[絕對無糖分]就係咁，我搬左入一幢充滿一樓一嘅唐樓: １１７　從聚

－－－－－回到現實－－－－－

我望住ＶＩＶＩ同小雨，聽完佢地講佢地嘅往事後，我腦一直諗小雨頭先問我嘅問題。

「『性』對你黎講，係咩？」

嗯……其實，呢個問題對我而家係性無能嘅人黎講，我真係唔知點答好。

而小雨都無預我答，佢已經比佢自己嘅答案我：「性對我黎講，只係一種多餘嘅感覺，無錯，性係可以帶比我一種另類嘅滿足，但係，對我黎講係一種多餘。」



我望住佢，雖然佢口講係多餘，但佢講到咬牙切齒咁，就諗佢想講嘅多餘真係多餘咩？我感受到，充滿仇恨更多。

ＶＩＶＩ見到小雨咁，摸一摸佢個頭，然後話：「果Ｄ事已經過去，就唔好再諗。」佢錫一錫小雨個額頭。

然後，到ＶＩＶＩ同我講：「其實，你有無諗過，點解我地咁多野唔做，要做雞賺錢，要用『性』黎做賺錢工具？」

我聽到佢咁講後，點一點頭。

佢先係笑左笑，然後嘆一嘆氣話：「讀得書少囉，我地兩個都唔係讀書嘅材料，所以，想快Ｄ賺到錢，就好似我頭先所講，我地最想去嘅，係一個可以接受我地呢種愛情嘅地方。」



「咁……妳地會移民？」我問。

佢地互望而笑後話：「係。」

我其實搭唔到嘴，因為我呢個年紀，點會諗到移民咁長遠，雖然而家好多香港人想移民。

而我又問：「咁經過果件事後，妳地點？」

然後，佢地笑左笑，今次係ＶＩＶＩ話：「之後又發生左好多事。」



－－－－－ＶＩＶＩ回憶第一人稱－－－－－

經過果一次後，小雨更加敞開心非同我講佢每日作息，雖然令我更膽心佢，但我覺得同佢感情進展左一大步，而我亦都好努力尋求可以落香港嘅方法。

直到，果一日嘅來臨。

我用開心同憤怒嘅心情直接去小雨所住嘅地方，去到門口後，我等待迎接我嘅小雨開門。

等待，係有回報。

小雨開門後，我地對望左幾秒，眼淚就已經不停流左出黎。

「終於……終於……」小雨都未講完，我已經緊緊咁抱住佢，呢一種久違嘅力度，一種久違嘅溫度，久違嘅感覺……呢種係小雨對我嘅愛。

「我好掛住妳。」我話，而我感受到小雨點一點頭。



感動過後，就係冷靜，我抱住小雨深呼吸左一啖後就話：「做埋要做嘅野先。」

我鬆開小雨後拖住佢，然後行入左佢屋企，問佢：「妳阿叔呢？」

「係房。」佢答。

「邊間？」我問。

佢指左指後，我就拖住佢行去佢所指果間房，一打開果間門後，我就見到佢阿叔訓係床上面，佢嚇左一跳後問：「妳係邊個？」

我無答佢問題，只係一拳向佢下體打左落去，「你個仆街！」

佢露出痛苦嘅表情，而我一邊打，一邊不停鬧佢，「就係你成日搞小雨！你都唔撚係人黎！我今日就要帶小雨走！」



打完佢阿叔後，我同身後個小雨講：「走，以後我地兩個一齊。」

小雨望住我遲疑左一下後，點一點頭。