弊家伙，閻羅王唔見左!: (六)

(六)
九叔看到我時，語氣變得有點興奮，道:「其他人冇問題可以散會先，阿Vinci你跟我入一入黎!」

「唉……第一日番工就比人照肺，睇黎都做唔長!」，我心裡暗想，於是懷著忐忑不安的心情跟著九叔進入他的辦公室。

我以挺胸收腹的姿勢站立，盡量使自己看起來專業一點。而九叔則以一個輕鬆的姿態坐著，悠閒地邊喝茶邊道:「喂，隨便坐啦!」

我模仿電視上的警察般，高聲道:「Thank You, Sir」

九叔給我遞過一杯熱茶，乾笑兩聲，道:「嘿嘿，唔洗咁拘謹喎。話就話人和組有一半係隸屬警務署，不過我份人都係鐘意做閒雲野鬼，今次唔係城隍爺開到聲，我都唔想重出江湖，敬禮果啲野以後就免啦。」





我聽罷不禁鬆一口氣，這方面我跟九叔的看法很一致。九叔繼續道:「今朝我睇左批槍，做工唔錯呀!」

這時我才醒悟過來，明白九叔選我進人和組的原因，道「係呀，紮野係我強項!雖然捉鬼拉人呢啲我唔得，不過後勤支援可以放心交比我!」

九叔尷尬地笑了兩聲道:「捉鬼呢家野捉捉下就得架啦，我地人和組因為人手唔係好夠，全部成員都要落前線架!哈哈!」

我忙揮手道:「九叔sir，唔好玩啦!我邊識捉鬼姐?仲有，我都冇Partner!」

九叔臉上帶著一絲狡獪地道:「咁你唔洗擔心，我已經為你度身訂造咁準備左一個速成課程同埋強勁嘅裝備。仲有呀，拍檔都幫你搵埋啦!」，九叔特然靠過來，故作神秘的道:「咪話唔益你，仲要係異國風情!」





這時回想起，才醒悟被九叔這老狐狸坑了一把。速成課程不就是教了一個最簡單的火焰咒，勉強用來點點煙、煮即食麵倒是可以。裝備也只是給了我幾道爛符，桃木劍也不肯給我一把。

九叔看了手錶一眼，點點頭說道:「嗯，你拍檔都應該差唔多到，我同你出去睇睇!」，說罷便領著我走出去。

那次便是我第一次遇見旺財，不!史努比才對!

九叔一邊跟一隻白色的狗頭人握手，一邊說道:「你就係史努比?歡迎，多謝你過黎幫手!久仰久仰!」

我們三人寒暄了幾句後，我便拉著九叔到一旁，道:「喂，九叔搞咩呀?人地唔係拍牛頭就馬面，你整隻狗頭比我做咩?」





九叔嚇了一跳，道:「好在佢唔係好識聽廣東話，佢最憎人話佢係狗架啦，你咪係佢面前講呀!佢係胡狼黎，埃及冥神阿努比斯嘅後裔，係第一個經地府優才輸入計劃黎幫手嘅外國陰差!」

我半信半疑道:「係咪架?佢捉埃及鬼就叻姐，黎到掂唔掂架?」

九叔豎起大姆指道:「緊係掂啦!佢喺埃及出哂名抽得!你知唔知佢地一般係黑色架，史努比係白色，一睇就知係稀有亞種，比平常勁幾倍!捉鬼黎講我諗分分鐘牛五都唔係佢果皮!」

我心裡暗罵道:「屌!白化病就白化病啦!扮乜撚野亞種姐?嘩!勁過牛五呀!咁又點姐?牛五好把炮咩?」，不過事已至此，我也只好認命，跟史努比一起維持人鬼和諧。