[絕對無糖分]就係咁，我搬左入一幢充滿一樓一嘅唐樓: １２８　玩唔起

同小春食完門餐後，因為見頭仲有少少痛所以就諗住返上樓訓一陣，好彩今日晏就唔駛返工。

慢慢行上樓，行到小春所講果個七日鮮架步嘅樓層，我停左停，一種好奇感覺突然衝左出黎，唔知賤輝鍾意搵開Ｄ囡囡係咩種類呢？頭先聽小春講，睇落好嫩口、波路都唔錯、個樣清清純純咁……搞到我都想知個囡囡係點樣。

就係因為呢種好奇心驅使下，我行到呢個七日鮮嘅架步門口，門上面好簡別，只係貼左幾個螢光色紙牌，新到步、美少女、全套……然後最醒目果個牌，就係寫住佢個名嘅牌。

「薰衣草……」我口中默念左呢三個字後，手好自然咁按下個門鐘。

「叮咚～」好清脆嘅一下門鐘聲，唔通呢批鐘係新買無走音？



然後，我聽到門後有著高跟鞋嘅聲音，跟住就係腳步聲慢慢靠近，開鎖聲果下，我心入面竟然有少少餘悸嘅感覺。

門一開，我見到一個臉露笑客嘅女人，就同小春所講嘅一樣，呢個女仔清純、有波路、真係好嫩口，而且好熱情……

「先生，好好服務㗎我，快Ｄ入黎啦。」佢一見到我已經拉住左我隻手起勢咁搖，我由望住佢個樣，移到佢心胸……雖然我搬入黎後都見過好多巨乳，但係佢胸前果兩團肉，好似有催眠效果咁吸引我想入去咁……

唔得！我係唔可以對唔住我女神澧琳嘅！但係……但係……

我都未有時間拒絕佢，就已經比佢拉左入房……



可以咁樣拉客㗎咩？我而家心入面不停咁諗，如果比著係其他大媽級咁樣拉Ｄ客人入去，一定投訴都似，但如果係比薰衣草呢一類囡囡拉的話，可能真係唔會拒絕。

我比佢半推半就咁拉左去床邊坐，然後佢就成個人坐左上黎，「靚仔，你平時成日出黎玩㗎？」

嘩～～～我好耐無比人叫做靚仔！但係等等先，而家呢一刻我都要冷靜返Ｄ都清醒返，因為再咁落去，我真係無啦啦幫襯左都唔知。

我真係唔可以對唔住我女神澧琳㗎！

於是我推開左薰衣草，然後走到門口果邊開門，但當我想行出間房門時，我聽到我背後有女人喊嘅聲。



無錯，喊果個人就係薰衣草。

「你唔鍾意我都唔駛咁對我㗎，人地好痛痛㗎。」聽到佢呢把好嗲嘅聲後，我回頭一望……頂！佢呢種眼神！呢種弱質纖纖嘅姿態！真係可以留住唔少男人㗎！

但係……但係……

「對唔住啊！我真係唔可以叫雞㗎！」除左因為澧琳，最緊要係因為我而家仲係無撚用緊……

跑出房門後再跑上樓，好急咁關上道門，腦入面不停回想頭先所發生嘅野，然後，係廳嘅提子哥同龍威哥望住我笑。

「笑、笑咩？」我問。

而提子哥就話：「估唔到你條友定力都幾好ＷＯ，果個七日鮮咁大誘惑你都可以入左佢間房後就出返黎，真係勁。」

龍威哥就話：「我都未見過有人可以比呢條女拉左入房後，可以唔幫襯就出返黎。」



下！？佢地講緊咩啊？

「你地……見到？」我問。

龍威哥就笑住話：「ＣＣＴＶ入面睇到晒啦，我見你比佢拉入去果陣，都心諗你實處子之身不補，但估唔到你對自己貞操守得咁好ＷＯ。」

「咩、咩處子之身啊！」我話，但講完我好似覺得自己重點好似錯左咁，然後又問：「果個女仔成日都咁？你地都知？」

提子哥笑得好賤咁話：「一早知啦，我仲成日幫襯添，佢唔知做人進取，床上都好進取㗎。」然後佢慢慢行到我面前話：「不過你小心Ｄ，呢個女人好有目標性，你呢Ｄ後生仔玩唔起㗎。」

我疑惑地問：「咩……咩玩唔起？」

龍威哥都行左過後話：「呢個薰衣草，係一個會想盡方法都想落黎香港嘅女人。」