弊家伙，閻羅王唔見左!: (二十四)

(二十四)
我繼續問道:「咁惡魔又係咩黎?」

白糖糕猶如化身百科全書，詳細地道:「中國、香港同澳門就行地府制，歐美地方就行天堂地獄制，而惡魔就係地獄嘅使者，職責同地府嘅陰差唔多!」

我皺眉道:「咁即係話呢單野牽涉外國勢力?」

白糖糕點頭道:「嗯，而且狄公仲話可能同十一殿嘅人有關，成件事真係好複雜，究竟係咩人做嘅呢?」

九叔苦笑道:「唔止，件事仲好可能同大三元有關，閉露電視嘅影像入面，狄公當時係同發財一齊走，係被迫定自願就好難判斷。」





我們就究竟是甚麼人追殺狄公的問題討論了一會，仍然是沒有結論。

此時，史努比剛好回來，露出滿意的笑容道:「頭先我去左大三元深水埗個場，我既唔係去掃場，亦都冇人預知我會去，但係大三元啲人依然散哂水。」

白糖糕高興地道:「咁應該可以排除有內鬼呢個可能性啦!似乎佢地有一個方法係可以探知到附近有冇人和組嘅人，有就即閃!究竟係用左咩方法呢?」

九叔不禁鬆了一口氣道:「咁就太好啦，呢單野交比第一同第四小隊做啦，當係比個機會牛五將功補過!」

白糖糕有點失望地道:「吓，咁我呢?唔洗咁快打完齋唔要和尚掛?」





九叔拍拍白糖糕的肩道:「我另外有野交比你做!」

第二天，警署內的互不信任氣氛已一掃而空，因為九叔已把沒有內鬼的結論公開。我、史努比、牛五和洛仔正就調查工作展開討論。

洛仔猶如福爾摩斯上身，不放個任何一個可能性，道:「會唔會佢地係我地啲警車落左咒，可以追蹤警車嘅位置?」

洛仔自問自答道:「唔會，九叔貼哂符係喺警車度，冇咁易被人落到咒跟蹤，而且琴日史努比都冇坐警車。」

我提出意見道:「會唔會佢地用天眼通，廿四小時監視我地嘅舉動?」





史努比搖頭道:「冇可能!一，用天眼通係非常耗費靈力，仲要廿四小時睇住四十幾條友。二，以九叔同我嘅修為，被人用天眼通監視點會唔知?」

身為行動派的牛五有點不滿地道:「吽，係度齋講都冇用架，出去搵料好過啦!」

我不禁搖頭道:「點出去查姐，一去到就班友都走哂啦!」

史努比搔著他的狼耳道:「都唔一定親身出去姐嘅!」

我們三人不禁異口同聲道:「你有計?」

史努比一臉得意地道:「喺埃及有一種御屍術，可以操控木乃伊活動!」

我搖頭道:「嘩!搞人條屍咁陰質嘅野我唔做架，而且好似好高難度，我邊得?」





史努比沒好氣地道:「唔一定係屍嘅，總之有個殼就得架啦!」

洛仔附和道:「咁Vinci你紮番幾個人仔咪得囉!」

史努比繼續道:「仲有唔洗驚難用喎，我已經將佢改良成阿凡達之術!」