[絕對無糖分]就係咁，我搬左入一幢充滿一樓一嘅唐樓: ３３　一對玉佩

「唔駛……掛？」我答婆婆，然後婆婆又笑左下話：「點解答得咁唔肯定？」

我傻笑左下話：「我Ａ０黎。」

「咩係Ａ０？」婆婆問。

「姐係未拍過拖。」我答。

然後婆婆拍一拍佢旁邊個空位，示意我坐低，我坐低左之後，佢就問：「無拍拖姐，但有無一個愛嘅人？」



我心入面諗起澧琳……「算有掛。」

「咁如果有的話，你會唔會死纏難打咁成日煩你愛果個人？」婆婆問，而我回想左我同澧琳嘅經歷，「……都無，都係好自然咁傾計，但當然佢肯同我傾果陣，我好開心啦。」

婆婆會心微笑左一下，「咁你都算係一個懂得去愛嘅人。」

我不明所以咁望住婆婆。

「如果愛一個人，你係會著緊佢、擔心佢、保護佢，而唔係控制佢、約束佢、監視佢。就好似見到一朵好靚嘅花果陣，唔應該採摘落黎自己擁有，而係應該細心照料同栽種，保留佢呢份美，呢Ｄ就係鍾意同愛嘅分別。我愛我老公，就係因為佢重感情，如果我因為佢腦退化後唔記得我要去搵初戀情人呢件事，阻止佢、禁止佢的話，咁就違反左我愛佢嘅初衷，咁就唔係愛。」婆婆話。



究竟，究竟係因為婆婆有足夠人生歷練先可以咁大方或懂得愛，定係真係有人可以一早做到咁？

而我對澧琳又係邊一種？鍾意佢？愛佢？定係兩者都有？

「等你真係能夠為一個人去放棄一件事果陣，就知道咩野係愛。」婆婆語重心長咁話。

「但係……伯伯係你面前講初戀情人果陣，妳個心真係唔會有痛嘅感覺？」我又問，而婆婆又係微笑左一下話：「會架，但呢種痛，都係我對伯伯愛嘅一種感受，佢呢一種痛係能夠用佢帶比我嘅愛去抵消。」

唔知，我到幾時先有婆婆呢一種功力去愛一個人呢？



坐左一陣，婆婆電話響左下，應該係有ＭＳＧ，婆婆睇左電話後，就同我講：「彩虹話可以去接我老公，一唔一齊行？」

我點一點頭。

係返去路上，婆婆將佢幫伯伯搵菁菁嘅野講比我聽，原來除左搵菁菁外，其實婆婆同佢Ｄ仔女都一直搵緊另一樣野。

「我老公同佢初戀情人菁菁係以一對玉佩做定情信物，老公果塊仲ＫＥＥＰ得好好，本來我想係佢有生之年搵埋另一塊，但係睇黎機會都好細……」婆婆有講得有Ｄ黯然。

見住婆婆接完伯伯走後，我返上樓，打開自己電腦，心入面諗，我究竟點樣為呢一對老夫婦做Ｄ野？

然後，諗到一個方法，雖然唔知得唔得，但做左先實無壞。