從西鐵醒返之後……: 56—結局篇（下）
＊
一下響亮嘅槍聲傳出。
無情嘅子彈貫穿阿逸嘅頭部，阿逸嘅身軀緩緩倒下。
「阿逸！」
我即刻衝上去抱住阿逸，但係……阿逸佢已經停止呼吸，安然咁合上雙眼。
你咁樣……係咩意思？
咁樣就係你期望嘅結局？
我抱住阿逸嘅身軀，淚水已經忍唔住缺堤而下。儘管如同豆顆大小嘅眼淚一滴一滴滴落阿逸臉上，將阿逸嘅臉頰滴得一片濕潤，但阿逸依然無任何反應。
但係，阿逸呢刻嘅表情好幸福。
你……而家係咪去咗一個幸福嘅地方，脫離咗呢個地獄喇？
「你好犯規啊……做出咁狠心嘅決定，但自己可以一個去享受幸福。」我將頭埋落阿逸嘅胸膛上，低聲痛哭。
重記得第一次遇見你嘅模樣，重記得你為我捨身嘅姿容，重記得你緊張我傷勢嘅表情……
呢一切，都化作為泡沫，隨風散去。
「恭喜你，成為呢場篩選嘅通關者，你將會獲得注射聖體嘅機會，擔任新人類嘅領導者。」
阿逸嘅父親，舉行呢場篩選嘅人——挪亞，佟博士平靜咁講。
「我會遵從阿逸嘅遺願，帶你去注射聖體。」佟博士行到鐵門面前，示意我入去。
但係我想繼續抱住阿逸嘅身軀，感受著佢嘅餘溫。
「佢已經死咗，就算你留喺度都無用。」
「點解……點解要咁殘忍？」我忍唔住問。
「啊？」佟博士呆咗呆。
「點解一定要兩個揀一個，一定要面對咁殘忍嘅抉擇……」
「現實就係咁，就算我唔殺佢，佢都會因為糧食問題而餓死，又或者……俾病毒感染變成怪物。」佟博士毫無罪疚感咁解釋，「既然係咁，就由我親手了斷佢。」
「你……無資格稱上人類嘅希望，你只係自私自利，醜惡嘅男人。」我抬起頭，痛恨咁盯住佢。
「隨你點講，疫苗喺我手上，我鍾意點樣就點樣。」佟堇新舉起銀箱，「定係，你想放棄注射聖體嘅機會，同佢一齊死喺度？」
「我……」我合上雙眼，緩緩吐出一口氣，「我會注射疫苗。」
呢個係阿逸佢最後嘅願望，所以我唔會再輕易放棄性命……
如同最初我想放棄性命時，阿逸嘅出現救咗我一命一樣。
「既然係咁，咁你而家跟我嚟，我幫你注射聖體落你身上。」佟堇新向鐵門行入去。
我將阿逸嘅身軀慢慢放落地上，好好咁整理佢嘅臉容，幫佢抹去臉上嘅血跡之後，就企起身抹去臉上眼淚，然後緩緩步入鐵門。
我已經明白，無論我點樣做，都無辦法守護到阿逸嘅性命。
所以我唯一可以做嘅事，就係遵從佢嘅願望，將疫苗打落我身上，然後好好咁生存落去。
我瞓喺手術床上，靜靜咁望住銀色十字架般嘅針筒刺落手臂嘅血管上，一陣冰涼嘅液體注入我體內。
頓時，我感到一片暈眩。
喺意識處於半清醒嘅時侯，我回想起一啲事情。
係倪少賢將我從天台推落平台之後嘅事。
當時我頭部落地，一瞬間感到暈眩，但與此同時腦海忽然浮現出一部分片段——
原來我唔係第一次經歷呢種事情。
好耐之前，我曾經喺相似嘅地方遇上阿逸。
我同佢都係處於絕望之中嘅人，佢因為相依為命嘅母親死去而變得絕望，而我因為……某個原因而對人生感到絕望。
當我想從天台一躍而下時，我偶然遇見佢。
「企喺嗰度好容易跌落去。」呢句係佢當時第一句話。
我愣望住佢，甚至露出非常不悅嘅表情。
既然企得喺嗰度，當然係想做嗰件事先會咁做。
但係下一秒，佢竟然跳上嚟石壆，企喺比我更出嘅位置望住天空。
「你……」我驚愕咁望住佢。
「企喺度的確可以望到天空，但可惜我哋唔係鳥。」佢轉頭望向我，「知唔知人同鳥有咩分別？」
「有咩分別？」我疑問。
「跳出去之後，鳥可以自由翱翔於天空，但人只能夠墮落於地上。」
我好奇咁望住佢，呢刻我先發現佢嘅眼神，原來係同我同類。
「你想死嗎？」佢突然就問。
唔知點解，我好自然咁點咗頭，將心裡面嘅想法話畀佢知。
「喺你死之前，可唔可以畀一個月時間同我做朋友？」佢依然企喺十分危險嘅位置，「一個月之後，我就唔會再干涉你嘅生活。」
就因為咁樣，我哋糊里糊塗咁成為朋友。
而我每日黃昏，都會喺天台上等佢。
佢每一日上到嚟，都會同我講故事。我重記得佢第一個故事，就係講夢世界，佢話佢試過喺夢入面自由控制意識，就好似《愛麗絲夢遊仙境》咁樣。
雖然我知呢啲係哄小朋友嘅故事，但我聽得好開心。
唔知由幾時開始，我期待每一日佢上嚟，然後同我講新嘅故事。
就咁樣，我習慣有佢嘅日子，而一個月亦已過去。
嗰日我如同日常上去天台等佢，但係佢並無出現。
我失落住喺天台石壆上，望住金黃色嘅天空。
「睇嚟佢唔會再上嚟。」
我緩緩企起身，望向下方人來人往嘅街道。雖然手腳感到顫抖，冷汗不停從手掌滲出，但我仍然鼓起最後嘅勇氣。
再見了——
「等等！」一把聲音從身後傳來。
我先驚愕一下，然後按捺住興奮嘅情緒慢慢轉身，望向眼前呢道身影。
「係你……！」淚水已經滿佈眼眶，但我仍然望到眼前呢個人。
佢俯低身氣喘連連，似乎係一口氣跑上嚟。
「對唔住，今日遲咗過嚟。」佢抹一抹額頭上嘅汗珠，「要你久等，唔好意思。」
「我以為……我以為你唔會再嚟！」我掩住嘴巴，但感動嘅眼淚已經忍唔住流下。
「點會唔再嚟呢！」佢慢慢行到我面前，向我伸出手，「我畏高，你企喺咁高我唔夠膽同你講嘢，落返嚟先喇。」
「我……」我垂低頭，抹去雙眼嘅眼淚，「嗯！」
我伸出手諗住捉住佢，但呢刻我唔小心失去平衡，向後倒下！
「喂！」
佢即刻捉住我嘅手，將半空嘅我捉住，但跌落去嗰下衝勁太大，唔單止拉唔到我上嚟，反而連佢都一齊失平衡跌落去。
我同佢喺空中雙雙對視，呢刻腦海裡有個想法——
我唔想死。
之後我就失去意識，醒返之後聽到嘅就係西鐵嘅廣播聲。
疫苗嘅注射已經完成，我緩緩坐起身，但感覺唔到身體有任何變化。
呢個……就係所謂嘅聖體嗎？
「龔夏舞小姐，疫苗已經注射完成，之後我會帶你離開呢度，前往倖存者基地。」企姿端正，身穿軍服，叫做Dylan嘅人講，「我對於佟逸霖先生嘅事情感到遺憾，但我嘅職責係聽從佟博士嘅指令，確保救世者嘅安全，全力輔助你哋逃離呢度。」
「無問題。」我換上Dylan俾我嘅衣服之後，就跟住Dylan離開呢度，前往Dylan所講嘅倖存者基地。
隨著基地嘅門漸漸打開，一片景象映入我眼前。
佟逸霖……呢個就係你想俾我見到嘅景色？
如果係嘅話，我就用我呢雙眼代替你去觀望呢個世界。
之後，我經歷咗大大小小嘅戰鬥，身體變得傷痕纍纍，而末日病毒嘅真相逐漸揭開，真相係有幾咁令人無力。
過咗七年，有好多人喺我面前死去，我亦殺死好多化作怪物嘅同伴。
不過人類嘅情況未到佟博士講得咁淒慘，至少仍有一小部分活著，不過世界嘅大部分依然被怪物佔據。
但至少，人類開始收復失地，而科技仍愈嚟愈發達。
我將黑色斗篷笠上身，遮掩好右半身嘅位置，然後步入某間房間。
「你決定好？你知道結果會點㗎。」
「嗯，反正聖體已經成功被破解，我再唔係唯一嘅特別者。」
「既然你決定好，咁我唔會阻止你。」
「多謝你，Dylan。」
＊
呢七年我經歷咗好多事情，我遇到好多好好嘅人，建立咗一個如同家園嘅地方。
即使喺末日之中，我仍然感到家庭嘅快樂。
非常快樂，係我以前從未感受過嘅快樂。
只不過，我仍然感覺到欠缺咗某啲事物。
唔係和平，唔係平凡，唔係幸福，唔係自由……
而係呢個家園並無你嘅存在。
七年，你嘅臉貌從未喺我腦海中抹去。
我遇過幾個十分師氣嘅男人，包括同我並肩作戰七年嘅Dylan，但當我想同佢哋進一步接觸時，心裡卻停下腳步。
因為我根本無法放得低你。
每當我想前進，你嘅溫柔同體貼，一切嘅回憶就會浮現出嚟。
真係好殘酷。
佟逸霖，呢個係你交付畀我嘅幸福，定係賜予畀我嘅懲罰？
我無法接受。
嗰一日，我哋因為緣份而遇上，你拯救咗我絕望嘅心，之後我哋一同失去記憶，墮入死亡嘅篩選，但你三番兩次奮不顧身救我，終於我哋兩個搏盡一切捱到最後關頭，你卻喺我面前擅自死去，直到最後我都無法報答你嘅恩情。
但係，呢一切仍未完。
我並唔會認命。
如天註定我們走到盡頭，用力撞壞那天門親手自救。
佟逸霖，我一定會救你。
（未完）