[絕對無糖分]就係咁，我搬左入一幢充滿一樓一嘅唐樓: １１９　幸福

柔情似水嘅一晚，我望住訓係我旁邊嘅小雨，佢安穩咁訓係旁邊，佢雖然訓緊，但臉上露出一個滿足嘅笑容。

而我，就繼續尋晚諗嘅問題，究竟我以後要何去何從？雖然，我同小雨而家已經成年，但我剛剛先拎到單程證黎香港，跟本唔熟悉香港事物，我唔可以只靠小雨一個人養活，我講過要保護佢，我唔想我呢個承諾付諸流水。

我望一望呢間房……我更加唔可以比小雨一直係呢度住，呢度環境咁差，而且尋晚一入黎，見到樓面咁，就知係一個三教九流出入嘅地方。

「我應該先搵份工……」我講左我心入面果句出黎。

然而，小雨係呢刻醒左，佢睡眼望住我問：「妳頭先講咩話？」



我笑左笑後，望住佢話：「無，我諗緊妳個傻豬訓到幾時先醒姐。」

佢伸左個懶腰後攬住左我話：「我好耐無訓得咁好。」

我有憐惜嘅眼神望住佢話：「呢幾年真係辛苦妳。」

佢搖一搖頭，然後問：「係呢，妳想食咩早餐，我落去買比妳食。」

我諗左諗後話：「不如，一齊落去買？」



佢笑得好甜咁點一點頭。

我地落左樓下間茶餐廳，然後叫左少少野食，講真，呢幾年我都未試過好似今日咁開心，因為身邊坐住果個，係自己最深愛嘅人。

但有時，現實還現實……

食完野後，小雨就去左廁所，而我就問呢間茶餐廳老闆：「老闆，你地呢度請唔請人？」

老闆用奇怪嘅目光打量左我一眼後問：「離家出走？」



我尷尬咁笑左下答：「唔係啊。」

佢又再用奇怪目光望住我問：「妳咁後生，點會想打茶餐廳工啊？」

我又係尷尬咁笑一笑後話：「其實我剛剛上面落黎，無野做，所以想搵份工先。」

老闆一副恍然大悟咁話：「原來係咁，但我呢度夠人手，可能妳要去其他地方度搵。」

我聽到後，只好無奈咁點一點頭，但老闆又問：「妳有咩一技之長啊？」

「中醫方面掛。」我答。

「但而家香港做中醫，都要有牌照同有證書，妳有無先？」老闆呢一問，另我個心開始唔安定。

「……無啊。」我答。



「咁就難搵，可能真係要搵其他工……」老闆講完後加多左句：「……妳咩技能都無，落黎做咩呢？」

其實，我覺得老闆呢句無惡意，但係，比剛剛從廁所出黎嘅小雨聽到後，小雨好嬲咁行到老闆面前話：「你講咩撚野啊！」

死……小雨誤會左添。

老闆見到小雨咁激動，都想解釋，但老闆都未開口，小雨就拎左幾張２０蚊紙出黎，一野扔落老闆塊面話：「咩野無技能啊！你未剩係做間茶仔！好撚巴閉啊而家！」

睇黎……勢成水火，我即刻拉住小雨隻手，跑出呢間茶餐廳。

走出左去後，小雨一直係我身後面鬧個老闆，而我無咩點出聲，雖然我覺得小雨咁做有少少唔岩，但我明白，其實小雨係為左我先咁做。

直到，我地返左上去，我講返成件事係點後，小雨就話：「其實，我都可以出去搵工。」



「但係……」我想講，但比小雨講左先：「我唔係要妳唔做野啊，只不過，我係香港住左咁耐，起馬都有Ｄ門路搵野做，到時我地一齊搵錢好唔好？」

我望住小雨，係呢一刻，我知道以後我都要同呢個人共生……但我覺得，好幸福。