsapp 後回覆。
「係呀，我哋準備咗好耐㗎啦，我估你一定鍾意啫！」
老實說，我對這東西完全沒有期望，無論怎樣想它都一定非常無聊啊。
但這個想法很快就被推翻了。
它沒有讓我感到興奮；相反的，我驚呆了。
營址的室外廣場驚現一張十分中國式的綠底紅字橫額，寫著：
熱烈歡迎趙元鬆紀念中學動漫學會來訪！
「X ！咩料？」我看得目瞪口呆。
這時，一隊身穿啡黃軍服的男人啲啲躂躂地跑到我們面前，向Ms 鍾敬了個禮。
我們還搞不清楚狀況，其中一個軍人便用純正的北京腔普通話說：
「鍾老師！動漫學會脫毒夏令營已經準備就緒了！」
甚麼⋯⋯脫毒夏令營？咩話？我有冇聽錯啊？