【內心獨白散文】《陋室手記》: 〈成熟。幼稚。〉

〈成熟。幼稚。〉
 
我渴望成為成熟嘅人。原來呢個先係最幼稚嘅諗法。
 
入大學嗰時，最令我困擾嘅莫過於想成為成熟嘅人，但係我對「成熟」嘅定義毫無認知。
 
我估計成熟嘅人嘅言行、談吐、舉止都係經過深思熟慮嘅，唔會草率行事。我認為成熟嘅人係會為別人設想嘅，富同理心嘅。佢哋嘅知識、才能和智慧都遠遠喺我之上，令人望塵莫及。
 
我嘗試成為呢種人。冷靜、才德兼備、有智慧、擇善固執、心思細密、特立獨行……總之就係一切美好素質嘅結合體。
 




我偏好淨色衣服，唔係黑色、灰色，就係深藍深綠色。我挺直腰背，精神奕奕，寡言慎行。只要聯想到有關成熟嘅，就會嘗試去做。我強迫自己成熟，渴望成為能夠被依靠嘅人。
 
我相信自己非凡，唔想落人俗套。我想比同學早起步，以便提早得到成功。我想父母為我驕傲。我想有更多金錢，唔會受財政束縛。我想做其他人難以達成嘅事，然後喺大眾面前振臂高呼。
 
我唔想再俾人好似細路噉呵護。我唔想處處受命令制肘。我唔想睇起嚟笨頭笨腦笨手笨腳笨嘴笨舌。我唔想其他人睇見我嘅脆弱。我要更強大。我要為人妒忌。我要與別不同。
 
內心嘅熱情促使我改變，改變使我更相信自己踏上正途。彷彿下一瞬間，蝸牛就要爬上山頂，觀賞燦爛嘅晨曦！
 
然後社會跟我講，金錢、權力、競爭先係成熟嘅表現。成熟就係賺多啲錢，就係做專業人士或者管理層，就係力爭上游、刻苦耐勞，就係接受痛苦同凌辱都要逆來順受。除此之外都係幼稚嘅表現。
 




到而家我仲搞唔清楚何謂成熟。對我嚟講，成熟嘅人呀！都不過係盡力掩飾自己幼稚嘅小丑。
 
佢哋依然魯莽行事，不過懂得合理化自己嘅行為。佢哋依然小器妒忌、心胸狹隘，但喺其他人面前假裝親切友善、胸襟廣闊。佢哋說話婉轉，話中帶刺，借意攻擊其他人但又以為其他人唔知。佢哋待人以禮、恭敬唯諾，不過怕被批評責難。佢哋表面大公無私、熱心助人，但只為滿足內心嘅乾涸。佢哋貪小便宜，積埋積埋做過數唔清唔道德嘅事。
 
所謂成熟嘅人，只係識得掩飾內心幼稚嘅人！將面具除落嚟，咪又係會喺公園度跳飛機，踩搖搖板，玩得比細路仲開心！大概係因為幼稚，先會想更成熟；亦因為幼稚，先唔能夠成熟。
 
所以，我放棄咗。每個人喺唔同嘅成長階段都有唔同嘅困難同挑戰。糾葛喺成熟同幼稚之間根本毫無意義。就等我繼續做個大細路。