從西鐵醒返之後……: 4
校服女向前傾倒，我即刻將佢扶住。
「喂！頂住！」
頓時，一抹紅光映入我眼中……係來自車頭方向嘅十字弓！如同平時玩嘅槍擊遊戲，十字弓射出一道紅光鐳射，瞄準住校服女嘅小腿。
我一手抱起校服女嘅腰，然後撲向側邊有方柱掩護嘅地方！
嗖—！
黑箭徑直射落我哋剛才身處位置！
射殺一開始越過黃線嗰對男女，同埋啱啱其他人嘅，就係懸掛車頭方向天花嘅十字弓！
果然挪亞講嘅警報聲響起時，只有一分鐘之後仍未退到黃線之後嘅人先會受懲罰呢句嘢，係掩眼法——
實際上，越過黃線嘅懲罰依然存在，並會喺警報聲響起嘅呢一分鐘生效……！
果然，呢個遊戲藏有陷阱！
「啊……」校服女低聲呻吟，臉露痛苦神色，腳踝上嘅白襪被鮮血染紅。
唔通佢俾箭射中……！
我再望真啲，校服女小腿上並無插住箭矢，不過有一條長長嘅傷痕，估計係俾箭矢劃過。
呢一刻我近距離清楚望見佢嘅容貌，果然無錯……
我並唔認識佢，但唔知點解望住佢，又有種熟悉嘅感覺。
混亂嘅聲音終於停下，月台再次變得安靜。
我偷偷地探頭一望，月台上再無跑動嘅身影，存活嘅人應該返晒去黃線之後。換言之——
只要我哋一出去，一定會成為箭矢嘅目標！
但係，如果我哋匿埋喺度，一分鐘之後會因為懲罰而死……
我哋而家，陷入咗最壞嘅情況。
「逸哥，你喺邊度呀？」遠處傳來駱譯嘅聲音，逸哥應該就係叫緊我。
「我哋喺呢度！」我大聲應道。
「你哋……？你唔快啲返嚟嘅話，一分鐘之後就會受到懲罰呀！」
「駱譯，重有幾耐時間？」
「啊……我唔知……」
「三十秒，重有三十秒時間。」另一把粗獷嘅男人聲傳嚟。
三十秒……我背靠方柱，面向車尾方向。而家我哋離黃線重有一節車卡嘅距離，而前方大約十米有一條方柱。
只要我哋跑去前一條方柱後面作掩護，再全力向前跑，就可以返到黃線之後！
奪命嘅箭矢隨時會射過嚟，呢個所謂嘅「月台」唔似普通月台，中間部分並無方柱外嘅其他障礙物，離開方柱掩護範圍嘅話一定會俾十字弓瞄準，再加上校服女小腿負傷，風險確實十分大——
不過我哋只有一條退路。
「唔緊要，我重跑得郁！」校服女堅定向我點頭。
「好……我數三二一，一齊跑去前面條柱後面！」我拖起佢隻手，打起十二分精神，「三、二……一！」
我拖住校服女一齊跑出去，向前方奔跑，同時我從反光嘅月台幕門見到一道紅色嘅直線！
鐳射正瞄住緊我哋！
「呢邊！」
嗖—！
箭矢徑直擊中方柱邊緣，我哋成功跑到方柱後方，避過第一箭！
「快啲啊，最後十五秒咋！」駱譯嘅叫聲再次傳嚟。
校服女向我點頭示意，拉動我嘅手。
我無諗過眼前呢個弱質芊芊嘅女仔，竟然比我重要大膽！
作為一個男人，無可能要比女仔膽小掛！
「最後十秒！」
我拖住校服女跑出去——今次嘅目標係抵達黃線之後！
熟悉嘅臉貌映入眼前，莉莉、駱譯、斯文男，佢哋都平安無事返到黃線。
我哋離黃線剩低最後五步……四、三……
「睇住腳邊！」鬍鬚男指住校服女腳邊——
嗖—！
千均一發之際，我同校服女成功越過黃線，而箭矢啱啱好擊落黃線上！
從死亡困境中逃脫，繃緊嘅精神頓時放鬆落嚟。我抹一抹額頭上嘅汗珠，大口大口咁喘氣。
校服女同樣辛苦地喘氣，而且小流出一行行嘅鮮血，明顯唔係擦破皮膚嘅程度，情況不容樂觀。
我同校服女到達黃線後唔夠五秒，燈光就回復正常，警報聲亦隨即停止鳴響。
突然，一道慘叫聲從遠方傳嚟。
「救命啊……救命啊……救命啊！」
慘叫聲並非由附近發出，而係前方遠處發出……！
唔通……有人無返去黃線後方！
過咗無幾耐，慘叫聲就漸漸消失。
『判定時間到，合格人數：十七，不合格人數：十一。』
短短一分鐘內又有十個人死去，單係望住眼前遍地屍體嘅月台，有種彷如修羅場嘅感覺……
「逸哥你真係好犀利，咁都可以返到嚟……！」駱譯既驚訝又佩服咁講。
「你竟然冒住生命危險去救人，真係唔知話你蠢好定點好。」斯文男搖頭嘆氣，然後執起跌落黃線上嘅嗰支箭，「呢把箭係有刃口，所以先劃得傷呢個女仔嘅腳。」
我無回應駱譯同斯文男，而係馬上慰問校服女嘅傷勢。
「你隻腳點樣？」
「無嘢……」校服女笑著搖頭，好明顯係死撐。
雖然只係劃傷，但校服女嘅小腿卻血流不止，咁嘅傷勢可大可小，好難判斷，除非有讀醫嘅人喺度。
但至少，都要搵啲嘢包紮住傷口，等傷口唔好流血流得咁勁。
呢個時侯，有個著間條衫嘅女仔行過嚟，遞咗條手巾畀我。
「呢條手巾……借畀你包紮傷口。」
我先係愕然，然後接過手巾，向間條女道謝：「多謝！」
校服女扶住月台幕門慢慢坐落地下，而我幫佢包紮傷口。不過，其實我唔係好識包紮，唔知點解包嚟包去都成舊屎咁。
「哈哈！」校服女忽然嗤笑一聲，「等我嚟喇，其實我爸爸係獸醫，所以我都識急救。」
「喔……」俾校服女笑到臉紅嘅我，將手巾遞畀校服女。
校服女短短幾秒就包紮好傷口，而且包紮嘅手勢十分嫻熟，就好似專業嘅醫護人員包紮出嚟一樣。
眼前呢個女仔係幾厲害，雖然睇落弱質芊芊，但無論係臨場反應、膽量，同埋first-aid方面都有一手，同外表成強烈對比。
不過，即使包紮完，鮮血依然繼續慢慢流出，將手巾浸濕。
「你嘅傷勢真係無嘢？」我擔憂地望住校服女嘅小腿。
「都算無嘢嘅，喺呢個情況都叫做盡咗力去處理喇！」校服女苦苦一笑。
處理完校服女嘅傷勢，我將注意力放返去遊戲度。
當警報聲響起時，遠方盡頭中央嘅天花會出現一個類似十字弓嘅機器，向我哋發箭，而且範圍係波及全個月台，即使逃到對面月台亦無用。
我哋唔單止要跑返去黃線後方，而且重要避過箭矢嘅狙殺。
果然，呢個遊戲唔係咁簡單……不過諗深一層，既然係狐狸先生幾多點，咁十二點嘅時侯狐狸先生出嚟捉人都係正常嘅事。
呢點會被忽略，係因為挪亞喺講解規則時輕描淡寫嘅緣故……
佢係故意造成呢個情況。
唯獨有件事令我疑惑嘅，啱啱講重有三十秒嘅嗰把粗獷聲音係邊個發出……？
聽落既唔係駱譯，亦唔係斯文男，而係另有其人。
『請各位乘客，請前進七步。』
正當我思考時，廣播傳嚟新嘅指示。
指令並無任何特別，不過今次再唔係單純喺月台步行，而係要踏過血跡斑斑嘅地板，跨過一條又一條嘅屍體。
望住佢哋死不瞑目嘅表情，就會有種恐懼感由然而生……
佢哋喺兩分鐘前重識行識講嘢，但而家就瞓晒喺度，再無任何反應。
原來所謂嘅警報聲同最初嘅警報聲一樣，會將黃線前嘅人統統射殺！
今次可以無事純屬好彩……下一次，我重可唔可以安然無恙甩身……？
定係，會變成佢哋其中一分子……？
大家都心有餘悸咁望住眼前嘅血路，無人敢踏出第一步，就好似第一回合時嘅情況一樣。
就喺呢個時侯，有抹纖弱嘅身影挺身而出……
行出嚟嘅，竟然係小腿受傷嘅校服少女！
佢無視眾人嘅反應，一步一步咁行出去，踏過黃線之後，繼續向前方步行。大家都好驚訝咁望住佢嘅身姿……
三、四、五、六、七……
但校服女行夠七步之後，佢竟然無打算停落嚟，重打算繼續行落去！
我即刻大嗌：「喂！已經夠七步啦！」
校服女聽到我嘅叫聲之後，停下佢嘅步伐，愕然回頭望向我。
「我而家先行到第五步咋喎……？」
「咩話……？」我一瞬間以為係自己數錯，但我好快就抹去呢個諗法，因為我一直有清楚數住佢嘅步數。
但之後校服女講嘅嘢，卻令人十分震驚。
「步數……唔係過咗黃線先開始計嘅咩？」校服女一臉狐疑咁問返我哋轉頭。
咩話……？
但係挪亞說明規則時，無講過「踏入黃線之後先開始計步數」呢條規則……
「啊！挪亞好似講過……」駱譯忽然靈機一觸，「我哋要喺『指定區域』內依照數字前行指定步數……」
而家諗返起，挪亞的確係有咁講過「指定區域」呢個字，但當時挪亞輕描淡寫咁帶過，完全無為意過。
「我以為係過咗黃線先開始計，因為一開始嗰個回合，我都係咁樣……」校服女反而不解地望向一頭霧水嘅我哋。
如果校服女所講嘅內容係真，咁我哋唔應該只前進七步，而係——由踏進黃線前方開始計起七步先啱！
「等陣先，呢個女人有可能係想誤導我哋！」揚言要拘捕挪亞嘅休班警忽然開聲，「你哋睇佢隻腳俾箭射傷，可能佢知道自己跑唔郁，想我哋一齊陪葬，特登講大話誤導我哋！」
「係囉，叫我哋唔跟廣播指示咁行，擺明係伏嚟！」另一個女人開口和應休班警。
嗰班人唔理會夏舞嘅話，照樣只向前行咗七步之後就停低咗。
呢個時侯，我醒起一件事！
「等等，你哋記唔記得第一個回合同時有十幾個人受到懲罰？」我講。
「記得，咁又點？關咩事呀？」休班警講。
「你哋唔覺得成件事好奇怪咩？同時有十幾個人失誤，根本就唔合理！如果佢講嘅係事實，咁嗰班人極有可能係因為佢哋嗰七步並唔係過咗黃線開始計起，實際上並無規則所講嘅指定區域內行咗七步，所以先會受到懲罰！」
阿叔自以為是嘅囂張表情，令我確信校服女嘅說話……佢的確係行咗七步，只不過七步並唔係由黃線前方開始計起！
正因為咗縮短與車門之間嘅距離，起初時大家都盡量靠向月台一邊，但因為位置所限，有啲人被逼企喺離黃線較遠嘅位置！
所以，當嗰班人踏出第一步時，佢哋依然喺黃線後方，未進入「指定區域」內！
「無稽之談，簡直胡言亂語！我一開始都係按照指示行七步，如果有事我一早死咗喇！大家千祈唔好聽佢哋亂噏，我當差咁多年，直覺話畀我知個女仔擺明有問題！」」休班警仍然堅持己見，甚至開口抹黑校服女。
「咁聽落的確有啲道理……」
「但萬一唔啱嘅，咁我哋咪行多咗步數……？」
「咁即係點啊，你哋究竟邊個先係啱呀！」
爭執聲不斷冒出，時間剩餘不多，未踏出步伐嘅人漸漸慌張起來。
「就嚟無時間喇！橫死掂死行咗先算！」
一把聲音突然冒出，聽到呢句話之後大家都開始向前行。
「阿逸，咁你決定……？」莉莉問我。
「我覺得嗰個女仔講嘅嘢係正確。」
我根據指示行咗所謂嘅「七步」，而駱譯、莉莉同斯文男都係選擇同我一樣嘅決定。
我合上眼睛，等待結果——