簡介
【睇戲睇全套】-《張志明究竟做錯乜》
| 作者 | counter walk |
|---|---|
| 類型 | 散文 |
| 狀態 | 已完結 |
| 更新日期 | 21-03-2018 14:39 |
| 文章字數 | 2410 |
| 點擊次數 | 595 |
7年，志明春嬌去到第三集，好似Fast and Furious咁，你明知佢都係「被追殺、飛車、爆炸、最後BBQ (literally佢地真係好鐘意隊住啤BBQ)」，你都一定會繼續追。上個月沉沒喺工作之中，呢排終於得閒睇返，但睇完腦海帶住無盡既問號咁離開。
本身劇情同之前一樣都係「好似幾開心，但係有磨擦，跟手發現好多問題，想分開，真係分開，發現無左大家唔得，都係一齊返」，不過，細細個家燕姐已經教落，跑步游水咪又係你做乜佢做乜，有乜好投訴呀？
但離開戲院果一段路，不禁問，「究竟今集張志明做錯啲乜，點解又係佢氹返余春嬌？」
第一集張志明對段關係唔清唔楚，拖泥帶水，最後要做啲野表個態我明；
第二集貪新忘舊，走去溝楊冪，要補鑊拍哂MV追返春嬌，我都明；
但今集究竟佢有咩問題？
首先，啲八婆姊妹話佢無承擔，喺法庭出面避喺春嬌後面，唔係男人。雖然好似有啲樣衰，但今時今日對一個男人黎講，同做太監無分別，為左份工，連丁都可以唔要。如果懶懶閒然後俾人炒左，志明又會變成不求上進既廢青。
然後春嬌嫌佢喺車入面傾結婚求求其其，毫不認真。但依家廿幾歲，身邊朋友只要聽到啲情侶話無乜傾過結婚，就覺得個問題嚴重過收五千萬，咁明仔搵個機會傾幾句，又何來不認真既表現？連生B呢啲終極問題都探討埋，仲勇敢過特首參加答問大會。
或者真正大獲既，係春嬌老豆對佢既影響，令佢好怕枕邊人同樣將問題、責任推喺自己身上，有咩事都諗自己先，然後一走了之。
而志明又確實試過幾鑊，例如跟住去溝狗女，就話跟住唔岩；
契媽好似Mall姐咁叫佢捐精，又化身忠仔不斷交波俾人；
遇到地震，又確實離開左春嬌..幾步，沒有做到危難之際仍寸步不離；
奈何明明係朋友放緊狗然後唔見左，仲可以點？
地震搵張枱黎救佢，其實同孫悟空腳踏七色彩雲既道理如出一轍；
捐精單野係難搞啲，但佢最後都主動拒絕，向毒品捐精說不，算係咁啦。
一句到尾，問題係有，但絕非致命，而優點呢，真係數唔哂。
講專一，喺楊冪事件之後，張志明對余春嬌明顯一心一意 —
落桑拿無揼骨，落蘭桂芳淨飲水，去海旁無主動聊女；
契媽樣靚(見仁見智)身材正(一定係)仍然不動凡心；
去到水塘四野無人，都真係等睇UFO啲咁無稽既活動而唔搞野，試問一對男女睇DVD有幾何都睇得哂成套戲？
講包容，有時鐘意你但未必可以愛埋你家人，今集張志明都刻服埋。
陪春嬌老豆揼邪骨落club，幫佢搵免費攝影，喺今日呢個時勢，你叫designer、photographer改多過兩次都攞你上FB公審，要佢唔收錢影相等同公關災難；
然後教春嬌老母用電話玩Facebook呢啲九大基建都耐性地完成，
以上任何一個情節，就算張志明發L哂老脾，全中國都無人話佢錯，但佢無。
最後，一個大男孩願意為你改變，當日廁所玩乾冰，今日同你一齊儲錢買樓，會諗結婚生仔，連春嬌老母都話佢願意為人著想，肯改變，（究竟佢點知，又係二妹？），而事實上佢除左拯救地球同學識如來神掌之外，已經無懈可撀，仲點挑剔？
套戲叫《春嬌救志明》，係想講余春嬌令張志明長大、成熟，似返個男人，有安全感有責任心。
誠然，同第一二集比，他的改變實在太名顯。如果返番第一集，根本完全無問題。
但愛一個人耐左，除左自己愈黎愈似佢，原來都會想佢愈黎愈似心目中的幻想。
當年第一集，明明正因為春嬌與陸詩韻不同，願意接受這個大男孩才造就這段感情，到今天自己又渴求他的改變。但我們往往忽略了，其實成長是必然，或者有時慢啲，但最後總會到終點，保持初心，才是最難。
喺酒店春嬌發完爛渣之後，張志明好大力咁呼左一口氣，然後嘆了一句：「又係我呀..」，相信世間上所有雄性生物都會為之動容。
女人既脾氣，同地震一樣，難以預測，更惶論預防，你未知自己錯乜既時候，已經身陷絕境；
然而地震災後都有國際救援，同女人罵完交，你可以解釋，但無得解決。
不過雖然講到春嬌好衰，但細心留意其實佢都有欣賞志明既改變，
在警局外避鏡頭，她認為是他重視工作的表現；看到他拒絕契媽，也欣賞他的男子氣慨，
所以只要消滅果班八婆姊妹，地球就會完美。
這個系列吸引之處，就是因為一直都有共鳴、易投入，但今集經常抽離，會反問「志明做錯乜，點解又係佢卑躬屈膝？」
但或許，這個就是今集的重點，亦是讓人投入之處，愛一個人就好似普堤老祖咁講，要理由咩？
面對著一個蠻不講理、心煩多疑的中女，張志明仍然始終如一，除年歲增長，更明白要好好珍惜一段失而復得既感情，更明白自己需要甚麼，繼續鍾意余春嬌。
其實究竟佢有咩似春嬌老豆呢？無人知，但愛佢，就愛埋佢既陰影。
電影中志明一再講出唔可以無左余春嬌，其實15年前，已經有首歌教曉我地呢個道理
「我問左好多朋友，我問佢地，我究竟應唔應該離開你，佢地問返我一個問題，我究竟需唔需要你。」
15年後，再一次提醒。
不可改變你那壞習慣，小朋友、發脾氣、逃避、膽小怕事，就只有為了你變得更強大。余春嬌或者真的打救了張志明，但到頭來，係張志明拯救返余春嬌。
每次有朋友分手，聽到理由係唔夾，其實大家都深知心知，其實係唔愛。