弊家伙，閻羅王唔見左!: (二十二)

(二十二)
我們四人不約而同大叫道:「閻羅王?!」，畢竟牛五所說的實在太震撼，四人的心情都久久未能平伏。

還是九叔久經風浪，四人中以他最快回復過來，鎮靜地問道:「你喺第一次掃嘅骨場條後巷入面，見到失左縱兩年嘅第十一殿閻羅王、人稱多情老漢無情鞭嘅狄公狄拿?」

牛五簡短而肯定地答道:「係!」

九叔長長呼了一口氣，道:「事關重大，牛五你詳細講比我知究竟件事係點嘅?」

牛五一口氣道:「吽，咁果日我就同洛仔負責守通去後巷嘅後門，負責趕番啲嫖客同雞番去大廳。咁趕完就繼續守住後門，唔比人出入。」





「你知啦，齋守就好鬼悶架嘛，咁個死仔就話去開大就閃左去蛇王。嗱，你唔好話係我爆架!咁我一條友無無聊聊咪恰下囉，點知訓左陣就俾啲聲嘈醒左。」

「原來係隻死老鬼諗住偷走，但係對門落左符封印，佢點走呀?比人嘈醒，我慶慶地諗住打佢一鑊啦，點知都未打，佢就雙手抱頭話『阿Sir唔好打呀，我未比錢架，咁唔算叫雞啦，唔好拉我呀!』」

「心諗呢隻老鬼咁撚無賴嘅?啲語氣同把聲仲好熟，咪拉開隻手睇下囉!唔睇由自可，一睇嚇到我得番半條牛命!撞佢個鬼，原來係閻羅王!」

「咁我問喺度做咩啦，點知個老野串到呀，佢話『牛五你咪撚玩啦，黎呢度唔係叫雞，唔通玩飛行棋咩?』，我唔係敬老嘅話，真係想當堂打佢一鑊!」

「咁我再問佢啦，『做咩玩失蹤呀?知唔知搞到依家全香港澳門立立亂呀? 』，佢即刻扮哂死狗話『我都唔想架，依家比人追殺緊呀，唔見得光架，見光即死呀! 』」





「我同佢講啦，『喂，唔洗驚喎，有我地Ghost 4保護要人組睇住，冇人可以埋到你身嘅!』，點知佢即刻疾住哂話: 『靠你地就食得屎啦!連我多情老漢無情鞭都唔夠隻惡魔打，你地點會夠打!仲有呀，呢單野分分鐘第十一殿啲人都有份，我番去咪仲危險!』」

「正當我想再追問果陣，就聽到洛仔把聲，為左唔比佢發現個老野，唯有扑暈佢。之後個老野催我話『嗱嗱聲開左個封印比我走啦，有咩留番拜山先講!記住呀，唔好同人講見過我呀!唔係牛睪丸都捏爆你呀!』」

「佢咁凶我法，我緊係驚啦，即刻開個封印俾佢走，點知個發財同班靚乘機一齊衝出去，之後啲野你地都知啦!九叔信我啦!我真係冇做二五仔架!」

九叔急忙道:「呢度你地三個睇住，個儀式你地搞埋先，我去查下!」，說罷便一陣風似的離去。

牛五不知所措地道:「咁我點呀?」





史努比道:「我諗九叔都信你講嘅野嘅，不過你都係番屋企面壁思過啦，有咩我地再搵你!」

牛五慌張地道:「咁你放番個心入黎先啦!」

史努比沒好氣地道:「你自己揭開塊布睇下啦!」

牛五看著自己完好的胸膛，難以自信地道:「點解會咁架，我明明感覺到比人劏開扯個心出黎架喎!」

史努比推著牛五道:「我同九叔一齊施幻術，容乜易呃到你呀!走啦，出面大把人排緊隊呀!」