（校園/青春/純愛）《班上嚟咗個插班生？》: 三、They stress physical beauty above all other trai

「h...hello..我叫冼佑玲，Elaine呀，你可以叫我幽靈，佢地個個都咁叫我㗎，哈..哈。」此刻嘅尷尬真係非筆墨能形容，但總要其中一個人做主動嘅，一於將舊年喺子洛身上學到嘅嘢應用出嚟！
「hi。」佢一眼都冇望過我。就係咁，我地dead air咗兩堂。

一到小息，我就一如常態去隔離班搵卓緩落小食部買嘢食，罕有嘅係，一出班門已經見佢喺出面等緊我，仲不斷探頭入我班房。

「望咩呀，我喺到呀」
「邊個話我望你姐。喂，聽講你嗰班嚟咗個插班生喎，咩樣㗎？靚唔靚仔㗎？」
「ok啦，佢坐我隔離，把口撬都唔開呀，deadair左兩堂呀陰公。」話畢，佢就喺班房行咗出嚟。

「唔係喎，ok喎」個衰婆對眼好似發光咁。




「鍾意呀？去馬囉。橫掂天下間都冇一條仔係你溝唔到嘅。」
「癡線，我似啲咁隨便嘅人咩？」佢口裡說不，但係對眼就一直望住人地。
「唉，發花癲，行啦！再唔行屎都冇得你食」
自此之後，卓緩就日日小息到自動波企喺我門口，就係為咗望多佢幾眼，帶挈埋我唔洗再等佢落堂。

話咁快已經開咗學成個星期，我同lokman耐唔耐都會講吓嘢，不過都係一句起兩句止，仲要次次都係我打開話題，直到今日。

「喂，查實呢，你個friend咩料，成日都望住我，搞到我周身唔聚財。」
「你係咪同緊我講嘢？！」我先係愕然，再求證吓呢句說話嘅真實，雖然我都好清楚佢係同緊我講嘢。
「你話呢？你咪當自己真係幽靈先得㗎」佢再次露出一個殺食嘅笑容。




「哈，原來你都識講笑。」我接住講「我個friend？邊個呀？我好多friend㗎喎」
「成日喺班房門口等你嗰個呀」
「哦，佢話你幾靚仔喎，俾人望陰兩眼會少忽肉咩？更何況俾個校花望喎，你有賺添啦。」
「校花？我對佢冇興趣喎。我覺得你好似仲靚啲」然後我地對望咗三秒，真係三秒，我計過。

「Elaine , please answer my question.」一句英文將我扯翻現實。
「er.....」
「the answer is B, They stress physical beauty above all other traits.」把聲嘅主人係Andrew。
「okay just sit down. Pay more attention to the class , Elaine.」
坐低之後，我不忙做口形同Andrew講thankyou。但之後，我同lokman就成堂都冇再講嘢。