[絕對無糖分]就係咁，我搬左入一幢充滿一樓一嘅唐樓: １９　一對老夫婦

已經係舅父到住左兩個星期，已經有少少習慣，我習慣嘅意思唔係講緊習慣ｄ同屋主，而係開始習慣日日著到通緝犯咁樣落街……無錯，呢個習慣係有ｄ怪，但無法啦，仲未諗到一個更好嘅方法嘛。

而係度住左兩個星期，都開始見識到點解一樓一仲存在係呢個社會入面，你地平時行街果陣，可能唔會覺得有呢ｄ地方，甚至可能以為得旺角、廟街呢ｄ地方會有，但係當我知道原來只要幢樓門口掛左支紫紅色光管，果度樓上實有一樓一。

我真係咁大個人，到搬入黎舅父呢度住先知，呢兩個星期，有時同朋友去行街，一見到呢ｄ光管先知道，下！？原來呢ｄ咁嘅地方都有架。

仲有，唔好以為人流唔多，呢ｄ係睇時間架咋，有時我返晏３點幾果陣無咩人係ｄ樓層停留，但一到放工時間６點或７點果陣……頂你啊，樓梯總有一兩丁友係度一邊睇電話一邊等緊，巷入面仲有大把人行黎行去咁，聽提子哥講，呢ｄ俗稱「洗樓」ｗｏ。

我真係見過最旺果一日，ｄ人真係好似輪街證咁排埋隊添架……



咁有旺場當然有淡場啦，如果朝早落街，條樓梯就無咩人嘅，通常都係得ｄ清潔姐姐係度洗下地姐，而舅父都有租ｄ住房比ｄ姐姐仔，不過都係果幾個，其中一個就係好似我ＡＶ女神篠田嘅彩虹姐、有個智力有問題媽媽嘅Ｇ奶ＬＩＬＹ同埋佢媽媽，仲有另外兩個分別係果晚著護士裝果位ＶＩＶＩ，同埋佢拖住果位粒聲都無嘅女人。

係啊，佢都係做一樓一架，個名叫小雨。

而亦都因為早晨唔會有咁多人，所以呢排我返工果邊，都盡量編晒ｄ早更。

小春條友都竟然將自己轉晒早更，咁佢個理由同我好唔同，佢話因為班姐姐仔係晏就開工，咁佢情願返朝早同凌晨更，放工返黎可以放便佢運動ｗｏ。

我就真係唔信佢返完工仲有精神做呢ｄ野。



所以今日，又係早更，我好快咁換左果套落街衫，然後拎多另一套便服出黎袋係個背包度，制服？我已經好醒水咁放左係做野果邊，橫店以後都要換黎換去，都係返到去先換。

著好衫後就落樓，而行到去彩虹姐果一層時，我見佢已經開始準備開工。

「蕃薯仔，今日咁早啊？」住左兩個星期，同我最熟絡嘅都應該係彩虹姐。

「……係啊，今日返早。」但係面對自己個ＡＶ女神，都係仲有少少怕羞。

而彩虹姐見到我反應，都笑左一下話：「都住左兩個星期，見到姐姐我都仲會面紅嘅。」



我傻笑左幾聲後話：「係呢，妳今日都咁早嘅，平時呢個鐘數，妳應該未駛開工住架ｗｏ。」

「今日有個早客嘛，唔講住先拿，應該就到。」彩虹姐話，然後同我ｓａｙ　ｂｙｅ後就返入房。

我望住佢個房門，果個「請按鐘」反左過黎，就表示佢今日正式開工。

而我都繼續落樓，落到樓下，迎面見到一對老夫婦朝住我呢邊行緊過黎。

我下意識咁低一低頭，係佢地經過我果一刻，我聽到佢地嘅對話。

「好快到架拿，你好快見到佢。」婆婆話。

「係未架？」伯伯話。

「我幾時有呃過你姐。」婆婆回話。



我行多左幾步，不禁好奇地望一望背後呢對老夫婦，剩係見到個老婆婆扶住位伯伯，慢慢行入我所住果一幢充滿一樓一嘅大廈。