周六下午, 老人院內, 詠欣又黎探我老媽子, 「婆婆, 今日精神睇黎唔錯咁喎, 係呢, 聽頭先啲職員講, 話妳遲啲每馮假日就會番返屋企度住, 咁咪好囉!」 老媽子笑住咁答, 「係呀, 我都估唔到個仔可以咁叻, 轉左工之後咁快又話升職, 而佢個老闆又好好人, 好似唔知點又幫佢買左層樓咁, 唉, 我都唔識得點講, 總知佢話遲啲入伙之後就點都要我去果度住吓咁, 呀, 佢好似而家黎緊, 一陣或者妳會見到佢嘅!」

詠欣聽到咁, 亦好期待咁想見吓婆婆口中經常提到果個孝順仔究竟係點樣, 我已經黎到老人院門外, 職員向我示意老媽子正響出面草地之處同人傾緊偈, 我快步向住出面草地方向行去, 我望到有個女仔正蹲左響老媽子嘅輪椅旁邊, 老媽子望到我, 「偉倫, 你黎左嘞!」

個女仔聽到老媽子叫我之後即時就抬頭望一望我, 「哦, 係詠欣黎嘅!」 詠欣而家終於知道期待已久嘅孝順仔居然會就係我, 見佢即時板起塊面咁就起身, 「婆婆, 我有啲事, 我都係走先嘞!」 詠欣已經急急腳咁向住老人院門外方向走去, 我上前拍左老媽子隻手一吓, 「老媽子, 一陣我先番過黎睇妳!」

我追左出去, 詠欣走得好快, 但我亦好快咁就追到佢, 我一手就捉住佢隻手臂黎嗌住, 「詠欣, 唔好走住….」
 
但詠欣就好嬲咁嘗試 fing 開我嘅捉住, 「唔該縮開你隻手呀, 我同你好似已經無咩野好再講!」
 




我繼續捉住詠欣隻手黎講, 「詠欣, 我….」
 
詠欣雙眼已經泛紅, 「好嘞喎, 你再唔縮手嘅一陣費事我會打三條九黎話比人非禮同強姦呀, 係, 我無老母教我排隊, 我係八婆, 係我累你無左份工, 你應該仲係好憎我至係架, 點呀? 咩你唔係好想打我嘅咩? 咁我而家就企響度比你打, 等你打到滿意為止之後我先至走, 咁你滿意未吖?」

一面淚眼同憤怒嘅詠欣正怒視住我, 我唔知再點講至好, 「詠欣, 唔係咁架, 我….想同妳講聲多謝至真, 我嘅情況我估妳表姐倚麗已經話哂比妳知, 係, 無錯, 我曾經係好憎好憎妳, 但當我知道係妳托妳表姐介紹份工比我之後, 同埋我亦知道之前妳咁對我係純屬一場誤會, 所以我而家已經無再嬲妳, 相反, 我其實應該係要感激妳至真!」

我響銀包度攞左當時叫我去見工果封暱名信出黎, 「呢封信, 係一個令我改寫下半生嘅人寫比我嘅, 我每晚都望住呢封信, 希望有朝一日我可以親口對住寫呢封信比我嘅人講聲多謝, 更甚嘅, 無論呢個人佢將來要我點做, 我都會將呢個人情還番比佢嘅!」

詠欣淚眼咁望住我手上封信, 突然, 佢一手就搶左我封信之後再撕爛左佢, 紙碎散滿響地, 詠欣再怒目咁同我講, 「唔使嘞張主任, 我咁做只係比番一個交待自己, 而我亦唔需要邊個還我人情, 以後我同你亦無拖無欠, 唔好意思, 我以後亦都唔想再見倒你呢個人!」 講完, 詠欣即時轉身就急步走左出去。





我呆企左一陣, 跟住我就番返入去老媽子身邊度, 老媽子好緊張咁問我同詠欣到底發生左啲咩事, 而我亦將我同詠欣之前嘅事講哂比老媽子知, 老媽子聽完之後對我地之間搞成咁亦顯得有啲無奈。
 
第二十一章圖述
 

 
詠欣含淚地離開老人院