[絕對無糖分]就係咁，我搬左入一幢充滿一樓一嘅唐樓: １１０　可能？

當結識ＶＩＶＩ後，我發覺我同佢有好多相似嘅地方，好鍾意睇港劇、港產片、聽粵語歌，而且，識耐左知道佢以前都成日比人欺凌，無咩朋友。

「唔知啊，總之第一眼見到妳，就好似好熟識咁，好想同妳做朋友，係以前無遇過嘅感覺。」我好記得我問佢點解要同我交朋友果陣，佢係咁答我。

我突然覺得，我人生中終於有一個人可以陪住我，陪住我喊，陪住我悲傷，陪住我驚……係，我以前就只有呢Ｄ情感。

但遇到佢，我終於可以有人陪住我開心。

我地係學校形影不離，甚至，只要有佢存在，我就一定係旁邊，如果佢果日請假無返學，我都會唔返學陪佢。



而佢都會咁做，就好似……就好似我地一出生就應該係一對咁……

但我知道，佢一直都膽心緊一件事。

就係佢本身係廣洲人，其實佢都唔知可以係呢間學校讀到幾時，姐係話，我地總會有一日會分開。

「如果，分離果日黎到，妳可唔可以唔好喊？」我記得佢問過我，而我只係聽到分離呢兩個字就已經淚如雨下……

「……唔比……唔可以……唔可以分開……」我係喊到抽搐果種，而佢見到我咁，都唔知係笑定係傷心咁望住我，「妳知……我唔知幾時要走。」



當下果一刻，我深深咁抱住佢，因為我真係唔想比佢走，就算係以後都唔想。

但我知道，佢係比我更膽心呢一日嘅黎臨。

好難可以搵到一個同我有共同語言、共同頻道、共同興趣嘅人。

我望住眼前嘅ＶＩＶＩ，我明白我地係朋友，但呢一刻我心入面覺得，我同佢已經衝出左友情，但係……我地都係女仔……

……我可以點？



我屋企係一個好傳統嘅家庭，佢地一定唔會比呢段感情萌芽，佢亦都知道，我更加知道。

但係，呢一刻我望住佢，已經心動，但呢段感情有無可能？