【完】最近我想追一個女仔⋯⋯: 原來拍拖⋯⋯係咁嘅感覺
【54. 原來拍拖⋯⋯係咁嘅感覺】
結果我昨晚整夜都輾轉難眠，眼光光望著天花板直到今朝六點。
.
「喂阿仔你今日發神經呀？咁早起身嘅？」我打開房門與媽媽撞個正著，嚇得她好像撞鬼一樣。
.
「豈！我成晚都冇瞓過！梗係早醒喇！」我一馬當先，立刻搶了廁所來擦牙洗臉。
.
「下！但係我睇你精神到哥斯拉都打死幾隻喎！」
.
「得啦唔講咁多，喂我買咗啲止痛貼喺枱面，自己攞嚟貼啦！」梳洗過後我就以𣊬雷不及掩耳之勢飛到門口處，攞鞋綁鞋帶，一連串動作毫無窒礙、行雲流水，難度系數 9.9。
.
「突然咁有阿媽心？你一大清早又要去邊啊？」
.
「去跑步啊！」一切準備就緒，全部馬匹準備妥當。
.
「吓？唔係啩？你唔好嚇阿媽啊！你十年都唔做一下sit up，而家你一朝早去跑步？」她的語氣驚訝得像看到香城樓價急速下滑一樣。
.
「得啦！係咁！」我用力一趟，隨即奪門而出！奔向升降機的時候，還聽見媽媽無謂的擔心：
.
「咁你至少換咗件睡衣先吖喂！」
.
但我已為人男友，又怎會介意這種小細節？大方地讓途人看見我胸口上的哈佬吉蒂又何妨？我在微熹的晨光底下，一邊跑步，一邊跳幾個舞步，只覺得自己是寶萊活裡的超級明星，在輕快的音樂底下翩翩起舞，快活過神仙，向著太陽進發！啦啦啦啦啦⋯⋯
.
出完一身汗、洗了冷水澡後果然份外醒神，我一手抹著濡濕的髮絲，另一手則掃著手機屏幕。
.
「你出門口未啊？ ♡＾▽＾♡」
.
「而家出啦！^_^ 」
.
我淺淺一笑，心頭泛起一點點甜的感覺。
.
嘻嘻⋯⋯真係想快啲見到佢。
.
「痴線㗎你？做咩望住部電話笑啊？」一把聲音冷不防在我耳邊響起。
.
「嘩！乜你未返工咩？」我嚇得差點跌倒，說話的人原來又是媽媽。
.
「冇，漏咗啲嘢啫，做咩咁驚？」 她對我投以一個奇怪的目光。
.
「冇、冇嘢⋯⋯我出門口喇！今日約咗人。」我假笑幾聲後，便啪的一聲關上了大門。
.
今天是與 Kit 的第一次約會，因此我必須隆重其事，準時到達。
.
「我好緊張啊！>///////////<」
.
「我都係啊！」
.
我捂著胸口，心情既興奮又緊張。
.
「阿⋯⋯阿哥？」我抬頭一看，心臟不自覺地多跳了一下。
.
小天使——那是我的第一感覺。
.
今天的Kit 依然可愛，放下了及肩的長髮，標誌性的髮夾卻不見了，取而代之的則是繫著蝴蝶結的頭箍，加上一身杏色的連身短裙，完全是青春無敵的極致。
.
「咁著會唔會⋯⋯好奇怪啊？」她抿著塗了唇彩的嘴唇道。
.
「唔、唔會啊，你今日好靚啊！」聽罷，她腼腆地笑了笑。
.
「我⋯⋯可唔可以拖住你啊？」
.
她沒說話，只用力地點了下頭。於是我才放心輕輕的捉住了她的手，摸上來原來是那麼的滑溜而吹彈可破，惹人憐愛。
.
我一定會⋯⋯盡我所能去愛你、保護你。
.
在這一刻，我覺得自己達成了一項了不起的成就。
.
「咁我哋今日去邊啊？」
.
「一個保證好玩嘅地方。」
.
其實根據我為數不多的社交經驗，我能想到「保證好玩」的地方只有一個。
.
「嘩！你睇下！可以同米妮影相啊！不過條隊好長喎⋯⋯」
.
「唔緊要啦，好快㗎啫。」我微笑道。
.
「嗯！」
.
是的沒錯，為了不失禮，我出了大技——迪迪尼樂園。
.
「嘩！個噴泉好靚啊！」
.
「呢個係咪有得玩㗎？」
.
「呢個咪⋯⋯咪蝙蝠俠？」
.
Kit 對迪迪尼樂園的好奇程度實在高得令我驚訝，因此我答道：
.
「吓⋯⋯嗰個巴X光年嚟㗎喎⋯⋯你第一次嚟呢度？」
.
哪知Kit 鼓起金魚嘴，道：「係⋯⋯係第一次唔得咩？」
.
「咁多謝你俾咗你嘅第一次我喎！」我猥瑣笑道。
.
晃頭晃腦的Kit 想了想後，才懂得捶了我的背一下，說：「王傲風你好賤啊！」
.
這時我趁機抓著了她的手，說：「係啦，以後唔好叫我阿哥啦，叫我阿風得啦，又或者叫我⋯⋯都可以。」最後那句話我是刻意在她耳邊說的，逗得她耳根都發紅了。
.
「咁繼續行啦，傻妹。」
.
然後我們接連玩了「巴X光年冒險之旅」、「小X象」、「咖啡杯」⋯⋯最後則在我力勸之下，試玩了一次她敬而遠之的過山車，結果是她玩完之後都快哭了，說以後無論如何永世都不要再試，但我看見她這個樣子，倒是覺得挺滑稽的。
.
原來拍拖的感覺，是如此甜蜜愉快的。
.
快樂的時間過得特別快，還未唱完「畢生也願記起」，璀燦的煙火就在空中盛開了，華麗得叫人移不開目光，讓人好想搬進城堡裡細緻觀看。
.
「好靚啊⋯⋯」
.
我轉頭一看，只見到她的眸子裡映出五光十色的光芒。
.
表演結束了，遊人收拾起心情，帶著累積了一整天的疲倦走進列車車廂。
.
「仲有啲時間⋯⋯帶你去多一個地方？」我說。
.
「仲有？」她揚起眉毛，一副興致勃勃的樣子。
.
浪漫在海傍進行著圓周運動，閃著粉色的光芒。
.
「我哋慢慢升高緊啊。」我看著愈縮愈細的地面道。
.
「真係好高啊⋯⋯」Kit 像個小孩子一般好奇地四處張望。
.
「係呢⋯⋯其實我有個好尷尬嘅問題想問⋯⋯」我說。
.
「係咩啊？」
.
「其實⋯⋯你全名係咩？」
.
Kit 聽後，漲紅了臉道：「有冇搞錯啊！女朋友個名你都唔知？」
.
「咁我而家咪問返囉⋯⋯」
.
Kit 輕嘆了口氣，應道：「嗱，咁我而家淨係講一次㗎咋⋯⋯我叫謝映潔，所以英文名叫 Kit，以後你要好好記住啊！」
.
「得喇，傻妹。」
.
謝映潔謝映潔謝映潔⋯⋯我覺得這個名字有點耳熟，卻一時間想不去哪裡聽過類似的⋯⋯
.
「係呢阿風呀，其實⋯⋯點解你又會⋯⋯鍾意返我嘅？」Kit 這條問題讓我始料不及，不知該如何應對，應該說，其實連我自己都不知道答案。
.
「冇啊⋯⋯你一直都對我好好，而我又突然對你有返feel 咋嘛⋯⋯咁你呢？你又鍾意我啲咩啊？」我含糊其詞。
.
「我？」Kit 撥一撥微卷的長髮，忽爾傾前緊抱著我，精緻的臉躺在我的手臂上。
.
「我咪鍾意你夠傻囉！」
.
在那一刻，我覺得自己是全世界最幸福的男人。
.
可惜這種感覺沒有維持得太久。
.
============================================================================================================
「你點搵到我IG 㗎？ O.O」
.
「呢啲嘢有毅力就得㗎啦！」
.
「XD」
.
「你知唔知我係邊個？」
.
「我知，你係first aid 房個男仔呀嘛⋯⋯」
。
。
。