[絕對無糖分]就係咁，我搬左入一幢充滿一樓一嘅唐樓: ６９　人生的第一次

－－－－　回到現實　－－－－

「咁姐係呢個叫薇琪嘅女仔搞成你而家咁？」我問。

「……係囉……係囉。」小春邊食住野邊講。

而男神ＫＩＮＧ笑左笑話：「唔係，唔太關呢個女仔事。」

「唔太關？」我又問。



然後，男神ＫＩＮＧ就繼續回到過去……

－－－以下用男神ＫＩＮＧ第一身角度－－－

到而家呢一刻我個腦都係一片空白咁……唔係，應該係話接近一片空白，因為腦入面而家只有校長、薇琪同私生女三個字。

原來因為佢係校長個私生女，所以佢呢種學生都入到呢一間學校。

我就係個腦一直咁諗，一直靠自己意識返到屋企，到入到門口果一刻，我都未知我返到去，係我阿爸大喝一聲：「都講左入屋一定要叫人！一定要除鞋！」



就係我阿爸嘅家教嚴將我叫返醒，我嚇左一跳咁望住阿爸，然後好快咁除左鞋放好，再講：「阿爸阿媽，我返到屋企。」

阿爸望實我，由上而下打量左我一下……死火！唔通今日老師講左果件事比阿爸聽！？如果係呢次實死得人！

但好彩……「古古怪怪咁，快Ｄ去沖涼換衫溫習，食飯果陣就會叫你。」阿爸同平時一樣，咁我都無咁驚。

我沖完涼換好衫後，就拎住書包返房做功課，係開書包後果一刻，我成個人靜到硬晒……因為，我見到薇琪果條好少布嘅白色底底飄左出黎，仲跌左係地上面。

大鑊！！！我即刻關左道房門，然後拎起果條底底，坐係床邊，四圍望下間房有邊度可以收埋呢條底底。



「送左比你就收好佢，日日帶住，唔好唔見啊，如果比我知道你無帶起身，我實有好多方法整死你。」

薇琪呢句說話又係腦中響起，令我突然打消左收埋底底嘅衝動……我望住條底底，突然間，腦海又閃出左另一個諗法……

唔知條底底仲有無味呢？

ＳＨＩＴ！有無搞錯！澤天仁你呢個思想真係可恥啊！枉你成日讀道德經！枉你讀聖賢書！你邊可以有呢Ｄ諗法架！你仲對得住阿爸阿媽呢幾年嘅養育之恩咩！

……但係……但係我腦入面雖然不停彈出呢Ｄ驚號，不過行動實際起上黎真係擋都擋唔住，條底底慢慢接近我個鼻……１０ｃｍ、５ｃｍ、１ｃｍ……直到，我鼻頭碰觸到底底嘅軟滑布料，聞到嘅係書卷味……

咦！？書卷味？點解係書卷咪㗎！？

我望一望放左係旁邊個書包……頂！一定係放左係個書包成日，吸晒Ｄ味啦。

……等等，點解我會有頭先果一刻嘅衝動㗎，我又細到大，都無試過好似頭先咁，慾望超越理智，唔通我變左個變態！？



就係呢一刻，房門突然比人敲起，「囝囝，做咩關左道門？」

係阿媽！？

我成個人彈返去書枱前面，當然仲將薇琪條底底塞左入自己個褲袋啦。

「無……無啊。」我答，然後媽媽推開左門。

佢行到我旁邊，摸一摸我個頭話：「頭先聽爸爸講，話你神不守舍咁，係未讀書大壓力啊？」

「無……無啊。」又係同頭先一樣嘅答案。

「無就好，我今日煮左你鍾意食嘅野，等有得食就叫你出黎，你乖乖地做功課啊。」媽媽講完後就出返去。



然後，我呼出一口氣，係一個意味住「好彩無比人發現」嘅呼氣，呢個感覺，係我一生中第一次有嘅感覺。