從西鐵醒返之後……: 27
＊
醫療室內。
除咗駱譯、莉莉、修洛文同倪少賢外，重多咗兩個曾未見過嘅人。
「夏舞佢情況點樣？」我焦急咁問。
「嗰個女仔手臂中彈嘅傷，我已經盡力幫佢處理。」啱啱完成手術嘅阿武額頭冒汗，「雖然呢度無足夠醫療工具，但現階段暫時無大礙。」
「多謝你……」我雙手握住阿武嘅手表示感激。
「你真係要多謝我阿哥啦，好彩我阿哥係警察，而且重學過救護課程。」另一個較矮小嘅校服少年鬼仔講。
阿武同鬼仔——聽講佢哋係駱譯遇到嘅集團之中，唯二願意主動協助打敗面具人嘅人。
知道阿武係警察嘅身份後，我諗起第一場遊戲同樣係警察嘅休班警，不過二人之間嘅性格可以話係差天共地。
「你哋無咩事嘅話，我哋就返去先。」阿武笑著指住鬼仔，「我個傻細佬應該擔心緊佢嘅暗戀情人。」
「你、你話咩暗戀情人呀？」鬼仔臉都紅晒咁講。
「唔係咩？雖然你同佢鬧咗場交，但你心裡面本來就唔想佢跟嚟，呢個細佬諗咩大哥點會唔知？」之後，阿武望向我哋，「總言之我哋返去烹飪室先，希望之後落嚟可以再見到大家。」
言下之意，就係唔好死。
阿武同鬼仔向我哋道別之後，就離開咗醫療室。
「逸哥，你無事就好……嗰陣我哋都好擔心你出事，但滅咗火入到去之後又發現你唔喺度！」駱譯慌張咁解釋，「同埋掟火嘅人唔係我哋，係嗰個叫阿樂嘅男仔……不過佢已經俾小丑殺死咗。」
「係啊……」我並無太驚訝，因為我大概心裡有數。
「重有……逸哥你有無見過愛兒，佢好似去咗搵你。」
「愛兒……」我不禁皺起眉頭。
如果計埋佢哋嘅話，喺呢場遊戲中至少有五條人命死於我手上。
「逸哥？」駱譯又問一聲，「重有啊，你爬出化學室之後去咗邊度，發生咗咩事，點解夏舞會咁嘅樣？」
「喂，你唔好咁多嘢問，你唔見阿逸而家嗰樣好煩惱咁咩？」莉莉開口截停。
「無嘢莉莉，我只係組織緊成件事應該點講。」
我回想緊大約一個鐘前嘅事情，即係我逃出化學室之後嘅事。
我諗，呢次係我第一次親眼見住眼前有渴望救助嘅人，但無法拯救嘅情景。
＊
喺化學室一役，我成功將小丑擊敗，但同時犧牲咗古朗嘅性命。
最終關頭下，我爬出窗外逃走，沿住水管由五樓落返去地下籃球場，之後就前往室內游泳池。
室內游泳池總共兩層高，要入嚟嘅話必須要經由走廊進入更衣室，再從更衣室進入。呢度空間唔大，大部分地方都俾呢個25米長嘅游泳池佔據，周圍擺放唔少雜物，好似吹風機、救生圈同鐵梯。
雖然呢度係兩層高，但呢度並無真係有兩層，而實際上進入游泳池唯一通道係更衣室。
然後，我喺呢度遇見到一抹纖弱而熟悉嘅背影——
「夏舞……」我驚訝咁望住眼前人。
夏舞聽到我嘅叫喚，轉身望過嚟後，同樣以十分驚訝嘅眼神望住我。
「阿逸！」夏舞行過嚟，「你發生咩事嚟，點解會成身都傷晒！」
夏舞見到我，第一時間竟然係擔心我傷勢。
「你對手……手掌甩晒皮，而且好多擦損！」夏舞不停觀望我嘅身體，「塊臉同頸都有好多傷，要幫你處理一下先得！」
正當夏舞轉身時，我拉住佢嘅手講：「唔使喇，好小事。」
「阿逸……」
「你呢，你隻腳點樣？你而家重有無事？」我反問返夏舞。
「你……」夏舞皺起眉頭望住我，「邊有得咁樣，淨係得你可以慰問我，我唔可以慰問你！」
「我……」我竟然駁唔到夏舞嘅話。
「睇落你好似經歷咗好多嘢咁，不過呢度係十分安全，遊戲開始到而家一直都無發生過任何事。」夏舞講。
「係啊……原來係咁。」我嘆一口氣，不過原因唔係因為呢度安全。
除咗夏舞之外，呢度至少有七個人喺度，佢哋雖然以疑惑嘅目光望住我，但至我入嚟之後，佢哋並無主動前來搭話。
呢班人與其話係同伴，反而似係咁啱匿喺同一個地方，各自各做自己事，互相之間無交流一樣。
我用泳池水沖一沖塊臉，同埋清潔一下傷口之後，就同夏舞簡單咁講啱啱發生過嘅事，包括Ellie以及古朗嘅事情。
夏舞聽完之後一言不發。
「如果我可以做得好啲，或者佢哋就唔使死。」Ellie嘅聲音同古朗嘅臉容喺我腦海揮之不去，「諗諗落，其實家明嗰套做人方式先係正確，現實根本唔存在所有人得救嘅選擇。」
「我覺得……你唔應該咁快就放棄自己嘅理念。」夏舞講，「你所做嘅一切都係為咗拯救其他人，就算最後結果未如所願，都唔代表你所做嘅嘢係錯。」
「但係，亦會有因為我嘅舉動而遭受牽連嘅人，到結果我只係口講想救人，但係咩都做唔到嘅廢柴一樣。」
理性冷靜嘅人會用一種形容詞形容我呢種人，叫做「大愛」——
抱住不切實際嘅理念，但自己毫無才能，最終望住眼前人一個個倒下，只有自己一個苟活。
咁嘅話，倒不如狠下心腸，以自己為中心去繼續呢個遊戲。
「我唔覺得係咁。」
夏舞認真咁吐出一句，我望向佢，佢以十分沉實嘅眼神咁望實我。
「並唔係將一切拋棄就叫做正確嘅選擇，無論嗰個選擇係有幾咁理性，幾咁符合現實都好……」夏舞堅定咁講，「如果唔可以明白其他人心中嘅痛苦，呢一切都唔會係正確嘅答案。」
「心中嘅痛苦……？」
「或者你未必可以拯到所有人，但你有去嘗試去理解其他人嘅心。」夏舞將我嘅手拉到佢胸口，「就好似上個遊戲你親手殺死你個老師時，你並無遷怒於佢嘅瘋狂舉動，而係為咗呢場無可避免嘅廊殺而感到難過。」
「精神論，真係有用咩？」我疑惑咁問。
「只要堅持不懈嘅話，總有一日會得到答案。」夏舞展現笑容咁講。
呢句話，好似有種似曾相識嘅感覺。
「哈哈！我已經明白我想要做啲咩……啊……」我尷尬咁將手從夏舞胸上伸回，「多謝你。」
「唔使……」夏舞微笑搖頭，「咁你之後想做啲咩？」
「我要去終結呢場遊戲。」我吐出一句。
現場除咗我同夏舞，重有七個人分散唔同地方匿藏。
我一個人未必可以對付到面具人，為咗擊敗面具人，我必須要得到其他人嘅協助。
「大家，我有一件好重要嘅同大家講。」我用可以令所有人聽到，但又唔會太大嘅聲量講。
其他人紛紜以困惑嘅眼神望向我，而我繼續講：「呢場鬼捉人嘅遊戲中，實際擔任『鬼』呢個角色嘅人係我哋而唔係面具人，換言之要完結呢場遊戲，我哋就要將所有面具人『捉』晒……即係殺死！」
一片嘩然。
就連我身旁嘅夏舞，聽到都展現十分驚訝嘅表情。
「你啱啱講嘅係真？聽你咁講面具人唔止一個咁。」喺最近位置有個大肚腩嘅中年男人走過嚟問。
「係。」
「你啱啱嗰番話有咩根據，我憑咩去信你？」
「理論上鬼捉人只會喺兩個情況結束，時間完結，或者鬼捉晒所有人。」我舉起兩隻手指，「但挪亞無講過呢個遊戲有時間限制，而另一點如果我哋係『人』嘅角色，我哋係永遠都無可能會贏。唯一嘅解釋係我哋先係『鬼』，所以鬼捉人就係我哋做『鬼』嘅去捉住嗰班戴住面具嘅『人』。」
「咁實際上呢？」肚腩男問。
「……實際上？」我露出不解嘅表情。
「你都識講理論上喇，咁即係你嘅猜測，但事實上前兩場遊戲都有時間限制，今場遊戲無講唔代表無，可能係未知。」肚腩男反駁，「你啱啱講到咁即係叫我哋去幫手捉面具人，但面具人拎住武器，咁大風險，我點知係咪真係殺死面具人就過關先？」
「我……已經殺死咗其中兩個面具人，以我所知重有個拎住機關槍嘅新郎，只要殺咗佢遊戲就應該會完結。」
「機關槍？你真係黐線，如果真係機關槍，我睬你都傻！咁樣同送死有咩分別？」肚腩男甚至露出質疑嘅目光，「我寧願安心咁匿喺度重好！」
肚腩男講完後，就轉身回到原本位置。
至於其他人聽到我同肚腩男嘅對話，似乎都揀咗同肚腩男一樣嘅決定，選擇安守現況。
其實我大概都估到會係呢個情況，畢竟唔係所有人都會願意冒險去終結遊戲。既然仍然有一百二十幾個生還者，就一定會有其他人去終結呢場遊戲，大家都懷住責任感稀釋理論，所以無人願意付出亦係理所當然嘅事。
「我會去幫手一齊對付面具人，但係得我哋兩個，我哋應該點做好？」夏舞問。
「我哋去搵駱譯佢哋先，佢哋可能重喺化學室附近。」我講，「佢哋應該會幫手一齊去殺面具人。」
「不過，佢哋當中唔係有人背叛咗你咩？」
「無錯，不過我大約估到係邊個人做。」
駱譯佢為咗其他人，可以連豁免第三場遊戲嘅機會都唔要，而愛兒份人睇落其實幾有正義感，所以佢哋兩個都唔似係做出呢件事嘅人。
剩低就只有倪少賢同愛兒嘅同伴，我大概都心中有數。
此時，我心中霎時泛起一道疑問。
「你話……遊戲開始到而家呢度都無發生過任何事，即係無面具人嚟過呢度？」我皺起眉頭問。
「係啊，遊戲開始到而家我都匿咗喺度，無見過任何面具人呀。」夏舞講。
呢度咁大個地方，面具人無可能唔會搵上門……
咁嘅話，唔通——
「阿逸，係我呀！」
一把女聲從更衣室方向傳來，行出嚟嘅人正係愛兒！
「愛兒……？」
「我搵咗你好耐，原來你平安無事，真係擔心死我——」
「小心呀！」我向愛兒大叫一聲。
砰砰砰砰砰砰砰砰！