電話打極都仲係唔通, 淑嫻已經急到唔知點算至好, 朗奴見到咁之後就問淑嫻, 「小姐, 我姓陳嘅, 係偉倫嘅上司, 唔知妳搵偉倫咁急係有啲咩事咁呢? 或者睇吓我可唔可以幫到妳手咁吖!」 淑嫻響度心諗, 姓陳, 朗奴, 偉倫嘅上司, 咁唔通佢就係頭先班人講果個朗奴陳?

淑嫻開始甩甩卡卡咁講左大約嘅事情出黎, 但就好明確咁講出偉倫將會比人打嘅呢件事, 「我都唔識得點講, 呀, 頭先我一聽到佢地講偉倫嘅時候, 我就偷偷用部手機錄低左佢地嘅對話, 而家雖然部機爛左, 但啲對話應該有儲左響張卡度嘅!」

淑嫻講完之後, 跟住就響部爛左嘅電話入面掹左張記憶卡出黎比朗奴, 淑嫻正一面痛苦咁再同朗奴講, 「陳生, 無論如何你點都要幫吓偉倫先呀!」 警車已到, 好快, 淑嫻亦比白車送左入去醫院度。

經檢查過後, 淑嫻除左表面擦傷左之外, 右面大腿骨亦有輕微骨折現象, 第二日, 朗奴安排淑嫻轉去私家醫院度繼續再接受治療, 呢一日下晝, 病房房門響起叩門聲, 「郭小姐, 今日妳嘅精神睇黎似乎好左啲咁喎!」 「呀, 係陳太妳呀, 妳好!」

因為淑嫻個電話爛左, 倩宜特意買過一部新嘅電話黎比淑嫻, 就當係作為賠償之意, 倩宜同淑嫻講,「係呢, 聽朗奴講, 話妳原來係偉倫以前嘅女朋友黎嘅, 咁唔怪之得妳係會咁緊張偉倫佢啦!」 了解左淑嫻嘅傷勢之後, 倩宜跟住就再問淑嫻, 「係呢淑嫻, 請恕我多口咁問句, 其實點解妳會響果啲地方度做事咁嘅呢?」



淑嫻唉左一口氣, 跟住就將自己同偉倫嘅過去直到現在, 一五一十咁話哂比倩宜佢知道, 講到傷心之處, 淑嫻亦不禁流下兩行眼淚, 倩宜聽完所有之後, 跟住亦對淑嫻嘅遭遇感到深表同情, 「聽妳咁講, 妳媽媽其實都應該要立即入醫院度做手術咁喎!」

淑嫻無出到聲, 因為佢都知暫時根本就無能力咁去做, 倩宜望住眼前正一面無奈嘅淑嫻, 兩個人都靜左一陣, 淑嫻開始將舊電話張 sim 卡插左入部新電話度, 但都唔使一陣, 淑嫻個電話就已經響起左。 

「呀爸, 係呀, 我…我個電話啱啱跌爛左, 但而家已經換左部新機嘞, 吓, 呀媽成晚個心都痛得好犀利, 咁佢而家點呀? 我而家?  我而家過唔到黎住呀, 呀爸, 你可唔可以告住假先帶呀媽去急症室度, 我…, 呀爸你唔好鬧住我先啦, 我而家真係有啲事行唔開住呀, 呀爸…., 呀爸…..爸…」

已經收左線, 淑嫻跟住就流住眼淚, 諗左一陣, 淑嫻居然想起身落床, 「淑嫻, 妳想做咩呀?」 「陳太, 我….我要陪呀媽去急症室, 我….呀...」 淑嫻腳痛到連企都企唔穩, 倩宜即時扶住差啲就跌到嘅淑嫻, 「陳太, 我真係要出去陪呀媽去睇病呀, 我驚…我驚今次如果唔去, 我可能會無機會再見到呀媽佢架嘞!」

淑嫻開始有啲激動, 倩宜見到咁, 個心亦都有啲嗱住, 「淑嫻, 妳冷靜啲先啦, 我都好明白妳而家嘅心情, 唉…..,  咁啦, 妳始終係偉倫以前嘅女朋友, 既然係咁, 咁妳媽媽嘅手術費方面, 我諗我可以先暫時幫妳墊支住….但不過….」



淑嫻好緊張咁等住倩宜嘅繼續, 「不過….我想妳先應承我一個條件, 就係以後都唔好再響果啲地方度工作, 我要妳還比我嘅錢都係要靠自己努力咁去賺取番黎嘅, 唔知妳肯唔肯應承我咁呢?」 淑嫻聽到之後, 跟住就諗都唔諗就好堅定咁向住倩宜點頭應承。. 

倘大嘅辦公室內, 正一面神色凝重嘅朗奴, 正再重聽住淑嫻張卡內嘅錄音之後, 內線電話按住, 「倚麗, 妳入一入黎我間房度先!」 倚麗入左房後, 朗奴即時就問住倚麗, 「倚麗, 妳對妳表妹詠欣個前男友國宏嘅事知道有幾多咁呀?」
 
第三十一章圖述
 


淑嫻正一面擔心媽媽的病況