簡介
【絕望真相】- 《每個人睇完六樓后座，都應該幻想過出黎做野之後要同朋友租個地方一齊住...》
| 作者 | counter walk |
|---|---|
| 類型 | 散文 |
| 狀態 | 已完結 |
| 更新日期 | 21-03-2018 14:26 |
| 文章字數 | 2158 |
| 點擊次數 | 220 |
因為，睇過一次，你己經感受到果一份日對夜對既開心，有幾咁瘋狂，幾咁放肆。
可以日日一齊傾計、玩、飲酒，然後飲完就瞓，工作、愛情、開心唔開心都分享，一齊喊一齊笑，嗌交都要一齊大聲叫，好似永遠唔會長大。
呢個亦都係主角，或者我地希望做到既事，逃避。
逃避責任、成長、失敗。
相信唔止我，好很好很多人都曾經諗過、講過、約定過讀完書要出黎一齊住，不過記得當年睇完，都覺得這一抽事離自己還是很遠，應該不用那麼快要為生活而苦惱，一齊住都唔洗咁快諗啦。
奈何，時間原來快過小明，問題終於來臨。而當日我地想要逃避或者煩惱的事情 — 家庭、金錢、工作、男女朋友，竟然成為將我地呢班老友分隔開既鴻溝。我幻想唔到
依家唔好話一齊住，果班人己經見都好耐無見過。
無論係ICQ、MSN、Xanga定過渡到Facebook、IG，我地都喜歡加一個BFF的稱號，但現在通常見得最多卻是「估唔到咁耐無見，我地仲可以好似以前咁….」
真正想不到的不是仍然能夠肆無忌憚地吹水，而是曾經日見夜見的知己，竟然要咁耐先相聚到幾小時。
呢件事，我以前幻想唔到。
戲入面，主角們都好似唔洗點做野都夠錢洗，(講真，我淨係見過森美扮公仔搵錢)但我地呢？返少一兩日工人都震埋。
以前生日，真係要好似林嘉欣咁搞過大生日會，個個friend都到齊，自己決定去唔去係睇果日邊個生日；到今日，朋友去唔去一個生日party，係睇邊個會去，邊個生日？no one cares。呢件事，我以前都幻想唔到。
明明試過一齊瘋狂進行劇烈健康活動，打波踢波踩單車去沙灘行山，又好奢侈又好辛苦咁儲錢睇concert去旅行，然後一齊窮住咁食譚仔捱麥記食印尼撈，再好MK地去唱K食放題行街，糜爛地打機鋤dee打牌飲酒打邊爐，加上熱血地冬天去露營、晨咁早睇日出...
但無論當年是同班、甚麼學會，迎新後認識然後friend到畢業，曾經project到三晚通宵，在exchange一齊歐遊個幾月瞓埋同一間房，捱足三餐杯面，
只要一出必殺 —「出來工作後」，就dum一聲很多東西也消失了。
大家也各有失縱的理由，由一次唔得因為要OT，兩次唔得要拍拖，三次唔得又病左，到最後已經再無力氣或者唔好意思再約。
慢慢由遲到變甩底，然後whatsapp都遲覆到唔覆。
初初還很固執，試圖掙扎，希望維繫那段值得珍惜的關係
但身為八、九十後，怎能很嘔心地說，「好耐無見啦，好掛住你呀，咁耐無吹水，見下啦好麻」
唯有寸下佢話下佢，逼他出山洞和深海，終於看到他的回覆，但往往忙的人又有時真的太忙，感覺得不到你體諒，輕則發脾氣，重則quit埋 group，大吵一獲。
然後不知是誰先放棄，總之沒有人願意再做傻仔先send出「搞緊乜」，呢段關係亦可以certified。
連生日快樂、聖誕快樂、中秋快樂、新年快樂也賴得send，history是數年前的一句XX快樂，或是換了電話，空空如也。最後，再在Facebook看到他的updates，只能輕輕一like，看見他的status說掉了電話失了contact，自己連應不應該給回電話也要考慮。在街撞到，也是靦腆的「喂，去邊呀，哦！好啦！bye！」
如果偶爾終於約到，可以喺caption打句「七年啦！！！」，幾可肯定，最近呢兩三年，都唔夠頭幾個月見得多。
香港明明好細，千幾平方公里，但人既關係，猶如星際啟示錄入面啲星球咁遠。
當年聽著Eason的最佳損友，聽到「非甚麼大仇，為何舊知已，在最後變不到老友」沒有甚麼感動，現在再聽，卻終於發現原來是認真一問。
初出茅廬既小朋友，還未有如此深刻體會，
但工作了一兩年，或者甚至廿到尾，就會切切實實體會到呢份轉變，以前攬頭攬頸的蛋散，也會無原無故地和你真的散了。
人在生命的旅途上不斷向前，除了感情，原來放低得最多既，係友情。
記得片中主線是主角要在一年做一件困難而未做過的事，做唔到要食屎。
當年睇都心諗，「超，一年呀！月球都上到啦！」
但依家真係出黎做野之後，發現一年原來快過小明，唔好話要做乜，自己做過乜都唔記得。
OO下T，在夜闌人寂的office，睇下日歷，loop下Facebook既相，先發現唔經唔覺，原來大家已經咁耐無見。
偶爾聽到娘親話「我都無乜朋友既」，很難想像以前沒有Whatsapp、Facebook是如何維繫友誼。不過就算我地今日科技發達，先發現原來都敵唔過成長。
由細到大，她也說「近朱者赤，近墨者黑」，要小心選擇朋友，但工作後才明白，其實不用選擇，也沒有太多朋友可以讓你挽留。
片終時，鄭丹瑞把聲好磁性咁講，「青春就好似方糖，係荒唐」；
今日廿到尾先發覺，友情，都好似方糖，好甜，但亦都好易碎。
P.S. 全盛時期既林嘉欣真係不得了...