【食勻亞洲】上天堂前要食過的五條女: 五) 初遇結衣

咁岩有個女仔係我面前經過,個樣有少少似結衣,唔係波多野,係新垣結衣。
 
而佢並唔係<逃恥>入面個大媽look,而係大概喺<戀空>嗰陣時長頭髮隻眼睛水汪汪個look。佢突然停一停低望住我:「想去註冊?」


 
「同你?」我仲未回魂就順口應左佢。
 
「哈哈你講咩呀,我問你係唔係新生註冊呀!」佢笑個陣真係好charm。
 


「記住前面轉右就係架喇,但係唔好唔記得拎你張單張下,我哋個大O下個月就搞,記得報名啊~」佢講最尾嗰句嗰陣用手指指住我,同「好賤呀」嗰幕係一模一樣。
 
結衣簡直為我展開大學生涯嘅第一日帶黎猛烈嘅衝撃。
 
正當我想問佢攞表格報名嗰陣時,突然間有個貌似陳小春嘅MK仔一行過嚟就搭住佢個膊頭:「新生註冊嘅直行轉右就得㗎。Chelsea, 你幫我上房拎多少少soven 落黎呀,啲pamphlet我派埋得,反正個camp都夠人。」
 
然之後一手搶左結衣啲單張,佢帶結衣行開去,隱約聽到條MK細細聲咁同佢講:「啲毒撚你就咪撚理佢喇,要yo都yo啲女番黎喇,而家男女唔平衡呀大佬。」
 
只見結衣傻更更咁點點頭,然後走去拎野。
 


點都好,起碼知道佢叫 Chelsea 先。亦因為佢,令我由一個曼聯迷開始對車路士有番啲好感。
 
望住陳小春企係到派啲大o傳單俾啲freshman 囡囡個狗公樣,我心入面真係屌左一聲。
 
我明嘅,大概當我地踏出中學校門,無論大學或者工作地方,就已經係社會嘅縮影。要明白係呢個弱肉強食嘅世界入邊,我一定要知道點樣玩呢場遊戲,先可以得到我想要嘅野。
 
既然陳小春睇個款都唔會俾form我,我亦都無謂自取其辱,返屋企至算。
 
我份人不嬲都好撚硬頸,人地愈唔想俾我拎到嘅野我偏要得到。