（校園/青春/純愛）《班上嚟咗個插班生？》: 一、開學日

「難道我可以扭轉宿命重遇你一次...」經過個半月暑假之後，鬧鐘再次準時咁喺朝早7點鐘響起，同往年唔同嘅係，今次夾雜住雨水聲，係一個落雨嘅9月1。

「唔..啱啱先瞓着咋喎...」我勉強撐起千斤重嘅眼皮，雖然千萬個唔願意，但畢竟今日係9月1號開學日，點都要俾一個好嘅開始自己，所以我都嗱嗱臨起身迎接新學年。

唔記得講添，我叫冼佑玲，Elaine。今年16歲，讀中五。你問我靚唔靚？我自問就過得去啦，雙眼皮配天生啡色嘅眼珠，挺直嘅鼻樑，深深嘅酒窩，有少少包包面，加上一頭純黑色長髮，都算正正常常嘅。

「到未呀？就打鐘喇，唔好累我第一日翻學就遲到呀，打柒你架」我對住個電話咆哮。

「喂？就到就到，轉個彎就到喇！」電話嘅另一邊係我閨蜜，即係死黨呀。佢叫沈卓緩，Sammi。眼大大、鼻高高、瓜子臉、配上一頭微曲深啡長髮，典形女神樣，上過嗰啲乜乜secret十幾廿次，佢自己都幾引以為傲，啲兵多到由柴灣排到荃灣。





「你條友，住學校隔離都夠膽死遲到」眨吓眼佢已經喺我身後，估唔到佢話轉個彎到就真係轉完個彎就到。

「乜你唔知住得越近就越易遲到咩？講咁多，入去啦！」我地對視而笑就雙雙踏入校門，沿途都幾多人注視住我地，不過我都已成習慣，見怪不怪，話哂隔離企咗個女神。

—
可能有人會諗，究竟日日喺學校等埋朋友先入去做乜？其實我都唔知原因，不過既然未打鐘，咪等吓囉，點都好過自己一個蕃薯碌入去。可能呢啲就係青春。