詩詩嘅叫聲從下方傳出,鬼仔嘅表情頓時變得繃緊起嚟。

「我要去救詩詩!」鬼仔焦急咁跑去後樓梯,我即刻從後跟上。

情況……非常不妙!

詩詩同泰拳女嘅數字都非常細,遇到敵人嘅話只會死路一條!

『玩家人數發生變動,紅方:8人,藍方:6人,請各位繼續努力。』





紅方人數依然維持八人,詩詩佢哋重未有事!

我哋要趁快搵詩詩!

「聲音喺附近傳出,可能就喺下一層!」我同鬼仔講。

我哋落到去下一層,果然喺另一端走廊有幾道身影,但由於燈光昏暗睇唔清楚。

「詩詩!」鬼仔焦急咁大叫,然後又轉變為憤怒嘅眼神望向另一個人,「係你……傑少!」





金頭髮嘅身影慢慢轉過嚟,望向我同鬼仔。

「係你呀𡃁仔,重有……你!」傑少瞇起雙眼望住我。

我諗佢唔會忘記我曾經揍過佢嘅事實。

我哋企咗喺三條走廊嘅中心位,傑少企喺離我哋十米距離嘅走廊位置,而詩詩同泰拳女就企喺走廊盡頭。

「鬼仔,佢、佢……」詩詩眼泛淚光指住傑少,「呢個人渣,佢竟然將Bobo先姦後殺!」





「……咩話?」鬼仔露出不可置信嘅表情。

「係佢啱啱親口講㗎!佢、佢……」詩詩已經失聲痛哭,嘢都講唔到。

「你個人渣!我要殺死你!」鬼仔雙手握成拳頭,嬲到差啲就衝咗過去。

「你想殺死我?你夠膽咩廢柴?」傑少挑釁返鬼仔轉頭。

「你老味……!」

鬼仔向傑少衝過去,但我即刻將鬼仔拉住。

「唔好阻住我!放開我!」鬼仔不停掙扎。

「你冷靜啲先,就咁衝過去就真係中傑少計!」





鬼仔聽到之後停低落嚟,然後問:「你咁講係咩意思?」

「如果我無估錯,傑少嘅數字係9號。」

唔係單純嘅猜測,而係根據而家嘅情況同傑少嘅性格得出嚟嘅肯定。

傑少份人膽小怕事,一有危險佢一定係第一個走路嘅人,但而家即使面對四個人,佢仍然有咁充分嘅自信,就可以知佢身上嘅數字相當大。

而且對於佢嚟講,就只有9號呢個可能性。

傑少聽到我嘅猜測之後低下頭,然後大笑:「哈哈哈!唔怕話埋畀你哋知,我嘅號碼就係9!」

「你靠唬呀而家?」泰拳女反駁返轉頭。





「你唔信嘅咪試下嚟掂我囉!」傑少攤開雙手,「不過放心,就算你唔嚟掂我,我都會嚟殺死你!」

「我唔會俾你咁做!」鬼仔怒吼一聲,然後又想衝過去。

「鬼仔等陣!」我即刻捉住鬼仔,「如果數字相同嘅話雙方都會受到懲罰!」

「就算係咁,我都要救詩詩!」

「你聽我講先!」我將鬼仔耳朵拉過嚟,「你記唔記得嗰個女仔嘅數字係咩?」

鬼仔瞪大雙眼,然後恍然大悟。

「你真係9號啊嘛?咁你真係唔好彩喇。」泰拳女露出自信滿滿嘅笑容。

「唔通、唔通……」傑少呢刻露出驚慌失惜嘅表情,準備向後跑。





「只要殺死你哋嘅9號,呢場遊戲我哋就贏硬!」泰拳女向傑少衝過去。

「唔好、唔好啊!」

喀嘞——

走廊盡頭嘅單位忽然打開門,有個雞冠頭嘅男人從屋內出嚟,佢無視喺佢眼前嘅詩詩,向泰拳女衝過去。

莫非——

當泰拳女意識到,轉身望去時已經太遲。

雞冠男戴住藍色手帶嘅手掂咗落泰拳女身上。





『接觸判定——藍方取勝,紅方被捕捉。』

泰拳女一臉驚愕,佢重未反應到發生咩事,鮮血就從佢嘅鼻孔同嘴巴噴出。

「點解、點解會咁……」泰拳女無力地向雞冠男伸出手。

但係傑少一腳將泰拳女嘅頭踩落地下。

「我梗係知1號可以殺9號,所以從一開始就諗住佈局引你哋上吊,無諗過你哋竟然真係咁蠢咁快上吊!」

俾傑少踩住嘅泰拳女仍然抽搐緊,而臉上流下兩行混雜鮮血嘅淚水。

「呢條女雖然身材幾正,但可惜寸咗啲。」傑少露出嘲弄嘅笑容,「更何況我唔鍾意同屍體搞嘢,哈哈!」

望見傑少羞辱死者……唔係,係羞辱就死嘅泰拳女,心中不由然感到十分憤怒。

但係,而家嘅情況仍未解決。

詩詩重喺走廊盡頭一端,俾傑少封住退路。

而且重有另一個危機——

唯一可以殺死對面9號嘅人死咗嘅話,就代表對面嘅9號將會橫行無忌,將其他人殺死只係時間問題。

除非一個方法——Reverse。

先唔講要擁有Reverse嘅人條命,無論係我哋隊定係對面隊,而家呢個情況已經刻不容緩。

「跟住下一個就到你。」傑少一步一步向詩詩行過去。

「你、你……」詩詩被迫到走廊盡頭,「我唔會驚你,你呢個人一定不得好死,等俾天收!」

「放開我!」鬼仔一嘢從我手上掙脫出嚟,「我要救詩詩!」

「你咁做嘅話——」

「我,鍾意詩詩。」

如果鬼仔同傑少接觸嘅話,鬼仔會死。

但係,我並無任何理由去阻止鬼仔嘅行動。

「詩詩!」鬼仔猛然衝過去。

「……鬼仔!」詩詩望住鬼仔吶喊。

如果有個人愛你,愛到可以願意付出你嘅一切,包括性命嘅話,咁嗰個人一定非常非常深愛著你。

可惜,嗰個人未必係注定畀到幸福你嘅人。

鬼仔從後將傑少捉住。

「嗚啊!」鬼仔一拳打落傑少塊臉,打到連牙都飛埋出嚟,然後跌落地下。

『接觸判定——』

然後,鬼仔行到詩詩面前,露出歡喜之餘又帶有點無奈同悲傷嘅笑容。

「詩詩……你無事就好。」

『雙方取勝,雙方被捕捉。』

一抹鮮血濺出。

將呆滯嘅臉容,以及純白色嘅校服,統統染紅。

「啊哈!」

鬼仔一時腳步踉蹌,差啲失平衡,而詩詩即刻將鬼仔扶住。

「鬼仔、鬼仔!」

「詩詩,你無事就好……」

俾鬼仔打飛嘅傑少則趴喺地上,聲嘶力竭咁大叫:「嗚哈……點解會咁!點解我會受到懲罰……我唔想死,媽媽……我唔想死……」

傑少用盡力氣喺度掙扎,至於雞冠男企喺走廊中間,來回咁望我同詩詩佢哋,但遲遲無任何行動。

再加上佢出嚟時並無順手牽羊殺埋詩詩,我估佢嘅數字其實並唔大。

我瞪大雙眼,握緊拳頭,露出非常憤怒嘅表情慢慢向佢行過去。

「鬼仔嘅仇,就等我嚟報!」

我講完之後就向雞冠男衝過去,雞冠男見狀即刻推開身旁嘅防煙門逃走,我作狀跑到去後樓梯度就停下腳步。

雖然雞冠男嘅數字係細,但我嘅數字亦唔大,所以我唔夠膽真係同雞冠男比大細,追上去亦只係嚇下佢。

不過憤怒的確係真。

我行返出去走廊,只見詩詩抱住鬼仔低頭痛哭。

「鬼仔,你點可以咁樣,你點可以咁樣……」兩行淚水沿住詩詩臉頰流下,「王少計,你點可以死先過我,重要死喺我面前!我唔俾……我唔俾呀!」

如同暴雨般嘅淚水從詩詩嘅下巴滴落,將鬼仔臉上嘅鮮血化開。

「我有句話一直想同你講,但一直都無勇氣講……」鬼仔氣若如絲地講。

「你……想講咩?」

「我……」鬼仔欲言又止,「算喇都係……」

「你想講咩呀,你同我講呀!你同我講呀!」詩詩以喊得沙啞嘅聲線大叫。

鬼仔愕然咁望向詩詩,然後微微笑起嚟。

「我……鍾意你。」

詩詩聽到之後,更加泣不成聲。

「點解你唔早啲講!點解你要而家先講!你正一衰人!」

「我……對唔住,我成日都唔顧及你感受,到最後都係咁……」

「我憎死你,我憎死你啊……因為我都好鍾意你……!」

詩詩死命將鬼仔擁入懷中,儘管鬼仔臉上嘅血跡將詩詩整污糟,詩詩都無放開手。

鬼仔喺詩詩嘅懷中安然入睡,睡上一個永遠都唔會醒,但非常幸福嘅一覺。

因為佢終於向詩詩表達咗愛意。

我行到仍然抱住鬼仔哭泣嘅詩詩面前,緩緩開口講:「詩詩,我哋要走喇,啱啱嘅聲音動靜太大,敵人可能已經發現到我哋都未定。」

但詩詩依然緊抱鬼仔,唔肯放手。

「詩詩,我哋唔可以辜負鬼仔嘅心意。」

呢刻嘅我同樣悲憤交加,但我唔可以白白浪費鬼仔以性命換返嚟嘅嘢。

詩詩係鬼仔最後想守護嘅事物,所以我要代替鬼仔去完成呢個使命。

我緩緩將手放開詩詩緊抱鬼仔嘅雙手,然後將其鬆開。

「我哋無辦法帶住佢走,就俾佢安祥咁瞓喺度。」我忍住悲傷同不甘嘅心情,「佢,已經永遠存活喺你心中。」

詩詩慢慢將鬼仔平放落地上,用手將鬼仔臉上嘅血跡抹走,然後輕輕吻落鬼仔嘅額頭。

「……我可以啦。」詩詩企起身,將臉上淚痕抹得一乾二淨。

鬼仔十分安祥瞓喺度,而除咗鬼仔,泰拳女亦因為呢場紛爭而喪命。

至於傑少,亦已經斷咗氣。

不過有一件事可以肯定——

眼前呢個單位就係藍組嘅單位。

走廊上嘅單位已經驗證過,應該係全部鎖實晒先啱,而可以打開嘅單位只有三個——雙方嘅單位同埋交涉地點。

我望向木門上嘅單位號碼,係1521。501、1011同1521就係以五為倍數嘅三層喺三條走廊盡頭嘅單位,如果我早啲發現到嘅話或者就唔會發生咁嘅悲劇。

『玩家人數發生變動,紅方:6人,藍方:5人,請各位繼續努力。』

廣播再次傳出。

雙方人數依然十分接近,但我哋仍然領先。

如果係呢刻,即使雙方已經爆發衝突,或者……我哋重可以繼續雙方打和嘅計劃。

只要……無錯,只要咁樣嘅話……

佢哋就可以生存落去,兩邊唔使再互相殘殺。

只不過,不安嘅因素依然存在。

傑少同雞冠男嘅佈局好明顯係精心設計,為咗等我哋嘅1號上當。從一開始佢哋就明白,遊戲嘅分水嶺唔係在於可唔可以喺最短時間內盡可能捕捉對方嘅人,而係將對方嘅1號捕捉。

一旦1號被捕捉,己方嘅9號就幾乎無敵。

我唔相信傑少咁聰明發覺呢點,而且大費周章去故意哄泰拳女上當。

當然有可能係傑少嘅同伴雞冠男諗出嚟,但直覺話畀我知有個人嘅可能性更加大——

唔派人嚟交涉,突襲我哋嘅基地,設局捕捉我方嘅1號……



話唔定,對方呢一切嘅佈局都係源於佢……