從西鐵醒返之後……: 39【4/F Extra Ellie與阿曉】
＊
「十九個人爭十五個鐵罐……」
喺短短幾個鐘內，場地生還者數目由四十二個變到得返十九個，死咗一半嘅人。
然而遊戲仍未完結，因為必須要死剩九個人，遊戲先會完結。
阿曉拎住電筒，一邊沿住漆黑嘅山路行，一邊仔細地搜索鐵罐。
幾個回合嘅經驗話畀阿曉知，呢座山其實非常矮，要從山腳跑到去山頂唔使半個鐘都可以做到。
不過即使如此，遊戲嘅設計仍然係唔合理，要喺漆黑一片嘅環境下將手掌大小嘅鐵罐搵出嚟並唔容易。
實在係非常消磨意志。
「啊啊啊啊啊！」
一把女性嘅尖叫聲傳出。
「救命啊！你哋班仆街，夠膽掂我嘅話就——啊！」
「八婆，你再出聲嘅話就殺死你！」
一陣嘈雜嘅聲音喺唔遠嘅地方傳出，阿曉行到去附近，然後電筒照過去——
係三個男人將個著住校服嘅少女撳落地上。
少女不斷掙扎，但三個男人將少女牢牢捉實，唔單止係咁掌摑佢，重粗暴咁將少女嘅校服扯開。
「反正、反正都無可能搵到鐵罐，不如俾我臨死前好好爽下！」
「八婆你唔郁嘅話，我哋最多爽完就放你走，你敢反抗嘅話就唔使指擬有命走！」
「救命啊！救——」
「屌你老母！」其中一個男人從褲袋拎咗塊布，塞住少女個嘴，「叫咗你唔好嗌㗎喇！喂，咁而家……我哋邊個嚟先？」
三個男人準備將少女侵犯，但呢刻阿曉並無上前幫助少女嘅意思。
少女同自己毫無關係，無必要浪費時間，冒住風險從三個男人手上將少女救走。
佢遇到啲咁嘅事，只可以話係自己唔好彩。
更重要嘅係呢個回合發生咗變化——音樂並無響起。
必須要音樂停止之後先可以踩鐵罐，但從一開始就無響起音樂，唯一解釋就係由回合開始嘅一刻，就已經可以去踩鐵罐。
情況變得更為焦急，阿曉已經無時間花費喺其他地方，而係盡快搵到鐵罐。
況且又可以少四個對手。
阿曉繼續前進，行咗大約二十分鐘，終於搵到綠色鐵罐。
喀嘞—！
清脆嘅鐵罐聲響起。
「又成功捱過一個回合……」阿曉從身上兩個斜孭袋其中一個拎咗支水出嚟，大口大口咁飲。
大概……之後落嚟嘅會唔會係最後一個回合？
鐵罐數目一直十個十個咁遞減，到今個回合先變為遞減五個。
不過鐵罐數目已經遞減到十五個，而且考慮到有人會俾怪物殺死，又或者俾炸彈炸死，生還人數比本來有嘅生存名額少，下個回合係最後都唔定。
「只要再過多一個回合，就完結呢個爛鬼遊戲……」阿曉抬頭望向天空，望向嗰片只有一片漆黑，無月亮同星星嘅天空。
唔知……Ellie而家點？
老實講，一個依賴阿哥，弱質芊芊嘅女仔親眼睇住阿哥被殺，難免係會受到好大打擊。
不過，佢無諗過Ellie會向佢提出一個咁樣嘅要求——
「我想你幫我……」當時Ellie欲言又止，令阿曉感到疑惑。
「你想我幫你咩？」阿曉好直接咁問，「有咩想講就出聲。」
「係阿逸……如果係阿逸將小丑引咗過嚟，然後搵我哋做誘餌，所以我阿哥先會死！」
「……你係講真？」阿曉唔敢相信自己聽到嘅話。
雖然並唔認識阿逸，但阿曉至少係喺第二層遊戲時同阿逸經歷到最後嘅人，佢係一個點樣嘅為人大約都可以睇得出。
「我望住佢同幾個人經過課室出面，之後小丑就突然間入咗嚟課室……無錯！」Ellie咬牙切齒，「佢一定係望到我哋，然後存心咁做！」
Ellie捉住阿曉嘅膊頭，流下兩行淚水。
「求求你……幫我阿哥報仇……」
Ellie講完之後，將頭埋喺阿曉心口度痛哭。
阿曉聽完之後，霎時唔知點畀反應我……始終當時唔在場，不過假如真係好似Ellie咁講，或者阿逸唔係佢想像中蠢鈍嘅大好人。
可能係一個十分有心機，城府深得將所有人呃透嘅人。
回到現在。
雖然阿曉應承過會保護Ellie，但事實上佢連Ellie喺唔喺呢個遊戲場地都唔知，因為挪亞講過今個遊戲係分成兩個場地同時進行，佢同Ellie唔喺同一個場地都唔出奇。
就算真係喺呢度，都好難搵到佢出嚟。
反正，當時都係隨口安慰Ellie。
「真係遇到佢先算，而家顧掂自己重好過。」
阿曉搖頭嘆一口氣，搵舊大石坐喺上面，從袋中拎啲嘢食出嚟補充體力。
噠、噠、噠、噠、噠、噠——
緩慢嘅腳步聲傳來，阿曉即刻企起身，戒心重重咁望去聲音方向。
除咗啱啱嗰個回合，喺之前三個回合中，阿曉都領教過怪物嘅追殺，而且佢亦估到怪物嘅目的係守住鐵罐。
但係阿曉踩完鐵罐之後行咗一段路先停低，無理由會遇到怪物。
除非……呢度附近有另一個鐵罐。
噠、噠、噠——
一抹電筒嘅白光映入阿曉眼中，而拎住電筒嘅主人竟然係——
「Ellie！」阿曉驚訝咁望住眼前人。
Ellie頭髮凌亂，臉容憔悴，手腳唔少地方都擦傷。
「阿曉……」Ellie步伐唔穩，差少少就暈咗落地。
不過喺Ellie暈落地之前，阿曉就將佢扶住。
「你……」阿曉訝異咁望住Ellie，佢面青口唇白，「你係點樣可以撐到而家？」
「我、我……」Ellie虛弱咁答。
「算喇。」阿曉將Ellie扶到石頭上坐低，然後將袋入面剩低嘅嘢食都畀咗Ellie。
Ellie一邊食住朱古力，一邊向阿曉講：「多謝你……你果然會同阿哥一樣咁照顧。」
「唔使。」阿曉心虛地搖一搖頭，「你呢個回合踩咗鐵罐未？」
「未。」
「咁你要……」阿曉猶豫咗下，然後改口：「咁我哋要快啲去搵先得。」
「唔緊要……比起呢樣，有樣嘢更加重要！」Ellie忽然露出欣喜嘅表情。
「咩嘢？」阿曉皺起眉頭，心諗有咩緊要得自己條命。
「我啊……啱啱將阿逸殺死咗。」
「咩話？」阿曉瞪大雙眼，佢唔敢相信自己聽到嘅嘢，「你點樣殺死佢？」
「我將佢推咗落山。」
阿曉大啖吞咗下口水，山上跌落去……大概十死一生。
眼前呢個弱不禁風嘅女仔，竟然做出咁嘅事出嚟！
「阿哥，我終於幫你報咗仇……哈哈哈哈！」
Ellie欣喜咁笑起嚟。
「哈哈哈哈！阿哥，我終於幫你報咗仇喇！哈哈哈！」
笑聲傳入阿曉耳中，但呢刻阿曉有種忍唔住打冷震嘅感覺。
呢把笑聲，唔係單純開心嘅笑聲……
係瘋狂嘅笑聲。
「哈哈哈哈哈哈哈哈哈哈哈哈哈哈哈哈！」
呢刻阿曉心中諗緊嘅，係究竟自己重可唔可以照顧呢個失去哥哥嘅少女……
如果可以嘅話，或者——
佢哋就會成為最後嘅「伴侶」。