【完】最近我想追一個女仔⋯⋯: 緊抱還是放手？
【56. 緊抱還是放手？】
愛情是最複雜的練習題，是一條永遠解不開死結的耳機線，比世上最難的數學題更難解開。
.
「好，咁各位同學我哋聽日再見喇。」數學王收起了教科書，代表今天的補課時間正式完結。
.
「唉X！終於完⋯⋯」我看著窗外的夕陽餘暉抱怨道。
.
班房裡馬上有了桌和椅間碰撞的聲音。
.
「咪臭係！又係𠴱日朝早先話今日要補課⋯⋯」
.
「X佢成日都非法補法！成日都唔跟時間表⋯⋯」
.
同學們你一言我一語，漸漸地，所有人都離開了班房，因為再過十五分鐘，學校就要關門了。
.
這時我慢條斯里地行落樓梯到地下，竟發現還有人待在球場上，尚未肯離開。
.
「喂⋯⋯你做咩啊？仲唔返屋企？」我訝然看著在練球的阿康道。
.
他看到我卻只是眨了下眼，說：「冇啊，陣間仲要返補習，趁仲有啲時間咪練下波囉！」
.
「吓⋯⋯但係仲有十分鐘就鎖門喇喎⋯⋯」
.
「十分鐘唔係時間？」他投出一球三分後反問我道。
.
「你⋯⋯使唔使咁搏啊？」
.
「今年係我最後一年學界喇，我唔想後悔。而且⋯⋯」
.
「而且？」
.
他苦笑了一下，續說：「阿儀話，如果我贏到學界冠軍，佢就會同我一齊。」
.
「嘩！乜你哋搞咁耐都未一齊㗎？」我還以為事情早已塵埃落定。
.
他聽後臉有難色應道：「係啊⋯⋯佢話好驚我對呢段感情唔認真⋯⋯」
.
「好啦，咁你加油喇。」
.
「你又去搵嗰個女仔呀？」阿康的話叫我停下了腳步，再次轉過身來。
.
「吓⋯⋯我搵自己女朋友啫？有咩問題？你唔係唔知我有女、朋、友呀嘛？」我很強調「女朋友」三隻字，因為經過這一年我才知道，並不是只有靚仔先溝到女，我都可以。
.
他的眉心一緊，看似不滿意道：「你應該知我講緊邊個。小藍同我講，謝映潔佢成日都匿埋喺房到喊。所以我估⋯⋯你可能會知道點解。」
.
阿Kit 佢自己喺度喊？點解佢冇同我講過⋯⋯
.
「咁、咁無啦啦關小藍咩事？」
.
只聽阿康輕輕搖了頭，便繼續獨個投三分，完全不理睬我。
.
唰！清趣的破網聲。
.
碰！響亮的撞柱聲。
.
我一邊摸著頭上痛處，一邊四處張望，希望沒有人看見我的窘態。都怪阿康的話讓我晃神了——Kit 為甚麼會哭？這會與我有關嗎？是我待她不夠好嗎？
.
我開始努力回想自己為她付出過的東西，可是很奇怪，可能是午飯沒吃飽的關係，我竟連一個畫面都想不起來。
.
我⋯⋯是真的喜歡她嗎？
.
這是真正的愛情嗎？
.
不安的念頭慢慢在腦海中浮現，驅使我加快腳步回家。
.
聯絡人：哈比人。
.
「喂⋯⋯我有啲嘢想同你傾⋯⋯」
.
「你好耐都冇搵我啦喎！做咩 O.O」
.
「嗯⋯⋯如果我話，我鍾意咗第二個女仔⋯⋯咁我好唔好同現任分手啊？」
.
「咁你愛唔愛而家嗰個啊？」
.
「嗯⋯⋯都愛嘅。但好似冇以前咁愛。」
.
「咁你應該好好諗下，點分手先係對佢嘅傷害最細⋯⋯女仔嘅青春好寶貴㗎！如果你慢慢對佢無feel 嘅，就放手啦。」
.
「但係我好唔捨得⋯⋯」
.
「⋯⋯咁你係咪真係好鍾意嗰個女仔先？佢值唔值得你放棄而家嗰個？」
.
「我唔知啊⋯⋯我好亂啊⋯⋯」
.
「分手嘅嘢講咗就冇得返轉頭㗎啦，你自己睇下點喇。不過無論你嘅決定係咩都好，我覺得你最好都同返你女朋友講，如果唔係嗰女仔好慘㗎⋯⋯」
.
「嗯⋯⋯多謝你。」
.
「有咩再搵我喇！」
.
（最後上線時間為XXX）
.
躺在床上的我放下了手機，看著白茫茫一片的天花板發呆。
.
究竟我應不應該⋯⋯繼續和她在一起呢？
.
我喜歡她，但同時喜歡另一個她。
.
「頂你咪即係未玩夠囉！廢話！」話筒另一端傳來Joe 仔的聲音，背景異常嘈雜。
.
「未玩夠？」
.
「即係你仲想溝其他女囉！X呢啲好X正常嘅啫，係男人都會㗎啦，係街見到個樣靚身材正，返到屋企見到個無咁好嘅，咪分手囉！諗咁多做乜？你唔係諗住成世都keep 住呢條女啊嘛？」Joe 仔滔滔不絕道。
.
「我⋯⋯唔係啲咁嘅人。」我怎麼可能是這麼賤的男人？不可能！不會的！應該不是的⋯⋯
.
「嗱！唔好講咁多，即刻出嚟同我玩！一拖幾先算識玩啊大佬，唔係咩啊！我⋯⋯」
.
「得啦，我下次再搵你。Bye 。」我受不了他的「意見」，馬上就掛掉了電話。
.
心中的掙扎和懷疑愈來愈緊，讓我猶豫不決。
.
可能我和她已愈行愈遠，分手或者是最好的選擇⋯⋯更重要的是，無論我再怎樣騙自己也好，我心底裡也深深知道自己跟她一起的原因。
.
但她真的對我很好⋯⋯已經不想再讓她流淚了⋯⋯
.
這時whatsapp 傳來了通知。
。
。
。
「我都鍾意睇英雄片啊！>_<」
.
「咁下個禮拜⋯⋯我哋去睇《復O者連盟》好冇？」
.
「我同你？」
.
「我請你睇好冇？」
.
「你同你女朋友睇啦^ ^"」
.
「但我淨係想同全世界最靚嘅女仔睇咋喎！」
.
「唔⋯⋯」
.
數分鐘後，區韻涵的頭像變成了灰色。
=============================
下集 大結局，記得留言，同撳追稿啦！