[絕對無糖分]就係咁，我搬左入一幢充滿一樓一嘅唐樓: ４０　淑芬

我同彩虹姐，跟係婆婆同伯伯個大仔身後，而佢地兩個跟住……道士？師父？其實我唔知點稱呼，總之我地幾個行左去靈堂後嘅一間房入面，而呢間房，係放住一副棺木，而棺木入面，係伯伯嘅遺體。

果位……唔知係道士定師父嘅人同我地講：「記住ｄ眼淚唔好整到先人遺體啊，唔係先人走都走得唔安樂架。」

但其實諗深一層，會唔會係乾淨問題呢？呢一點我無再考究，我只係靜靜咁企係旁邊，望住仍然喊緊嘅婆婆同彩虹姐。

「老公，你睇下邊個黎左。」婆婆淚眼望住伯伯話。

「我啊，菁菁啊。」彩虹姐話，我諗佢想用菁菁呢個身份去送伯伯最後一程。



房間內好靜，除左冷氣機聲外，只剩下啜泣嘅聲音。

收拾緊化妝品嘅化妝師見到此情此境，就話：「我諗伯伯知道咁多親人送佢最後一程，實好開心，你地睇伯伯個樣，笑的好開心好慈祥。」

我望向伯伯，雖然佢臉上已經無咩血色，但就同個化妝師所講嘅一樣，伯伯真係笑得好開心好慈祥。

然後，婆婆將個裝住玉佩嘅木盒放左入棺木度，仲話：「菁菁話，將呢對玉佩送比你，估唔到對玉佩搵左咁耐都搵得返，你去到果邊，記住搵返菁菁，送返玉佩比人啊，知道未？」雖然呢句有少少前後矛盾，但睇得出，婆婆係好真心講呢句說話。

婆婆放低左個木盒後又話：「好多謝你用左半生去陪我，我知道你係真心去愛我，我感受到架，所以我祝你係另一個世界，都可以搵返菁菁，同你一生最愛嘅人再共渡過。」



婆婆呢一段話，好似叮囑咁，佢大仔聽到後，喊住咁笑話：「老豆佢仲要投胎架。」

「……咁投胎前一齊都好啊。」婆婆回應，令到我地在場嘅人破涕為笑。

完結，終於完結，我地離開左靈堂，係一個專買豬雜面嘅地方食野。

呢餐食得好靜，就連比錢果一刻，坐車返黎果一刻，到樓下果一刻都一樣，我第一次同其他人一齊返到呢幢充滿一樓一嘅唐樓，跟係彩虹姐嘅身後面，慢慢上樓。

行到彩虹姐架步嘅樓層，「我到拿，蕃薯仔，今日辛苦你。」彩虹姐話。



而我回應：「妳都係啊，早Ｄ休息啦，彩虹姐。」只見彩虹姐遲疑左一下，然後口中默念，「……彩虹……彩虹。」佢行返自己門前，然後話：「其實我個名叫淑芬。」

我靜左幾秒……「芬姐，早Ｄ訓。」我話。

而佢又笑左笑後同我講：「都係聽慣你叫我彩虹姐，淑芬又好，彩虹又好，菁菁又好，最緊要係，我知道我做嘅野無錯。」

我對住佢，點一點頭，「嗯。」

「你都早Ｄ訓拿，晚安。」講完呢句嘅彩虹姐，就返入自己架步。

而我，就望住彩虹姐架步度門話：「今日辛苦妳做左一日菁菁，芬姐。」