【愛情】《我要征服處女座》: *【兩週年特別篇】*

話咁快寫小說已經有兩年，慶幸嘅係當日動筆開始寫《我拾到一本魔法筆記》嘅熱誠同埋興奮依舊係到。

感激當初 紙言 比咗一個平台我開始寫作，令我可以慢慢堆砌自己嘅世界，令我有一個地方可以慢慢進步。

最近呢一年我曾經用大半年嘅時間投放咗去義工、打波上面，曾經放低過寫作、曾經覺得好難再寫好一個故事、曾經有一段時間完全唔知自己寫緊咩......

值得高興嘅係我始終冇放棄寫作，寫作依舊係我生命中好重要嘅一部分。

感激呢段時間默默支持小弟嘅讀者們，你哋每一個鼓勵、留言等等我都睇在眼裏，衷心多謝大家，如果冇大家嘅鼓勵，我可能就捱唔過嗰半年嘅迷惘時期。



值得感恩嘅係呢一個月小弟嘅少女時代系列中第一季《彼此最遠的距離》終於比人重新發現，因爲呢一個故事係我一直好想比大家睇到嘅故事，希望會比到大家一個難忘嘅回憶。

BTW，好多人問我點解要會想寫 sad end ，而我覺得現實世界當中既然唔會全部都係 happily ever after ，咁大家亦要識得面對一啲悲情結局，從中有所得着先係最重要嘅事。

睇我故事嘅人大多都係因爲少女時代系列，所以新嘅一年我希望除咗呢個系列之外仲可以寫多啲唔同嘅故事，突破下自己舒適圈。同時希望自己嘅文筆同描述、結構等等都可以有所突破，每部作品都盡力寫好。

小弟都希望透過呢篇文勉勵一啲努力打文嘅巴打們，要謹記寫作嘅初衷，堅持努力落去定會有自己嘅一片天空！

最後作個總結，好多謝各位一路嘅支持，無論你睇完我嘅故事之後會成爲過客定繼續追落去都好，感激你曾經讀過我嘅故事，尤其單單呢一個月紙言就有過十萬瀏覽量，最瘋狂嘅仲可以單日六千瀏覽量，的確令我受寵若驚，十分感恩。



打完呢個特別篇嘅我就會繼續翻去寫作世界，歡迎大家留低、接受大家離開、感恩曾經存在。

謝謝大家。