呢晚, 倚麗同詠欣傾緊電話, 傾左一輪之後, 「係呢表姐, 偉倫呢排係咪好忙咁呀?」 「佢? 都幾忙吓架, 而家佢跟緊公司個大客啲野, 呢排多數都要出去做野, 做咩呀? 突然咁樣問起佢嘅? 係喎, 妳地兩個響中環段片, 全公司啲人睇完之後都笑緊佢, 就連老細睇完都笑到爆咀, 你又係嘅, 無端端落中環飲咩野悶酒呀? 而且仲差啲比啲鬼佬…, 唉, 妳以後唔好再係咁嘞!」 

終於到左我嘅新居入伙嘞, 而家啲新樓, 基本上都已經有哂所有嘅裝修同基本電器響度, 而我亦只係需要買番啲傢私入去就可以即刻住得架嘞, 如呀媽所願, 我呀姨亦將會響鄉下落黎幫手照顧佢地兩老, 入伙之後, 呢一晚, 我企響房內一個人欣賞住呢個咁靚嘅維港夜色, 再諗番起我咁多年黎嘅屋村生活, 到而家我居然可以響呢度嘅豪宅黎居住, 果然真係有啲仲似發緊夢嘅一樣咁。

「詠欣, 詠欣…」 同事正嗌住詠欣, 「做咩好似發緊夢咁呀? 係咪響度諗緊男仔定呢?」 「黐線架, 做野啦!」 詠欣經過果日響商場見過我之後, 佢就好似比我見客時果副專注樣吸引住左佢咁, 而平時佢亦經常響手機上重溫番我地響中環嘅果段短片, 詠欣望住部手機, 手指正想準備打訊息比我嘅時候, 但等左一陣, 詠欣最終都係放棄而按番去屏幕主畫面果度。 

但突然, 詠欣個手機就響起訊息嘅提示,  “李小龍想問滅絕師太今晚有無空一齊共飯呀?“ 詠欣睇完之後即時笑得好甜咁就按住回覆嘅訊息話, “滅絕師太好勉強地話無問題, 咁李小龍想去邊度食飯咁呀?”’

收工之後, 我同詠欣就約去左老尖嘅重慶森林上面啲咖喱舖度食咖喱, 呢一晚, 我同詠欣兩個都食得好開心咁, 「啲包係要浸下啲咖喱咁食架!」 「我夠知咯, 白痴仔!」 「但係我見妳響度搽緊牛油咁嘅?」 「我鍾意呀, 關你鬼事呀?」 嗱, 我地係咪好開心呢?





「喂, 師兄, 咩咁啱呀?」 一班人正同我揮手打住招呼, 我向番佢地揮手回應住, 詠欣隨意咁問我, 「係你啲朋友…」 我答佢, 「係我以前響屋村做跆拳道助教時嘅一班師弟黎啫!」 詠欣不屑咁唏左一聲, 「你係跆拳道助教? 但上次我見你打架打到成隻蛤蟆咁, 真係搵鬼信你呀!」 

我笑住咁做住一副得戚樣, 「上次其實只係想氹番妳開心, 所以我先扮吓低能仔咁啫, 話妳知吖, 幾年前我已經打過區制公開賽, 而且仲攞過亞軍添, 所以上次如果我係真打, 果幾個醉貓一早就已經瞓哂響地下度啦!」詠欣繼續咬住塊包無出到聲。

食完咖喱之後, 我同詠欣就去左尖東海旁度漫步住, 海風吹得我地好舒服, 但我同詠欣又再好似唔知要講啲咩先好咁, 兩個人就只係靜靜咁一路向前黎行住, 詠欣邊行住, 邊比啲海風吹住佢把頭髪亂哂, 見佢不斷係咁撥住秀髪, 行左好耐, 我地依然都係得個行字, 兩個人都好唔自然同唔知想點咁, 行多一陣, 詠欣終於都開口同我講, 「偉倫, 都…好夜嘞, 我睇我都係要走先嘞!」

吓, 咁快? 唔好啦, 我啱啱先enjoy 緊呢個唔知想點嘅 moment, 但詠欣咁快就同我講話佢要走先, 我開始有啲心急咁同佢講, 「詠欣, 我…..」
 
詠欣等緊我嘅繼續, 「我…..」
 




已經去到喉嚨邊, 但就硬係摞唔出果幾個字, 已經谷到我面都紅哂咁, 「詠欣, 我…我…我….」
 
我吸左一大啖氣, 心想呢舖死就死啦, 跟住我就用左急口令式嘅速度黎講左呢一句真係好難講得出口嘅說話, 「詠欣我鍾意左妳!」

詠欣聽完之後, 見佢塊面居現出現一副唔知點形容嘅表情, 跟住佢就開始一面嚴肅咁同我講, 「偉…倫...夜嘞, 有啲咩…不如留番我地下次先再傾啦, 我…都係走先嘞, 拜拜!」 

講完詠欣佢就真係好快咁走左去, 唉…衰左嘞, 我極度後悔真係向佢表白左, 望住詠欣嘅背影已經遠去, 而我就呆呆咁坐左響海傍邊嘅地上, 我點左支煙, 望住對面中環嘅夜景, 呢刻我個心就真係覺得有啲覺得慢火好地地, 猛火煲燶水嘅感覺。
 
第二十六章圖述
 





 
真情表白, 但詠欣就拂袖而去