「呢個遊戲真係成個鬥獸棋咁樣。」行山男睇完之後第一反應。

「不過多咗個『Reverse』,算叫做變種。」泰拳女講,「不過我以前玩過類似嘅遊戲。」

「喺邊度?」行山男好奇問。

「以前玩過嘅宿營,無咩特別。」

正如指令所講,呢個毫無疑問就係鬥獸棋,根據數字大小進行「捕捉」,而最細嘅可以捉返最大嘅轉頭,同鼠食象嘅原理一樣。





不過,我並無將注意力放落遊戲規則度。

「咁……」鬼仔面如鐵色咁講,「即係我哋同佢哋之間,一定要有一方全滅……?」

「大概……就係咁樣一回事。」莉莉睇完規則後,露出訝異嘅神色。

我嘅心情又天堂打落谷底。

原本知道夏舞同駱譯在生,本來應該感到欣喜,但而家就同我講兩邊只能活一邊……





如果我要生存嘅話,就必須將佢哋殺死。

呢個……究竟係咩爛鬼遊戲嚟!

「鬼仔……」詩詩拉住鬼仔嘅衣袖,不過鬼仔已經畀唔到任何反應。

佢同我嘅情況一樣,因為佢阿哥,即係阿武,同埋佢朋友雷爺就喺另一邊隊伍中。

「其實比起有無玩過,數字之間嘅分配更為重要。」泰拳女拍一拍手,將話題帶到遊戲,「所以我哋而家要商量點樣去分配數字。」





「贊成。」行山男和應。

「願主保祐你。」神父做出祈禱嘅手勢。

其他人包括Ellie同阿曉在內,都準備好去討論呢個話題,唯獨得我同鬼仔兩個無法面對嚟緊嘅遊戲。

腦海中浮現起夏舞同駱譯嘅臉容,夏舞雖然係個弱質芊芊嘅女仔,但有顆比其他人更能理解他人痛苦嘅心。

而駱譯雖然份人膽小,經常少少嘢就驚慌失措,但佢會願意為咗其他人去付出佢僅餘嘅勇氣。

佢哋兩個,係我見過最善良嘅人。

我……做得出殺死夏舞同駱譯呢件事嗎?

「喂,你哋兩個做咩喺度發吽哣?」泰拳女不悅咁望住我同鬼仔。





「喺呢個時侯重可以發吽哣,枉你哋可以生存到而家。」行山男嘲諷道。

如果……可以用我條命換取夏舞同駱譯條命,或者我會願意咁做。

不過而家已經唔係我一個人嘅問題,而係關乎到成隊人嘅問題,要換取夏舞同駱譯嘅安危,就必須付上呢度所有人嘅性命……

包括鬼仔、詩詩、莉莉、阿曉……同埋Ellie嘅性命。

已經……唔知道可以點算……

「阿逸,你係擔心緊夏舞同駱譯佢哋?」莉莉擔憂咁問。

「我無事。」我向莉莉講完之後,就望向泰拳女,「唔好意思,你繼續。」





泰拳女皺住眉頭盯咗我一下,然後繼續講:「手帶有數字嗰邊係裡面,當我哋戴咗手帶後除非我哋自爆,如果唔係對方係唔會知道數字。」

「無錯。」行山男講。

「換言之呢個係一場心理戰。」泰拳女拎起其中一條手帶,「所以我提議,由我嚟做9號。」

「等等!」莉莉即刻開口截停,「憑乜嘢係你做9號?」

「憑咩?」泰拳女反而一臉不解望返莉莉,「既然係心理戰,當然唔可以搵個容易俾人識穿喇,搵個男仔一定好容易俾人睇穿,所以搵女仔係比較合適。」

「就算係咁,呢個咁多女仔,點解係由你嚟做?」莉莉不忿反駁。

「啊……?9號係數字最大嘅號碼,可以話兼負成組人嘅命運,當然要搵個行動力高嘅人嚟做。如果你哋比我合適嘅,畀你哋做都得嘅,不過……」泰拳女以鄙視嘅目光望向莉莉,「你覺得你比我更適合去擔任呢個角色咩?」

「你——」莉莉俾泰拳女激到面都紅。





的確,只係睇外表嘅話泰拳女明顯係運動型,比佢做亦係合情合理。

「搵一個唔易俾人睇穿嘅人的確係啱,不過嗰個人唔係你。」同泰拳女好投契嘅行山男竟然反駁佢嘅話,「換個諗法,對面可能都會咁諗,而對你更加有防備,特別係你著晒bra top同運動褲,一眼就睇喇。」

「你……呢啲係你片面之詞!」泰拳女居然諗住唔理其他人,將手帶戴上去,「總之我就要做9號!」

就喺佢戴上手嗰刻,另一隻手拳將泰拳女嘅手捉住。

「停手。」捉住嘅人竟然係阿曉,「呢度有班被迫要同你做同伴嘅人,唔好因為一己私慾累死我哋。」

「你……!」

今次到泰拳女激到面紅,但就算泰拳女點好打,都唔會夠有一身肌肉線條嘅阿曉好打。





「……切!」泰拳女將手帶扔落茶几上。

「各位請聽我講,我哋咁樣只會無論浪費時間。所謂心理戰係人夾數字,唔係數字夾人。」神父提出另一個方案,「不如就抽籤決定,由上帝去決定吧。」

「吓?」泰拳女事敗之後明顯躁咗好多,「呢個遊戲關乎所有人性命,居然咁兒戲用抽籤方式?」

「雖然唔係最好嘅辦法,但我同意神父你個觀點,反正無論我抽到咩數字,我都諗到策略應對。」行山男同意神父嘅提議。

「多謝你,願阿們保祐你。」

「我同意。」阿曉點頭。

「我都覺得咁樣好似會公平啲。」莉莉嘴巴咁講,不過臉上掛起一副不安嘅表情。

至於其他人都無咩意見,而擺出反對態度嘅人就只有泰拳女一個。

「好,抽籤就抽籤!」泰拳女面對眾人嘅壓力,亦屈服落嚟。

「我嚟幫手搞抽籤。」

行山男將所有手帶平放檯上,數字一邊向底,然後不停咁撈亂。

「咁樣應該okay。」行山男撈亂完之後,就企埋一邊。

九條手帶放喺檯面上,大家都唔知手帶嘅數字,而我哋之後抽到嘅數字,好可能會影響到之後落嚟嘅命運。

「大家唔介意,就由我嚟抽先喇。」神父講完之後,就拎起其中一條手帶,「等我睇下係咩數字先……喔喔喔喔!點解!唔通上帝你要拋棄我呢個虔誠嘅信徒?」

「你抽到啲咩數字?」莉莉困惑咁望過去,「原來係5,我重以為係1啊2啊之類嘅號碼。」

「你唔明嘅喇,上帝已經將我拋棄……」神父合上眼,一邊搖頭一邊祈禱。

「時間無多,我哋快手。」行山男抽咗條手帶,「係8號。」

「咩話,點解你一抽就抽到8號!」泰拳女不忿咁講,「啱啱撈亂手帶嘅人係你,你一定係出術!」

「我唔介意再抽。」行山男將手帶放返落去,「今次你嚟洗。」

泰拳女凌厲咁瞪咗行山男一眼,然後將手帶重新撈亂。

之後,行山男再次抽出一條手帶,佢望完之後將手帶號碼展示畀泰拳女睇。

「唔好意思,都係8號。」

泰拳女扁起嘴巴,非常唔忿氣望住行山男,但行山男抽多次都係呢個結果,只可以話佢十分好運。

行山男抽完之後,我哋其他人都各自抽出一條手帶。

「鬼仔,你係9!」詩詩愣望向鬼仔嘅手帶。

「竟然又呢個𡃁仔做9號……!」泰拳女不甘咁望住鬼仔,然後望向自己手帶,「啊?點解!點解我係抽到1號!」

我望向自己抽到嘅手帶……

係4號。

雖然未到話非常之細,不過亦係一個十分不利嘅數字。

「我哋將抽到嘅號碼show畀大家睇啦。」阿曉將佢嘅手帶展示出嚟,係2,比我更加細!

然後,我哋大家都將自己嘅手帶展示出嚟——


1—泰拳女
2—阿曉
3—詩詩
4—我
5—神父
6—莉莉
7—Ellie
8—行山男
9—鬼仔


「既然抽到係咁就生死無悔。」阿曉將手帶啪一聲扣上手腕上。

「你講就容易!而家抽到1嗰個又唔係你!」泰拳女大鬧。

「我個數字都只係比你大少少,更何況你係1號,係唯一可以捕捉到9號嘅人。」阿曉冷靜咁反駁返轉頭,「你嘅存在非常重要,而且一旦reverse你就係最大嘅人,所以萬一真係發生情況,大家都會將你保住先。」

「切……係真唔係啊……」泰拳女低聲咁講。

「係喎,咁Reverse應該由邊個人嚟做……?」莉莉將最後一個問題道出。

大家鴉雀無聲。

原因不言而喻,擁有Reverse嘅人一旦俾人掂到就必定會死。

毫無疑問,唔會有人主動請纓必死無疑嘅角色。

「擁有Reverse嘅人無論數字係幾多,都會無視數字被『捕捉』,所以一定唔可以揀數字影響力大嘅人。」行山男理性咁分析,「7、8、9呢啲一定唔得,而1號亦唔可以,因為1號擁有『捕捉』9號嘅功能,我哋唔可以浪費呢個功能。」

「咁應該放落邊個數字好?」莉莉追問。

「撇除啱啱講嗰啲,重有2至6,不過假如reverse咗,2同3都會變成大號碼,所以盡量都唔放落佢哋度。」行山男繼續講,「剩低最無影響力嘅號碼,就係4、5、6,而我個人……就係推薦5號做Reverse。」

5號……就即係神父。

聽完行山男嘅分析,大家都默不作聲。

既然矛頭指向嘅唔係自己,就無必要為他人發聲。

呢刻我望向神父,但神父嘅表情就好似一早估到一切咁……

佢啱啱抽到5號時嘅反應,唔通佢抽到嗰刻就知道會係咁嘅結果?

「我明白喇。」神父緩緩開口,「雖然上帝拋棄咗我,但我仍然願意為各位承受罪孽……就如耶穌被釘落十字架一樣。」

神父將手帶上嘅黃色掣撳下。

『紅組Reverse人選已確認。』聲音從手帶播出。

一切已經分配好,遊戲已經難以避免。

我細心咁閱讀一次屏幕上嘅遊戲規則。

「既然已經分配好,剩低落嚟嘅就係交涉。」行山男望向電視,屏幕上有個倒數計時,「重有十分鐘就開始遊戲……我哋應唔應該去交涉好?」

「等等……」我講。

「咩事?」行山男疑問。

原來我忽略咗一件事……

呢件事,或者係所有人嘅轉機!

「我想講,可唔可以由我去交涉……」



「或者我可以搵到所有人都唔使死嘅方法。」