【內心獨白散文】《陋室手記》: 〈後記〉

〈後記〉
 
寫到呢度，實在諗唔到仲有咩可以寫，所以先係到完結。
 
話說陋室手記概念起源，喺來至杜斯妥也夫斯基嘅《地下室手記》。上年年尾，我一直好沉迷睇呢本書，仲有太宰治嘅《人間失格》、《斜陽》，卡繆嘅《異鄉人》等等。
 
嗰時開始引起我對人與存在嘅反思，但思緒仍然十分混亂；直至今年年頭忽然諗到，如果有一個現代版嘅地下室人，佢會係一個點樣嘅人物呢？然後我就開始着手設計人物。
 
現代嘅地下室人，我覺得似係眾人口中嘅隱中，又似係廢中，又似係宅佬……結果我發現根本無一個現代嘅形象可以代表地下室人，因為呢個角色實在太生動，太獨特，太不受限制。我認為地下室人係具有時代性嘅小人物形象，當中內心嘅矛盾同掙扎，同時可以喺你我身上發現。
 




所以我就用一個平凡到不得了嘅人作為構想中嘅現代版地下室人，再以我觀察到年輕人嘅內心矛盾，開始着手集中描寫年輕人面對社會嘅心理。一切慢慢變得明確，然後Ho Yin Fung呢個人物就開始成形。
 
當然呢約30篇散文文筆一般，寫作風格亦十分飄忽，內心描寫亦未見精緻，內容比較片面，因此我都唔太滿意。不過創作心理描寫嘅文章實在對自我，對他人，對社會作出更多反思，彷彿自己內心都得以釋放。
 
經過30篇文章，我發現而家自己已經冇咩想寫落去。我開始覺得厭倦，或者已經成長，大概係時候嘗試其他文章創作。

2018／4／4