《有一晚，我喺學校操場遇到跌落凡間的天使》: 【13】
「咩一年啊？」我不解。
「我本來留係度嘅時間就有限。」我同小瑤是但搵咗張凳坐低。
「唔係⋯⋯咩你時間有限，咩留係度？」我有啲語無倫次，一時之間我組織唔到自己想講啲咩。
「等陣！」我深呼吸，組織一下個思緒。
我唔敢去望小瑤嘅表情，只係望向遠方，諗清佢得返一年嘅時間。
但最後開腔嘅，係小瑤。
「本來我就係你生命中嘅過客，總有一日會係你嘅世界中消失，但都要繼續往前走㗎。」
「有啲事係逼於無奈，但你點都要學識。」
「我都係落到嚟先識咋嘛。」
本來我仲有好多問題想問清楚，但俾小瑤咁樣講一講之後，我就唔知講咩好。
「你睇下個太陽幾靚。」小瑤嘅世界本來好單純，但依家已經學識一啲人世間複雜嘅事情。
而我就好似污水咁，污染咗呢一片清澈見底嘅湖水。
輕輕地係張純白無暇嘅白紙上點了一點，就咁破壞咗潔白嘅心靈。
「係啊。」
「我好唔想你走。」此時此刻，好似俾小瑤嘅純真所感染，因為係佢身上搵唔到半點謊言，佢打從我哋認識嘅一開始，佢就係咁善良。
當所有人都以為善良係咁容易做到嘅時候，認為基本嘢啦，但善良嘅背後，默默地忍受咗幾多嘢。
我覺得小瑤做嘅嘢，比起啲渣男碧池更難做到。
因為自私人人都識做，但無私唔係個個都做到。
「你知唔知你嗰陣走咗我幾驚，我⋯⋯好唔習慣你就咁消失係我生命入面啊。」
「所以當你頭先話一年後就要返上去天堂嘅時候，我都接受唔到就咁離別啊。」
「一開始你做嘢論論盡盡咁，成日呢頭甩啲嗰頭甩啲咁，你記唔記得啊？你問我杯面咩嚟㗎，仲問我點樣煮杯面，點解咁快就食得嘅？你就知你幾白痴啦。」
「所以我其實覺得你好似細路女咁，長唔大，成日都要我照顧。」
「但可能因為咁，我不知不覺間就好自然想保護你。」
「會想你搞唔掂嘅時候幫你手，成日扭個汽水蓋都扭唔郁，綁個鞋帶就好似包雲吞咁。」
「無咗我你點算啊？」
小瑤傻笑地靠係我膊頭度。
我感受到佢嘴角上揚嘅力道。
「咁你都想走？」我反問佢。
「就算我唔想走又點呢？我又係咪真係可以唔走？」小瑤收起頭先嘅笑容。
「有啲人甚至無人話俾你知，幾時會離去，可能會不知不覺咁消失係你生命入面，連你自己都察覺唔到添。」
其實佢講得無錯，最後悟出嘅只係一個老土，又人人都識講嘅道理。
我就唔再講啦，大家明白嘅大約就知我講邊句。
「咁剩底呢一年，你做我女朋友好無啊？」明白咗就去做，因為呢一年入面，每一分每一秒都好珍貴。
而我，已經唔再猶疑。
自己真正鍾意嘅人係小瑤，當小瑤插入嚟我嘅世界之後，就唔同曬啦。
係嘅，當你鍾意一個人，然後有人介入後，你會猶疑嘅，就姐係你唔夠鍾意第一個姐。
「你唔係鍾意呀紫咩？」小瑤對於我嘅問題感到震驚，本來捱緊落嚟都成日彈起身。
「係啊，以前。」我坦然說。
「係認識你之前，我的確係鍾意呀紫。」
「但其實我根本唔知呀紫佢係咪鍾意我，同樣地我都唔知係咪鍾意我㗎，之前搞到好似你兩個都對我有意思咁，諗太多，哈哈！」
「後來呀紫話我唔明白你，覺得你對我係有啲嘢，直至頭先我知你心意。」
「咁既然都知，就唔好再曬時間係度估嚟估去啦，你⋯你⋯得返一年係度咋。」
我自己都唔係幾敢去提起「一年」呢樣嘢。
我已經唔想理佢答覆係啲咩，我總係覺得時間好唔夠，得一年時間⋯⋯邊度夠啊？？？
我捉起小瑤隻手，緊緊地捉住，唔想放開。
「你仲未答我喎，小瑤。」我用肩膊碰一碰小瑤。
「我⋯⋯點知喎！」佢望都唔敢望，仲想鬆開我隻手添。
我無俾到佢鬆開我隻手，小瑤逼於無奈咁坐返低。
佢不停地用手係咁打我膊頭，又不停地笑。我只係想呢個笑容可以一直留係我身邊，望住佢依家嘅笑容⋯⋯
我知我一直諗小瑤一年後就會走都無用。
就算無呢個規定，就算小瑤嘅身份唔係天使，只係一個普通人，我同佢都唔知幾時會分開啦？
如果因為自己一直驚佢走，而剩底呢一年入面，無好好享受同小瑤嘅快樂時光，我諗最後我會責怪自己點解唔好好珍惜。
所以唔諗咁多！我暗暗提醒自己。
我哋嘅關係因為咁樣有咗變化，瞬間小瑤成為咗我女朋友，亦開始咗同居嘅生活。
因為本身就住埋一齊，哈哈哈！
我都係一齊咗返屋企先意識到。
嗰一晚，我哋都未習慣呢種關係嘅轉變，尷尷尬尬咁，明明之前係屋企大家都好自然，反而一齊咗之後就變得異常地尷尬。
例如小瑤出廳見到我嗰陣，想講啲咩咁，但又吞返入肚，怕怕醜醜咁，因為怕醜所以先尷尬⋯⋯？
不過唔好話佢啦，我自己都係，好似忽然間唔知講咩好咁，未轉得切個模式。
但小瑤怕醜個樣⋯⋯
好可愛！
一種興奮嘅激流係體內爆發！！頓時感覺到好青春！
返學嗰陣，我哋都你眼望我眼咁，最後都係我主動拖起佢隻手。
「其實點解拍咗拖之後要拖手嘅？」入𨋢後，小瑤問。
出門口嗰陣拖起彼此嘅手，就打破咗琴晚嘅尷尬。
琴晚因為記掛住我哋一齊嘅事，我成晚都盈住盈住咁，瞓唔好，成個人好似打咗興奮劑咁。
小瑤問咗呢條我唔識答嘅問題，係囉點解嘅？
「可能要因為兩隻手咁樣拍住，然後拖住，所以拍拖先要拖手掛？」我無無聊聊咁格硬搞個爛gag。
點知小瑤「噗」一聲笑咗出嚟，我自己都笑唔出，但反而佢好似覺得好好笑咁。
「又好似係喎。」
頭先拖住佢嘅時候，佢都有偷偷地係度笑，以為我唔知咁。
去到學校附近我哋就無拖度，而且返到去我哋好似有意識咁無同任何人講我哋一齊咗。
我哋咁樣其實係咪算係地下情啊？
但肥蔥同小男又繼續係度嘈，佢哋嘅愛情係屬於嗰陣越吵越愛，打者愛也類型。
「你又偷我支筆唔還俾我！」小男又打落肥蔥度，好彩佢皮厚，捱得打姐，如果唔係骨都散。
「抄埋功課先俾返你，好快好快！」
「肥蔥你又恰小男啊？」小瑤佢一返嚟就好開心咁講。
睇得出佢呢個小朋友因為琴日嘅事，今日好似開籠雀咁。
佢真係呢，開心唔開心都寫曬係臉上，隱藏唔住。
「佢又抄緊我啲功課囉。」呀紫笑笑說，一副司空見慣模樣。
「最多我一陣幫你抄埋啦！」肥蔥同小男講。
「洗你抄？我一早做好曬啦。」小男無佢咁好氣。
「係喎！頭先我哋傾呢，不如我哋之後搵日出嚟踩單車啊？」小男頓時醒起。
「之後我都差唔多要加入補習行列，無咁多時間，肥蔥都自己都有私補啦。」
「DSE就殺到嚟啦。」肥蔥附和。
係喎，我沈醉緊感情事，都無留意班上面嘅氣氛已經慢慢變得嚴肅同認真。