《有一晚，我喺學校操場遇到跌落凡間的天使》: 【4】
「哇，又係啲咁老土嘅嘢啊？話咩自己病咗，然後呀媽無微不至嘅照顧？」我揶揄肥蔥。
我哋就係咁樣互相攻擊，令平時沈悶嘅學習氣氛入面帶點生色。
「你諗住咁樣就感動到我啊？我唔需要呀媽喎。」小男都加入戰團，識講下笑咪好囉。
「但我需要你！」肥蔥好坦白。
「WOW！」我內心不禁歡呼咗一聲。
「一陣小測，我需要你幫手。」肥蔥成隻死狗咁。
屌，無出息。
我因為肥蔥一句說話，醒起一件好重要嘅嘢。
我拍一拍前面嗰個笨蛋小瑤，道：「喂！一陣小測喎，你得唔得㗎？」
「下？小測係咩嚟㗎？」
「屌啦星……」我擔心嘅嘢出現了，死啦，佢一陣小測會死無全C喎。
「喂喂喂，點算啊，」我努力向後面嘅人兄求救，「小瑤佢連小測係咩嚟都唔知啊。」
「已經救佢唔到啦。」肥蔥無我咁焦急，反而一臉輕鬆自在的模樣。
「點解啊？」我驚佢考得差跟住出去俾數學呀Sir照肺咋，佢最憎就係啲蠢嘅人，姐係小瑤。
「因為黃Sir已經嚟咗啦。」
「收埋啲嘢！一陣小測！」未見其人，先見其聲。
班上面個個都快手快腳咁收埋啲嘢，臣服佢嘅霸氣之下，黃Sir話老唔老，正值男人黃金時期，骨子裡藏著男人最真嘅味道。
一路測，我就一路睇住小瑤，生怕佢有啲咩事，但出奇地又咩事都無喎，我仲以為佢見到份卷會好驚訝添。
點知過幾日之後小測成績出嚟，條友仔仲高分過我！
換嚟係我驚訝不已嘅表情，唔相信眼前發生嘅景象，滿帶疑惑地問小瑤：「點…點解嘅？考得咁好？」
小瑤露出殺傷力100分嘅純真笑容，道：「喱啲我一早學過啦，我哋一早就要學㗎啦，不過啲嘢好死板㗎，我都無乜興趣去學。」
我太睇小佢啦，不過我再睇返佢其他科啲作業啊，又真係咩都唔識喎，唯獨數學係勁嘅。
枉我仲擔心咁多添……
「你哋知唔知我的少女時代啊？」小男係臨放學嘅時候問我哋。
「有啊！聽人講好似好好睇咁喎。」呀紫和應著小男。
「咁不如喱個禮拜日去睇囉？」小男雙眼發光，壓抑不住佢內心嘅興奮。
「下？少女喎，仲要少女時代，好毒姐！」肥蔥嫌棄地道。
小男打咗肥蔥個頭一下，不忿地道：「你識乜鬼啊！台灣電影嚟㗎，聽講劇情幾吸引㗎。」
「我都想去睇啊…但係我禮拜日…屋企人會唔俾㗎。」呀紫擔憂佢屋企人嘅阻攔。
「無事㗎，你話我哋要傾功課，或者出嚟溫書咪得囉。」
「幫你諗埋啦。」小男笑得好鬼馬，一睇就知佢有備而嚟。
「咁……」呀紫仲猶豫，覺得咁樣唔係咁好。
「唔好咁啦，有幾何咁樣出嚟玩，一次半次唔過份姐，我一陣放學就去買飛啦！」小男唔俾呀紫有任何思考嘅餘地。
「你啊，同埋你啊。」小男指完肥蔥之後，就指埋我。
「預埋你哋㗎啦，啊…仲有小瑤。」
「我無所謂，你話事啦。」我坦白說。
「Yeah！」小男好開心，而肥蔥見到佢咁開心，都傻笑埋一份，真係情痴。
我將頭先嘅約會同小瑤講，佢都無問題。
因為小瑤嘅衫唔多，所以我禮拜六就同小瑤出去買咗啲女仔衫，因為我都唔識揀，所以就求其買啲牛仔短褲同埋白T恤俾小瑤著住先，但小瑤又著得幾好睇喎，依家就真係有中學生嘅感覺啦。
我哋幾個會係假日出嚟嘅機會其實唔多，呀紫屋企嚴，好少會俾佢出嚟，咁既然唔齊人囉，我哋都無乜點約。
「係咪真係咁好睇㗎？」我質疑小男。
「小男話好睇就好睇啦！」小男都未出聲，肥蔥就已經幫住佢。
「好囉！一陣唔俾飛你，你唔好睇啦。」小男都唔係好惹嘅人物嚟，唔明點解肥蔥會鐘意佢。
「好好好，我睇。」我死死氣咁認錯。
「小男你都敢恰，你真係唔識死。」呀紫在旁笑我。
我哋就咁係戲院前吵吵嚷嚷，等入戲院。
小瑤就企唔穩，坐唔住咁，我就走過去問佢：「做咩姐你？過度活躍症咁。」
「我未睇過戲啊嘛，感覺好似好刺激咁！」
對於小瑤咁嘅行為已經見怪不怪，不過見到佢咁開心，我都發自內心咁感到開心。我唔明白嘅係，小瑤嗰種開心係可以傳染㗎喎，佢開心嘅時候，心頭會感到一陣溫暖。
「我哋啲娛樂咪又係行街睇戲食飯，做得多都會厭㗎。」肥蔥做咩講個事實出
嚟姐，等佢再享受下啊嘛。
「同你哋一齊嘅話，做咩都唔會厭㗎。」
我哋個個都忍唔住甜笑出嚟，心頭甜咗一下，就算喱句說話再老土，再骨痺都好啦，聽落都會覺得開心，加上小瑤一副天真嘅樣，好明顯係發自內心嘅，聽落更是受用。
「講喱啲！將來大把機會一齊啦。」
「仲有啊，你頭先真係好肉麻囉。」小男口裡不停嫌棄，但笑得最開心嗰個係佢。
我哋好快就等到開場，所有嘢都準備好曬，爆谷汽水點會少，入到去嘅時候高朋滿座，好多人都討論緊預告點點點，睇完出嚟嘅時候班女都喊曬口咁，我哋嗰兩件都唔例外。
反倒小瑤悶悶不樂咁，自己收埋係一邊悶不吭聲。
我同肥蔥兩條麻甩佬就無喊到，不過係幾感人嘅，我自己都嚮往喱種愛情。
係戲院入面，我都有偷偷地望下呀紫，心裡面希望我哋好似男女主角咁相愛。
「點啊，頭先坐小男隔離，有無出手啊？」我問得好挑釁。
「無啊，但喱套戲令我更加立定心要追到小男。」原來肥蔥同我唔多唔少都俾套戲影響到。
「點解嘅？」
「我唔想我哋兩個變到好似套戲咁，畢業後仲要受住思念嘅痛苦，萬一一個唔好彩，就會成為你一生人嘅遺憾啦喎，」
「我唔想咁。」
我凝望住肥蔥臉上嘅表情，十分堅定，我知道佢真係會做，仲要做到120%嘅努力。
但小男會唔會咁諗就唔知啦。
男仔嘛，喱啲感觸嘅情緒絲通常都會埋係心底；而女仔啦喎，好多時都係浮係面。
我哋每個人睇完套戲，感受都唔一樣，明白到唔一樣嘅嘢。
玩樂咗一日之後，頭先小瑤睇完戲出嚟悶悶不樂咁，但當我哋一齊去玩嘅時候，又無乜事，好似往常一樣。
初頭我以為無乜嘢，但我哋兩個返屋企嘅時候，佢又變得沈靜。
臉上嘅笑容俾小瑤收埋起嚟。
「做咩事啊？唔開心？」我關心地問。
「嗯。」小瑤搖搖頭，一副心事重重咁。
「講啦，少女心情就唔好收收埋埋啦。」我當小瑤好似細妹咁看待。
「有咩事同哥哥講啦好無？」
小瑤見狀，最後都係開口講。
「其實我唔明白咩係愛情，好多感情我都唔明㗎，甚至乎我根本無體會過……」
「親情、友情、愛情，我都唔知咩嚟，係天堂度，唔需要為喱啲感情煩惱，一切自有安排。但係落到嚟先明白到，體會到咩係親情，咩係友情。」
「頭先睇套戲，我係度諗，喱啲就係愛情？望住男女主角，我心入面有種酸溜溜嘅感覺。美好，但又悲傷。」
最估唔到嘅係，連小瑤都被受感染。
「我都唔係好明咩係愛情㗎，只係懂得佢係一種感覺囉，一種你想對佢好，想同佢一齊嘅感覺。」
「我想係喱段時間體驗一下，如果唔係，我怕我以後無咁嘅機會。」
頃刻，我同小瑤嘅想法都係一致，都係唔想俾自己日後有後悔嘅機會。
「一齊努力啦。」我拍拍小瑤肩膀。
我哋沈思咗一段路，返到屋企之後又好似平時一樣，但我哋已經明白咗一些事。
返到學校，一切如常，肥蔥成日都有意無意咁靠近小男，明眼人都睇得出啦，除咗小瑤。
「小男啊，陪我去小食部買嘢食啦……我今朝無食早餐啊。」肥蔥扮曬可憐咁，嗰隻可憐係幾搞笑嘅。
「我又去！我都想食嘢啊。」小瑤真係呢……
我坐係度食花生食得好爽。
「有小瑤陪你啊。」
肥蔥聽到之後，睥住小瑤，目露兇光。深呼吸咗一下，吞曬啲嘢落肚，睇嚟頭先心裡面講咗好多嘢啦。
「我買埋俾你食啊？」肥蔥臉帶微笑，好盞鬼。
「都好姐！」天真嘅小瑤信以為真。
「去啦，去啦。」肥蔥講完之後，起身向前行，強行拉起小男。
小男表情好唔情願，但身體好自然咁跟埋去。
呀紫見到佢哋走開之後，然後輕輕拍我膊頭。
「嗯？」我開心咗一下，女神主動搵我喎。
「你頭先小測幾多分啊？」呀紫憂心忡忡。
「Okay啦。」我撒謊，我唔想俾呀紫知道。
「係你收埋份試卷之前，我見到啦。」呀紫佢係專登得佢兩個走咗先同我講。
「我……」一時之間，我唔識點樣反應，心裡面都清楚，呀紫都係為我著想，我其實係應該開心先係，但我亦都唔想呀紫擔心我，覺得我好廢。
「你啊！」呀紫又再打埋嚟，喱一下比頭先嗰個重手好多。
「唔好再咁樣唔著緊自己啲成績啦。」呀紫將說話講到好重。
「知道啦。」
「嗱，我就無咁多時間再幫你補習，但我會盡量出啲題目俾你，等你做。」
聽到呀紫為我做咁多嘢，一股暖意湧上心頭，開心得濟，忍唔住調皮起上嚟。
「做咩啊？學那些年啊？」我嬉皮笑臉著，最後就係食多一嘢。
「我睇唔過眼咋！」
「你淨係做我啲練習都唔夠㗎，你仲要自己溫書㗎。」呀紫佢扮曬惡咁，但其實對我好好。
我亦都唔想令到佢失望。
「仲有啊，你要踢少啲波啊。」
「下？要踢少啲波啊？」喱個要求對我嚟講有啲難喎……
「係啊！你聽唔聽話啊？」
我係心入面甜咗一下，道：「遵命！咁我今日就唔踢波啦。」
「咩今日啊？之後都係啊！」
「你…快啲去做下練習啦，唔好浪費咗個小息啦！」呀紫別過面去，急急忙忙咁做佢眼前嘅練習。
感覺我同呀紫嘅距離好似慢慢咁拉近。
當我擰返個頭過返嚟嘅時候，我俾坐我前面嘅小瑤嚇親。
「哇！你搞乜鬼啊，咁樣趴係度，嚇死人咩？」小瑤趴係張枱度，可憐兮兮地望住我。
「做咩啊你？」
「好無聊啊，你哋又傾得咁開心，我咪係度望下你哋囉，又唔好意思阻住你哋。」小瑤股起兩頗以示抗議。
為免小瑤多想，我解釋道：「呀紫佢要我做練習，等我考好啲個成績咋。」
「哦…你要好好加油啊。」
「你悶嘅話頭先又唔跟埋落去小食部。」
「俾機會人哋啊嘛，我仲唔明咩……」
「你明就最好啦，幫得幾多得幾多啦。」
「咁人哋真係悶啊嘛……」小瑤又再露出可憐兮兮嘅模樣。
冷不其然，我膊頭又再俾人拍多下。
係呀紫。
今次佢嘅反應無頭先咁熱情，好似俾人淋場冰水咁，冷冰冰的。
「喱份係我之前補習嘅中文練習題，你拎返去做下啦。」
「哦…好啦，唔該曬……」我頓時不知所措，甚至乎係有啲驚。
「我去一去廁所。」然後呀紫就抱住冰冷嘅態度走咗去。
我閃出一絲念頭，呀紫呷醋？
因為我同小瑤？
唔會嘅唔會嘅，但……如果唔係嘅話，點解態度會轉得咁快？
跟住成日都無乜點同呀紫傾到偈，我同佢唯一嘅連繫，就係份練習。
我返到屋企都好乖咁做曬佢，仲溫埋書。
肥蔥叫我打機，我間唔中都會同佢打下嘅，但我頭先好堅決，好瀟灑咁同佢講：「我依家以學業為重，我係唔會打機㗎！」
「你收皮啦！溝女就溝女啦你，扮曬嘢。」肥蔥坐呀紫隔離，會知道都唔出奇，而且佢都知我鐘意呀紫。
「我係啊，你努力緊嘅時候，我唔可以努力嘅？」
「得啦，我明㗎啦，你溫書啦，睇你撐到幾耐。」好挑釁，姐係落戰書咁解？
「一定耐過你！」我好有信心。
「話時話，你覺得報唔報陸運會好？」
「下？你喎？平時都唔做下運動，之前陸運會又唔見你報過。」
「我想贏返個獎俾小男啊。」透過電話，我都聽到肥蔥好認真。
所以我都好認真咁講：「認真咩？你嘅處女賽喎。」
「係啊。」
「你想報咩啊？」
「班際接力囉。」
「我屌！」跟住我就大聲咁笑出嚟。
「哈哈哈！你諗住靠其他人追返啊？」
「唔係點啊？喱個係我最有機會拎到獎嘅項目嚟。」
啊，喱條友仔又唔係出嚟搞笑㗎喎，佢又真係諗得幾周到，而且幾聰明。
「而且我知通常最快嗰兩個會跑第二棒同埋第四棒，所以我就跑第一棒或者第三啦，不過最好就第一啦，咁樣就靠後面啲人追啦，哈哈！」
虧佢仲笑喎，睇嚟佢都有曬全盤計劃，做兄弟嘅，把口就用嚟串柒柒，但隻手係用嚟幫人㗎嘛。
「咁你打算拎個獎送俾小男？」
「係啊，中學喱幾年都無參加過啲咩，我想趁依家去做返啲嘢，成唔成功係另一回事，你有無做過又係另一回事，你無可能成日因為覺得自己做唔到，而唔去試下做㗎嘛。」
「但你諗住點樣送啊？你送佢都未必收啦。」
「咩啊，叫佢幫我保管囉，遲下俾返我咁囉！」
咁樣溝女都得？我俾佢吹到睥一聲。
「好，咪話我唔幫你啊，你自己都要特訓下啊，以你依家咁樣話要落場跑，我肯，其他人都未必肯啦。