[絕對無糖分]就係咁，我搬左入一幢充滿一樓一嘅唐樓: １２５　醉

係床上面，我訓住望住天花板，頭先等到舅父救我地果陣，已經係再過多一個鐘頭，我返出黎後，一直諗緊ＶＩＶＩ同小雨嘅對話，小雨嘅問題一直都係我腦入面徘徊。

而且仲有佢地之間嘅愛情故事，以及，佢地兩個人共同嘅夢想。

我好記得我臨走果陣，ＶＩＶＩ佢同我講，好彩果陣佢入行做雞係跟龍威哥，因為佢係其他同行口中知道，其他帶佢地嘅人都好刻簿，而且，得龍威哥仲會講義氣同人情味。

最緊要係，佢會當Ｄ雞係人，而唔係一件貨。

而果個問題，我究竟當「性」係咩野？



慾望？必須？本身我對呢個問題可以好快答到你地，但小雨一問後，我更深思呢個問題。

就好似而家我處境咁，我性無能已經對性無咩慾望，但我都好想變返有能，咁我算唔算對性有慾望？

咁其實，算唔算性對我黎講係好重要？

我起身後，望住我帶住Ｄ　ＡＶ，開左其中一套睇，腦人面有幻想，但下面無反應。

究竟「性」對我係咩，我呢一刻竟然變成唔識答。



正當我想熄電腦訓教果陣，門口傳出左一把聲：「咁夜都咁好精力？」

我轉頭望一望，係龍威哥，佢拎住左半打啤酒，然後佢問：「陪我飲下酒？」

我……點一點頭。

飲酒果陣，我將ＶＩＶＩ同小雨同我講嘅野話左比龍威哥知，因為我覺得其實佢一直都知道佢地兩個嘅事。

而龍威哥同我估嘅一樣，佢一早知道呢件事，而且佢仲話：「講真，果日ＶＩＶＩ第一日做果陣，我一早覺得佢會頂唔順，但無估到，會有小雨呢個人出黎，而且仲同我講，佢地兩個要一齊做雞。」



「一齊做雞？」我問。

「係啊，佢仲話我知佢地係一對同性戀情侶，果下我都呆一呆，話晒我都係江湖行走左咁耐，都有聽過有同性戀情侶做雞，但出現係自己面前，都係第一次。」龍威哥講完後，飲左啖啤酒，然後繼續講：「但我真係好佩服佢地，雖然前期佢地都為左好多事做出左相對應嘅爭吵，但係佢地一直走到而家，見到佢地就快完成佢地夢想後，我真係好為佢地開心。」

「夢想？」我又問。

「佢地一直都想去一個同性合法婚姻嘅國家，直到台灣宣佈合法後，佢地不知幾開心，佢地以前一直揀果個國家，係一個同佢地語言不通嘅國家，但佢地都無為呢件事而膽心過。」龍威哥講完後，佢望一望我，問：「你信唔信呢個世界係有奇跡？」

我呢一刻望住佢，先搖一搖頭……但之後又點一點頭。

龍威哥笑左笑後答：「我以前都唔信，但當我見到佢地慢慢一步一步成功，就覺得其實世界上係有奇跡，但奇跡係準備比Ｄ已經準備好自己嘅人，以及犧牲自己嘅人。」

我又問：「犧牲？」

「佢地兩個做雞，同其他女人心態好唔同，其他女人最多只會討厭壓住自己身上面個男人，但佢地討厭嘅唔止係呢樣，佢地討厭嘅係自己唔鍾意嘅性別搞緊自己。」龍威哥講完後……我……我好似已經飲左好多有少少醉。



你見我一直都好似個應聲蟲佢講一句，我問一句就知……

我本身都想仲繼續做應聲蟲……但係……真係……有少少……醉……