[新手寫文] 我的青春歲月

#1 - 我的...興趣?!


「嗶嗶嗶嗶 嗶嗶嗶嗶」

『好嘈呀........』比鬧鐘嘈醒既我以非常強烈既不滿去抱怨緊個鬧鐘。


-7:25AM.-



由起身到梳洗完足足用左15分鐘...呢個時間簡直同我炆屎一樣咁耐。
換好校服 , 再出去廳 , 只見飯台上面比起平時多左塊石化左既火腿蛋三文治，
我心諗一定係阿媽一早就整好留比我做早餐 , 二話不說塞塊治入口 , 拎起書包再著埋鞋就出門口。


-7:47AM.-

老老實實啦 , 我間中學每朝既遲到時間係7:56分 , 而依家就已經7:47啦......仲要一架巴士都冇。
由於身處生死時速既關頭 , 我把口都開始失控喇『老天爺你唔係咁樣玩我下話?我今朝咁早起身都要我遲到?又唔係唔知我遲到要留堂...』
係我自言自語完之後 , 最後滿懷罪惡感咁行左去等的士熱點到等車 , 希望最後既救世主會係一架的士。



當我望到離遠有足足4架的士向住我既方向衝緊過黎 , 我心入面心情非常複雜 , 因為終於救星到 , 點知......
迎面而黎既的士頭兩架已經載左人 , 第三架就比個暗倉金魚佬坐左 , 好在最後一架終於輪到我上車!

準備山埋的士門既時候 , 一隻白雪雪既手捉住道的士門...
係呢個時候我心諗 , "大哥咪玩野啦 , 呢個時間先出現搶車坐?"
下一秒我即刻將視線移去捉住道車門既人身上。

"唔...唔_係掛?!"
我心入面驚訝到不自覺咁講左句粗口


冇錯, 呢一個「半路殺出黎既程咬金」係一個女仔黎 , 仲要係(我)女神...

『呃...唔...唔好意思呀可唔可以同你同車坐?因為我都就黎遲到喇...』呢個女仔臉紅紅膽粗粗咁問我

我用視線打量左佢全身一下 , 佢原來讀我隔離間學校 , 聽聞都好似係同一個時間當遲到喎
『哦...唔緊要啦』講完呢句之後佢就急急腳上左車 , 之後呢一架的士就一飛衝天去。


-7:53AM.-

係飛的既過程 , 呢個女仔一路同我講緊車費方面點比
但其實好簡單 , 將車費分開一半比咪得囉 , 可惜既係事實冇咁完美。
你問我點解? 原因好簡單 , 因為佢唔記得帶銀包......

『咁點算好呀...? 要你比哂唔係咁好喎』



『咁你想點先? 你又要冇帶錢出街』

『呃...我遲啲還番啲車錢比你啦好冇?』

『OK , 但係我地唔會成日撞到喎』

『呃...交換wts留番我聽日還比你啦好冇?』

哇 , 乜而家啲女仔咁大膽咁隨便比電話號碼人既

萌生完呢個想法 , 我就即刻點頭表示讚成佢既方案
最後 , 議案通過! 就係咁我同佢交換左電話號碼 , 與此同時我荷包減左肥......
比完錢落左車 , 佢就一路向佢間學校跑過去 , 仲邊跑邊講「我地wts再傾啦」
就係咁 , 我都跑住咁同佢講句byebye。




-7:55:55AM.-

入到學校門口, 感受完一輪生死時速...事後既感想就係差幾秒我就GG啦...

我如常咁行左入去操場既廁所 , 話哂係中學時期點都要顧一下自己既形象 , 所以我入左去廁所學MK仔咁搞一搞個亂哂既頭。
當我入到去廁所 , 第一眼望到既唔係一班MK男係到搞頭等等...而係地下有舊"黃金"係到

「哇頂咩做乜搞到咁既鬼樣」心入面好大聲咁講左呢句出黎 ,因為實在臭到足以令人當場暈低。
但我都冇理會呢啲"意外" , 照入去搞完頭之後急急腳走佬

番到班房 , 第一件事就係交左功課(我係良好學生) , 之後我就好安心咁坐番係自己個位 , 開始左我呢一日既"夢遊上課"




-1:05PM-

『終於放飯啦頂...』我嘆大啖氣咁講出黎 , 呼, 成身鬆哂!
呢個時候 , 『要唔要去食Subway呀歐家浚?』我既老死黃文傑突然拍住我背脊咁問我

不過我就咁答佢『唔係呀 , 食拖鞋包? 唔去!』
就係咁我拒絕左佢既邀請 , 因為我係呢個時間仲要落教員室搵班主任填番啲資料 , 而個啲資料就係我入學個陣一直未填好既個人資料

落到教員室 , 阿sir塞左張個人資料收集表比我之後就趕左我走 , 要我聽日朝早番學個陣再交比佢

於是我就因為推左傻仔傑而冇人陪我食飯之下 , 獨留係小食部求其買左啲魚蛋撈麵就番左上班房自閉。

班房每到放lunch既時間就會由30人減至1人 , 姐係得番我自己一個。

終於得番我自己一個......左手手機右手魚蛋是常識吧?!



當我一打開手機 , 再開番個上網 , 我嚇到噴哂我口入面麵出黎
『死啦!!...一直冇左件事...』我講既係指今朝早個女仔話過一陣會wts我...而呢個一陣...我完全無視左。

「hi  8:10am.」
「喂喂 8:14am.」
「有冇人阿? 8:23am.」
「好啦喎應機啦!(嬲表情) 9:30am.」
「係咪唔要錢啦啦啦!? 10:00am.」
「... 10:02am.」
「好鬼悶阿上水啦 10:15am.」
「頂你!! 10:30am.」

係呢個時間 , 我已經唔想再睇落去佢究竟炸左我幾耐wts同埋有幾嬲我...
總之 , 道歉最緊要!

「唔好意思呀對唔撚住呀,因為我熄左上網所以冇理你 , sorry><!!!  1:20pm.」

我感覺到我已經比左個最壞既印像佢...呃...大獲啦!唔小心手快快打多左個粗口字落去...
呢個時候我塊臉已經青到冇得再青...

就係咁,我一直等佢既回覆,不知不覺間已經等到放埋學...佢終於...

「哼  3:57pm.」

睇黎我...激嬲左佢?!