從西鐵醒返之後……: 21
＊
我哋而身處於升降機。
「逸、逸哥，估唔到可以喺度撞返你！」駱譯神情氣定，驚訝咁望住我。
「我都無諗過。」我苦笑。
喺啱啱近乎絕路時侯，眼前雜亂嘅紙皮堆中忽然有兩個人行出嚟，其中一個人就駱譯，而佢手中更拎住一樽消毒酒精！
據駱譯所言，佢係咁啱經過醫療室見到。雖然唔知有咩用，但又好會有有用，就係以呢個咁無理嘅理由拎走咗樽消毒酒精。
但係，呢個正正係我哋嘅轉機。
當時時間緊迫，我向駱譯簡單訴說情況之後，就企喺門前等侯。雜物房嘅門上無窗，對方睇唔到房間狀況。
之後，我趁住對方推開門時，一手拎住一堆紙皮掟過去，對方被殺個措手不及，失平衡跌倒地上，然後趁對方未反應得切，駱譯就將消毒酒精淋落空姐身上，我再撻著手上嘅火柴，向住空姐裝束嘅面具人身上掟去。
火焰蓬一聲升起，差啲連我哋都燒埋一份！空姐發出慘厲嘅叫聲，同時間升降機已經到咗，我哋趁住呢個時機，逃入𨋢內。
喺閂門之前，我將駱譯手中嘅僅餘嘅消毒酒精從門隙之間掟出，𨋢門完全關上一刻，出面只剩一陣火光。
回到現在，我、愛兒、駱譯同另一個人喺升降機內。
「竟然可以死過返生……」愛兒心有餘悸咁講。
「係，簡直唔敢相信……」我掃視𨋢內眾人，最後停留喺一個人身上，「估唔到會喺呢個地方再見到你。」
「我都估唔到，佟逸霖。」眼前呢個身穿白色高領衫，紮住短辮嘅少年講，「果然同以前無變，都係我認識嘅你，可以上演一齣咁精彩嘅劇畀我睇。」
「倪少賢，你都無咩點變，除咗頭髮長咗之外。」我微微一笑。
呢個人，係我好耐之前識嘅一個朋友。
佢同普通人唔同，佢係一個無論學習定運動方面都十分出色嘅人，要形容佢為天才亦不為其過。不過佢嘅性格比較孤僻，鮮有男仔會同佢做朋友，雖然有唔少女仔都對佢有興趣，但佢對嗰班女仔卻不屑一眼……
總言之，係一個十分奇怪嘅人。
而我唔知點解會同呢個人做咗朋友，重要而家……一同墮入呢個篩選之中。
除咗李sir，竟然會再次遇上認識嘅人。
「抱歉要阻住你哋聚舊，但我哋而家要去邊好？」愛兒指住𨋢內嘅屏幕，升降機仍然停喺地下層無郁過。
我諗起曾與古朗約定喺化學室再會。
「我哋去多次化學室。」我撳下五樓。
「點解？」倪少賢雙手抱胸，歪著頭問。
「嗰度有好多嘢可以拎，呢盒火柴都係嗰度拎。」我舉起火柴盒，「我哋要搵啲嘢傍身。」
「話、話說，啱啱嗰個面具人，係咪已經死咗㗎喇？」駱譯問。
「燒到咁嘅樣，唔死嘅話應該係怪物嚟。」我祈求事實如此。
到達五樓後，我哋平安無事到達化學室，而裡面有個著住格仔恤衫嘅男仔喺度。
「阿樂？」愛兒察覺到聲音太大，馬上壓返低聲線，「點解會得你一個喺度？」
阿樂望到我哋，愣了愣之後回答：「我哋向下跑到一半，遇到一個著住白色禮服，成個新郎咁嘅面具人，佢拎住把機關槍掃射我哋，跟住我哋逃走嗰陣失散咗，得返我自己一個。」
果然……鬼唔止係得兩個，除咗空姐同小丑，而家重多個機關槍新郎……
啱啱中年女人死嘅時侯，響起一陣連續槍聲……話唔定兇手就係機關槍新郎。
換言之，呢間學校裡面至少有三隻鬼。
「原、原來唔止一隻鬼……」駱譯露出驚慌嘅表情。
「係，應該至少有三隻……小丑，阿樂講嘅新郎，同埋我哋啱啱遇到嘅空姐。」愛兒苦惱咁搲頭，「而且呢場遊戲唔知點樣先可以通關……」
「唔知點通關？咩意思？」倪少賢露出好奇嘅笑容。
「假如鬼捉人無時間限制，就只會當鬼捉晒所有人先會完，即係話我哋就只能無止境咁不斷逃跑……直到死為止。」愛兒解釋。
「但係你哋啱啱先殺咗隻鬼。」倪少賢笑著問。
「咁又點？就算空姐死咗，呢度都重有兩隻鬼。」愛兒反問。
「唔通、唔通……」駱譯露出十分驚訝嘅表情，然後恍然大悟咁講：「只要我哋殺晒所有鬼，呢個遊戲就會結束？」
「聽落……又好似幾合理。」我點頭同意，「如果所有鬼都死晒，無人嚟捉我哋，咁重點繼續鬼捉人落去？」
呢間學校表面上係一個普通嘅遊戲場地，但事實上卻藏有好多殺人工具……例如啱啱我哋用嚟燒死空姐嘅火柴同酒精，化學室裡面各種化學品……
「哈哈，精彩嘅推論！」倪少賢做出拍手嘅姿勢，「我畀九十分，接近完美。」
「九十分？重差十分喺邊？」愛兒不悅盯向倪少賢。
「唔……十分就在於，人捉鬼呢件事本身就有違遊戲嘅規則。」倪少賢講，「如果我哋先係『鬼』呢？只要作為『鬼』嘅我哋將嗰班戴住面具嘅『人』殺晒，就能得到勝利，咁唔係更適合鬼捉人成個遊戲嘅規則咩？」
聽完倪少賢咁講，反而覺得佢講嘅先係遊戲嘅真諦！
挪亞從來無講過我哋係「人」，佢只係講過呢個遊戲係鬼捉人，同埋只要「鬼」捉晒所有「人」就係「鬼」嘅勝利。
從一開始挪亞無半句謊言，講嘅嘢亦的確係同我哋講……
因為——我哋先係「鬼」！
「邊個係人，邊個係鬼，我睇得到！哈哈哈！」倪少賢重要搞句爛gag。
「總之唔理我哋係人係鬼，只要殺晒所有面具人就得喇？」我總結道。
「無錯無錯。」倪少賢笑著點頭。
倪少賢，果然係個思考奇怪嘅天才。
此時，校內傳出一道廣播：『遊戲已經過了一小時，剩下玩家人數124人，遊戲繼續。』
「一百二十四人，估唔到都重幾多下。」倪少賢講。
「你……好似講到愈多人死愈好。」愛兒皺起眉頭，相當厭惡咁盯住倪少賢，「重有你嘅態度，就好似真係當正呢個係遊戲一樣。」
「無，我無呢個意思。」倪少賢揮手否認，「只係我經過咗唔少地方，都無咩見到活人，無諗過原來重有一百二十四人匿藏喺學校中啫。」
「無錯，我都同意呢點。」我同愛兒都沿經唔少地方，所以我明白倪少賢嘅意思，「咁睇落呢間學校都相當大，有唔少暗位俾大家匿藏中……不過只係時間問題，一日唔殺死所有面具人，佢哋遲早都會俾面具人搵到。」
「逸哥，你諗住點做……？」駱譯問。
我審視一下化學室，見到我想要嘅嘢後講：「既然我哋有地利，就利用呢度對面具人進行反擊。」
＊
我哋準備好所有嘢之後，就各自去唔同位置待命。
我哋今次嘅目標，係另一個面具人。
根據我哋推測，要將呢個遊戲通關，就要將三個面具人都殺死。
然而，每個面具人手上都持有武器，並非赤手空拳可以對抗。
先不論手握電鋸嘅小丑，拎住機關槍嘅新郎可以喺我哋都未反應得切就將我哋殺死，中年女人就係一個好例子。
諗返起，殺死空姐都係因為地形狹窄，加上對方大意先成功。同一招用兩次未必能成功，況且地下層已經俾熊熊烈焰焚燒。
要殺死手持武器嘅面具人，就只能靠伏擊。
而家，我雙手各拎住一塊垃圾桶蓋，獨自一人企喺化學室前，等待著目標出現。
當大家都去晒各自位置待命時，倪少賢行過嚟同我講：
「又係揀啲咁玩命嘅角色，你真係咁多年都無見。」
「如果係寒暄下就免，快啲返去準備啦。」
「話說，阿逸……你挑選咗伴侶未？」倪少賢忽然問出一個令人費解嘅問題。
「……伴侶？」我不解咁望住佢。
「喔……無嘢，你當我無講過。」倪少賢微微一笑，「小心啲，唔好咁快就死喺度。」
倪少賢突然過嚟留下意義不明嘅話後，就轉身返去自己嘅位置。
識咗佢咁多年嘅我都知佢份人係奇奇怪怪，佢最鍾意就係問埋啲意義不明嘅問題，所以我都已經習慣。
我繼續守侯於化學室門前。
老實講我對於垃圾桶蓋抵擋子彈呢件事相當懷疑，萬一真係遇上新郎，就只可以自求多福。
我嘅身體不自覺咁顫抖著，並唔係單純因為害怕，而係緊張同埋興奮兩者加埋……雖然呢個任務相當危險，但我最終依然自薦——
係因為我覺得自己做得到，而且唔會死。
噠噠噠——
一陣腳步聲從上方傳來，而且當腳步聲正朝呢度接近時，我隱約聽到「吱吱」嘅聲音。
呢個時侯，B樓梯——即係走廊中間嘅樓梯口，有兩道身影躍出，其中一道身影衣衫單薄，但身型健碩，另一道身影則衣著笨重，而且重拎住一把電鋸！
「古朗……！」我瞪大雙眼，驚訝咁望住前方。
古朗向住我跑過嚟，而且……有一邊嘅手臂無咗，鮮血不停滴落走廊上！
「阿逸……快啲走！」失去一邊手臂嘅古朗神情痛苦咁大叫，甚至成條走廊都聽得到。
古朗嘅出現令到成個計劃變動，但同時而家係引誘小丑嘅好機會！
即使逃走，古朗亦未必能擺甩小丑，倒不如搏一舖，按原定計劃將小丑引入化學室！
「古朗，跟住我，我有方法打低佢！」我向古朗講。
「……咩方法？」古朗皺起眉頭，十分辛苦咁講。
「信我，總之跟住我！」時間緊迫，我難以解釋。
「OK！」古朗毫不猶豫信任我。
古朗差唔多到我眼前時，我轉身跑入化學室，古朗緊隨其後，而小丑亦都追埋入嚟。
「屌你老母！」我突然大聲吼叫。
其實，呢一叫係暗號。
我哋嘅計劃，係將化學室內嘅窗口閂上，用強力膠封實，然後再喺兩邊出入嘅門口地上淋上酒精，灑下磷粉。
之後，愛兒、駱譯等人就喺隔籬課室待命。當我發放暗號時，代表我已經成功將面具人引入化學室。收到暗號嘅佢哋會即刻由隔籬課室過嚟。我會U字型咁樣由一邊門跑去另一邊門，佢哋就要趁我跑出嚟嗰一刻掟下燃燒嘅火柴落兩邊門口，引爆門口嘅磷粉，將所有出口以火焰堵塞。
就算面具人無俾火焰燒到，亦會俾濃煙焗死。
計劃，本應如此。
但係當我跑去另一邊門口，準備離開時——
門口忽然發生爆炸，冒起熊熊嘅火焰……
係邊個背叛咗我？