弊家伙，閻羅王唔見左!: (三十三)

(三十三)
當巨型銀釘插進美女心臟的一刻，她就像瞬間被抽乾水份，一下子變得衰老，身體不停地扭曲，最後化為一堆粉末，隨風而去。

九叔拍掉身上的粉末，不屑地道:「睇少阿叔?阿叔我殺殭屍多過你吸人血，唔好以為係西洋殭屍就冇你扶，阿叔乜銀野都有!打到你變灰容乜易?」，說罷便走過去支援史努比。

白糖糕又犯起老毛病，開始分析道:「唔好睇九叔平時鳩下鳩下!無論喺大局觀同戰術層面，佢都係經過深思熟慮先咁做。一開波唔揀隻河童，走去揀金髲鬼妹，當然唔可以完全排除係佢咸濕，更重要係佢睇出實力嘅差距!」

「隻河童肯定係四個入邊最惡啃，九叔就算打得贏佢，都唔係一時三刻嘅事。唔好唔記得，入面仲有大三元三個大佬未出現，加埋佢三個我地未必有著數。九叔一眼就睇出個鬼妹係殭屍，可以速戰速決，之後再幫其他人夾擊剩番嘅敵人!」

我心裡只有四個字—心悅成服，本以為他只是個懂得捉殭屍的老頭，想不到如斯心思慎密。





此時，長時間抵擋Jason攻擊的小道童似乎已到極限，龜盾合攏時有點鬆散。再者正所謂久守必失，加上小道童請玄武神君附體的時間有限，不動金剛早晚會被破去。

我焦急地問道:「白糖糕，你睇得穿未?」

白糖糕搖搖頭道:「仲爭啲，暫時淨係留意到佢瞬間轉移嘅距離最長係十米，正正係玄武童子第一次攻擊，佢果陣試過移動十米，其他時間都係短距離移動，好可能瞬間轉移係有距離限制!不過，佢究竟係點做到，我就睇唔清啦!」

我二話不說，從口袋拿出Neo’s Time的符，施出火焰咒。淺白色的光球包圍著我和白糖糕，外面的世界開始放慢起來。

白糖糕驚呼道:「Neo’s Time?九叔比左幾多呢啲符你?呢種符可以話係符籙派最高等嘅符咒之一，製作過程極花心機同靈力，我都係第一次親身體驗呢種術!」





我點點頭道:「唔怪得佢叫我慳住洗啦!喂，不如我地都係……」

白糖糕說得興起，自顧地道:「你知唔知符咒同咒術嘅分別係咩?一般黎講，使用咒術需要透過唸咒或者詠唱，再加埋雙手結印黎進行，理論上越高級嘅咒術，結印、咒語就越複雜，所需嘅時間亦越耐!」

「為左喺戰鬥中節省時間同減少靈力嘅耗損，施術者會預先將咒術儲存入一啲容器內，中國就用符，西方就用一啲晶石，要用果陣就放番出黎，極之方便!」

眼見白糖糕又犯起老毛病，我只好自行想辦法，助小道童脫離困境。Jason的瞬間轉移相當快，即使在Neo’s Time之下仍不易看見。

我集中眼力，勉強看到Jason是被自己的影子吸進去，再從附近的陰影處冒出來，由於時間正值夜晚，陰影處十分多，對Jason十分有利。





我心思一轉，心裡已有計較，忙把符弄熄，並抽出竹篾開始製作道具。同時透過念玉，把計劃告知白糖糕和小道童。

我心裡暗道:「小道童，撐多陣，就得架啦!」