從西鐵醒返之後……: 33
「好耐無見。」
我張開雙眼，映入眼前嘅一片蔚藍嘅天空。
呢度係邊度……
我慢慢企起身，而家我身處喺一棟大廈嘅天台，但係……我唔係應該喺山上進行緊遊戲嘅咩？
「呢度係我哋第一次見面嘅地方。」
一把女性聲音傳入耳中。
我望向聲音方向，一個披住黑色斗篷嘅人向我行過嚟，佢嘅容貌俾斗篷遮住。
「你係咩人……呢度又喺邊度？」我問。
「好耐無見，對我嚟講已經足足七年，有種懷念嘅感覺呢……」黑衣人講，「阿逸……唔係，佟逸霖，我到而家都重記住你嘅名。」
我完全唔認得眼前呢個人係邊個，不過我啱啱記起醒之前發生咩事——
喺我打算返轉頭搵Ellie嘅時侯，有個人出現喺我身後，將我推落山。
我向黑衣人問：「我係咪死咗？」
黑衣人搖一搖頭，然後講：「你無死，只係暈低咗，所以我先可以透過呢次機會同你講嘢。」
「我……係暈低咗？」
聽完之後就更加疑惑，既然係暈低咗，咁眼前嘅一切又係咩嘢嚟？
「唔使咁慌張，眼前一切同你所身通嘅都係相似嘅事物。」黑衣人講，「原本我打算更早就見你一面，不過同步失敗咗呢。」
我完全唔明白黑衣人講緊啲咩，但聽落佢好似好耐之前就認識我咁。
「過咗咁耐，記憶早已褪色，但唯獨係你我一直並無忘記。」黑衣人雙手放喺胸口，捏成拳頭，「你啊……一定要好好愛惜你自己，用心去幫助其他人係件好事，但偶爾都要考慮下自己呀！」
考慮下……自己？
「明明處於生死時刻，都要顧及他人嘅性命，實在係傻到無人有……」黑衣人搖一搖頭，嘆一口氣，「不過正因為你係咁嘅人，先會有咁嘅魅力。」
「你……究竟想講啲咩？」
雖然唔明白黑衣人講緊咩，但心裡面竟然有種共鳴嘅感覺。
「無，只係因為想見你所以先講呢番話。」黑衣人放下雙手，「而家唔係同你講呢啲嘢嘅時侯，為咗唔影響事情嘅發展，你醒返之後就會唔記得晒呢一切。到嗰個時刻，你自然會明白係我講咩。」
黑衣人講完後，行到我面前，纖柔嘅雙手摸住我嘅臉頰，額頭同我額頭對上。
「重有，千祈唔好自責，悲劇嘅開始唔係你錯，你已經做得好好。」黑衣人微微一笑，「我……」
點會……點會……
我同黑衣人之間只有臉貼臉嘅距離，而我終於見到佢嘅樣……
黑衣人係——
——
＊
「喂！」
一道粗獷嘅聲音傳入耳中，我緩緩張開雙眼。
模糊嘅景象褪去後，映入我眼前嘅係修洛文。
「修洛文……？」
我瞓喺山徑旁邊嘅泥地上，當我嘗試起身時，卻發覺全身疼痛不已！
「我……無死？」
我最後嘅記憶，係當打算轉身搵Ellie時，突然俾隻手推咗落山。
好彩我跌落去嘅唔係垂直嘅懸崖，而係比較陡峭嘅山坡，所以執返條命。
但係最後落地嗰下頭撞咗落塊地，之後就暈低咗，到而家起身之後仍然感到頭痛。
「發生咩事……唔係！」修洛文皺起眉頭，「你要快啲起身，音樂已經停咗。」
「咩話……！」
我忍著疼痛將身子撐起，修洛文舉起電筒不斷向附近照射。
「呢度無鐵罐，快跟住我走。」修洛文留低一句後向前行，而我亦馬上跟上。
行緊嘅時侯，我發現身上嘅斜孭袋唔見咗，手中嘅電筒亦不翼而飛，而修洛文單肩孭住一個斜孭袋，但睇落好似唔係我本身嗰個。
「嗰度……好似有個鐵罐。」我指向路邊位置。
修洛文將電筒照過去，係一個紅色鐵罐！
但修洛文無理會紅色鐵罐，而係繼續向前行。
「做咩……嗰度唔係有個鐵罐——」
「嗰個唔係鐵罐嚟。」
我心中泛起疑惑，雖然唔明白係咩一回事，但修洛文俾我嘅感覺十分可靠。即使連三言兩語嘅解釋都無，但唔知點解就不自覺咁相信佢。
更何況，佢係救起我嘅人。
大概過咗四五個彎位後，修洛文忽然大叫一聲：
「嗰度有鐵罐！」
修洛文照向路邊一張長椅，底下有個綠色鐵罐。
「快啲去踩！」修洛文向我講。
我二話不說聽從修洛文指示，即刻跑過去將鐵罐踩扁！
嗄嗄嘞嗄嗄嗄嗄嗄嘞嗄嗄嗄嗄嗄嗄嗄——
踩扁鐵罐之後，一道駭人嘅咬合聲發出，呢道聲音……我認得！
「睇嚟佢哋喺度！我哋快啲走！」修洛文向我大叫。
「嗷——嗷——嗷——」
我跟喺修洛文背後，同佢一齊快速咁逃離現場。
低鳴聲同咬合聲交替傳來，唔知跑咗幾耐，終於撇甩對方嘅追捕。
我哋喺空地停低之後，我問修洛文：「你……知道啱啱嗰啲咬合聲係咩嚟？」
「係怪物。」
「……怪物？」我確認一下自己有無聽錯。
「係，佢哋守喺鐵罐附近，會殺死試圖接近鐵罐嘅人。」修洛文將黑影嘅真相道出。
我得知真相之後非常驚訝，即係話……第一次踩扁鐵罐時，原來我距離被怪物殺死只有一線之差。
「咁紅色鐵罐呢？點解你話唔係鐵罐？」我繼續道出疑問。
「嗰啲係炸彈，一踩即爆。」
原來係咁……守住鐵罐嘅怪物，同埋偽裝成鐵罐嘅炸彈，我之前遇到嘅事情全部都可以解釋。
唔單止咁，就連合格人數同鐵罐人數對唔上都可以解釋……因為有人死喺炸彈同怪物手上。
「係啦！你踩咗鐵罐——」
「踩咗。」我未講完，修洛文已經先答咗我問題，「拎住，抹一抹塊臉。」
修洛文從佢嘅斜孭袋中拎咗塊布畀我，我摸一摸臉頰，原來臉上有唔少流緊血嘅傷痕。
應該係碌落山嘅途中，俾雜草同碎石割傷。
「點解會搞成咁？」修洛文問。
喺我暈低之前，原本我係打算返轉頭搵Ellie，但點知有隻手將我推落山——
而推我落山嘅人，就係Ellie。
如果無推斷錯，上個遊戲我逃避小丑追捕時經過Ellie所在嘅課室，當時除咗佢之外佢阿哥都喺度。
之後，小丑將目標轉到佢哋身上，而William為咗救佢阿妹而犧牲自己。
而課室裡面嘅Ellie，目睹到呢一切，包括將小丑引嚟嗰度嘅我。
因為我嘅出現而引來小丑，導致佢阿哥死亡，所以佢就將William嘅死亡遷怒於我身上。
或者，呢一切係我無法制止，但同時Ellie亦有遷怒我嘅權利。
我將成件事嘅始末，全部講畀修洛文知。
修洛文聽完之後，一言不發沉思。
『回合結束，判定時間到，合格人數：二十六，不合格人數：七。鐵罐位置將會刷新，數目二十個，音樂即將播出。』
音樂再次播出。
「行啦。」修洛文繼續前進。
呢兩個回合，合格人數比鐵罐人數都要少，睇嚟比起互相爭奪，炸彈同怪物嘅危險性更加高……
夏舞、駱譯……你哋一定要無事……
我懷著忐忑不安嘅心，繼續向前行。
喺唔見咗補給包嘅情況下，我只可以依靠住修洛文嘅電筒前進。
我哋行咗十分鐘後，仍然喺山路上不停徘徊，莫講話鐵罐，就連補給包都搵唔到。
「阿逸。」
行行下途中，修洛文突然叫喚我嘅名字。
「做咩？」第一次俾修洛文直喚名字，有種奇怪嘅感覺。
「當一個人絕望之時，心靈就會扭曲。」修洛文平淡咁講，「無論你點樣向佢伸出援手，都無法拯救到佢哋嘅心。」
修洛文一路行，一路繼續講。
「我以前係個黑道嘅打手，每日都活喺腥風血雨之中，即使有兄弟死去對我嚟講都係家常便飯。」
原來……修洛文有咁嘅過往經歷。
「但係有一日，因為一啲誤會，我間接害死咗我最好兄弟嘅老婆。」
我無預想過修洛文突然會同我講佢嘅往事，但聽落一定係好沉重嘅經歷。
「咁，之後點樣？」我問。
「無論我點樣解釋同道歉，都無法得到原諒。終於有一日，佢搵上門報仇，將我老婆殺死咗。」
而家我先赫然發現，修洛文左手無名指戴住銀色嘅戒指。
「當時我非常傷心，亦感到十分憤怒，但最後我決定原諒咗佢。」修洛文搖一搖頭，「只不過到頭來我都係拯救唔到佢，失去妻子嘅佢變得更加瘋狂。終於有一日，佢喺泰國被當地黑幫殺死，客死異鄉。」
「你一定覺得非常難過，係咪？」
「直到最後都無法拯救到佢嘅心，係我人生中最大嘅缺陷。但係，即使係知道結果，明知點都無法挽回佢嘅心，畀多一次機會我，我都會盡全力向佢伸出援手。」
修洛文曾經講過佢明白想要守護某個人嘅心情，所以無法去否定擁有同樣諗法嘅人。
而佢想守護嘅，係佢同佢最好兄弟曾經嘅羈絆。
「即使如此，亦無後悔。」
修洛文講完之後，就靜靜咁繼續前進。
佢呢番話，唔係想同我講佢以往嘅事，而係確確實實想話畀我知一件事。
我諗，我應該明白要點樣做。
音樂依然繼續，眼前嘅路愈嚟愈多雜草同樹木，不時有懸掛嘅樹枝擋喺路上，亦十分容易俾路邊雜草割傷，而且路徑變得隱密起嚟。
終於行到某個位置，連明顯嘅山徑都消失不見，只有雜草之間被人手開墾嘅泥路。
蓬—！蓬—！蓬—！
周圍發出樹葉搖動嘅聲音。
「小心。」修洛文伸手示意我停低。
蓬—！
「去死喇！」
有兩個人從樹後躍出，佢哋兩人各拎住一枝樹枝，向修洛文扑過去！
修洛文將掛喺單肩嘅斜孭袋舉起，擋住樹枝攻擊，然後拎住斜孭袋向其中一人打去，再提腳踢低另一個人。
「啊啊啊！」對方發出痛苦呻吟聲，「係而家！」
蓬—！蓬—！蓬—！
呢個時侯，一抹矮小嘅身影從草叢躍到修洛文眼前！