（校園/青春/純愛）《班上嚟咗個插班生？》: 七、都是噗噗鬼惹的禍

好多嘢都諗唔通，諗唔通點解卓緩要暪住我、諗唔通佢地咩關係、諗唔通點解自己要為咗呢啲事不關己嘅嘢而發咁大脾氣。去到放學嗰一刻，我都冇同lokman講過嘢，亦唔知點樣面對卓緩，所以就求其搵個藉口叫咗卓緩走先，自己就留喺學校冷靜吓，順便等埋要練波嘅andrew先走。但係臨近學界比賽，我都深知應該有排練，我又見課室冇人，所以我就叫佢練完波上班房搵我，我就溫吓書、做吓自己嘢。

等吓等吓，唔知係咪太攰定太多嘢煩，我伏喺到瞓着咗。好彩嘅係我一早同咗校工姨姨講我等陣會幫佢熄燈鎖門、所以到我醒嘅時候並唔係俾人鎖住咗嘅老土劇情，而係有人坐咗喺我隔離。嗯，冇錯，係lokman。

「你點知我喺到」我捽住眼問佢。
「你snapchat冇開噗噗鬼模式。」佢一邊講一邊喺衫袋攞包tempo出嚟，然後攞咗張紙巾，伸去我咀邊。「你睇吓你，瞓到豬咁，流哂口水。眼瞓就翻屋企瞓啦，仲喺到等。」
「關你咩事。」我撥開佢隻手，執埋嘢起身走。

行到差唔多門口嘅時候，佢一手拉咗我埋牆，面對面望住我。
「你尋日幫你自己澄清，話方子洛唔係你男朋友吖嘛，係唔係？」




「嗯。」我輕輕點頭。
「你可以幫你自己澄清，我都要幫我自己辯護。第一，我唔知點解會有一袋咁嘅嘢喺我櫃桶。第二，我連你口講嘅嗰個咩卓緩我都唔識。第三，就算我識佢，我都完全唔知、唔明、唔理解佢點解要送嘢俾我。第四，最重要嘅係，我真係、真係對佢冇興趣...」佢用手輕輕托高我塊面，接住講「冇錯，係男人都鍾意靚女。但係你記唔記得我開學嗰陣同你講過，我覺得你仲靚」

呢個時候，時間好似停頓咗咁。呢刻靜到，連牆上掛鐘嘅秒針跳動嘅聲音、樓下球場嘅拍球聲、甚至係我嘅心跳聲都可以聽得一清二楚，雖然我搞唔清楚，心跳聲係屬於我定佢。

「幽靈，我練完波....喇。」係Andrew。
「我...我......我走先喇。」我唔敢想像我再留多一秒會點。

翻到屋企之後，我先醒起我唔記得開電話。一開機，成個通知都係whatsapp。





Whatsapp 49分鐘前
Andrew
你等埋我先啦好冇？

Whatsapp 38分鐘前
Andrew
夜喇 你一個女仔 危險呀

Whatsapp 30分鐘前
Andrew




你上車未？我走得喇

Whatsapp 29分鐘前
卓緩女神經
聽晚嚟你到瞓？傾心事😘

Whatsapp 27分鐘前
Andrew
你做咩唔開機呀？

Whatsapp 19分鐘前
Andrew
翻到屋企同我講啦 擔心你呀

Whatsapp 12分鐘前




Andrew
有咩嘢就同我講啦 巴打永遠喺到😎

「好呀☺️😘」呢句係send比卓緩嘅。
「我翻到喇，你今日咩都見唔到，咩都冇發生過，你知點做㗎啦😈」呢句，係Andrew嘅。

我放低電話，明明手機面前嘅我猶如一盤死水，所以話表情符號真係好緊要。好彩嘅係，今日係星期五，聽日唔駛翻學，所有嘢都可以暫時拋開，所以我一攤落床就呼呼大睡。