簡介
【生活點滴】-《依家去唱K，心情有啲複雜》
| 作者 | counter walk |
|---|---|
| 類型 | 散文 |
| 狀態 | 已完結 |
| 更新日期 | 21-03-2018 14:42 |
| 文章字數 | 2512 |
| 點擊次數 | 219 |
去到某個年紀，你會慢慢發現，自己已經大個，雖然你好唔想承認，但做好多野既時候，都會無可奈何地實實在在感受到，不能抗拒成長、成熟、然後變老既無力感，其中一樣很肯定係唱K。
記得讀書果陣，一個月真係起碼唱一次，有時咁好彩有長假，幾班friend一齊約，可以連續唱3、4日都照去；又或者咁唔好彩有幾個friend一齊表白失敗、同條仔罵交，或者失戀，亦都可以連續唱幾獲。
以通K亦都係青春既代表，講緊既係真真正正唱到天光，個人黎講最癲果次應該係第朝有present，但前一晚仲唱，通完直接去，腳步浮浮，雙眼呆滯，完左衝返去瞓教...
但以家唔好話一個月一次，分分鐘一年先唱到一次。
首先第朝要返工已經不在考慮之列，你炸碎個whatsapp都無人會理你；而即使第日放假，你想青春返晚約個通K，通常都只會有呢幾個回覆：
「果日i can't」
「咁chur！」
「第朝有野做呀」
「」即係無回覆，亦都係最多既情況，甚至來回地獄又折返人間，竟然約到但去到果晚先
「仲OT緊呀......」、「OT完好攰我唔黎啦」或者鬼馬既病毒搞到佢「got sick呀TT」，你會安慰自己，依家啲菌真係勁左好多，次次都有咁多人病，
所以縱然好想試，但諗起最後可能自己喺間K房一條友無人之境咁等，真係諗起都怯。
通K唔得，咁晏畫去個K lunch或者happy hour得啦呱？先唔好計果啲要返5日半/6日，然後星期日要family day或者couple day既悽慘朋友，正常人一至五做到崩潰，星期六日無返一兩點都難以起身，要撥一個彌足珍貴既下午去唱K，其實唔易。
加上日日坐office，明明以前唔覺，但現在會多了一班提倡健康、熱愛運動、擁抱大自然的好朋友，建議唔好留喺密閉空間，多啲出去行山。
皆因以上種種，慢慢我已經忘記左果浸K房獨有既消毒味。
不過咁岩撞正公司有大事慶祝，東主有喜皇恩浩蕩放假一天，竟然同左幾個同事去唱K。
一入到去喺走廊見到一班MK少女，背心熱褲，好可愛好青春，果啲那些年既回憶已經不能自制咁湧上黎。
當年一齊唱K既女仔，也是如此青春，如此MK。好多時仲喺樓下等緊，就已經會表現得異常興奮，瘋狂大叫，熱烈討論一陣要唱咩歌，邊個扮邊個諸如此類；
而啲男仔亦會暗地裏好興奮，因為可以同班少女共處幾十尺既密閉空間；
到依家眼前得返啲中女同事(脷伸其實都開心既)著哂長衫長褲，係咁話個冷氣凍，唔知點解硬係有啲唏噓，無變既係佢地仍然會高八度咁大叫要唱容祖兒。
無錯，以前係好興話要搞「乜乜日」，淨係唱邊個歌手既歌，依家唔係唔會，只係有啲難度，因為唱多兩首已經好攰，唱完「浮誇」，真係要好浮誇咁坐喺度休息，唔輪休唔得。
回望自己細個已經好聰明，洞悉資本主義既香港度度凍飲都加2蚊，得唱K係一樣價錢，凍飲仲要大杯啲，所以到今時今日我都會恥笑叫熱飲既人，而果陣(其實以家都係)最愛凍檸蜜。
食野基本上就好似話要改變香港咁，不切實際 — 明明都係果粒魚蛋，果串串燒，但就會比出面貴一倍，所以細細個已經同朋友反大財團、反霸權，同入戲院一樣，喺外面買完野食再運入去，如果唔夠真係叫多個餐，分分鐘下星期既飯錢都叫埋走，適逢有人生日佢送蛋糕同無酒精香檳，仲有英皇群星同我唱生日歌，真係開心到人人彈起；
今日再睇個menu，雖然都知佢搵笨，但已經絕對俾得起有餘，只係好似無以前咁開心咁興奮。
細個未夠秤飲酒，見到啲酒幾百幾百咁，真係心諗傻的嗎，有錢都唔喺度飲啦，
到今日骰盅猜枚互隊仲多過唱K，個行為轉變，真真正正既睇唔透。
以前仲會好緊張，驚唱得唔好俾人笑，到大個發現其實好多人唱歌都好難聽，但唔緊要，因為大家都只希望可以放低工作，忘記生活既煩瑣，全情投入喺一樣野，就好似咁多人鐘意揸車，或者星期日都7點起身跑步，應該都係咁上下。
我地成日話香港呢十幾年變左好多，其實連我地自己都變左好多，唔係話賴，但當個環境變得咁劇烈，要keep住同一個心態談何容易？
唯獨唱既歌黎黎去去都仍然係果幾首，只是當年的流行曲已經變成今天的舊歌。細個見阿爸阿媽聽歌，成日都係梅姐、哥哥，自己淨係識幾首經典名曲，到眨下眼，已經到依家啲靚仔靚妹唔識我地時代既歌。
那時候無論暗戀失戀、哂命冧女、畢業在即、好友分離、好耐無見、考得唔好，都總有一堆歌可以唱出心聲，果啲「八九十後你一定聽過的情歌」、「九十後陪你走過各過愛戀階段」plug埋真係有十個鐘，唱極都仲有。
好彩果陣唔知點解成日都可以唱到超時，講緊係超一個鐘喎！對於貧苦學生簡直係窮人恩物，會經常討論邊間可以超時耐啲，臨尾再狂loop勁歌金曲厄鐘，到今日一夠鐘即刻落閘放狗，個個巨星趕住提我執齊野，下次點佢既新歌，但真係好抱歉，我真係唔係太識你地啲歌，定香港已經少左好多巨星？
不過唔緊要，因為好多時未夠鐘你已經會聽到「約左人呀」或者「第朝要返工呀」，
那時通K的衝動，已經變成一點幾「好眼瞓呀我走先啦」。
年少時沒有太多朋友，娛樂亦確實較少，但亦無咁多煩惱，做人輕鬆好多；
到今日不斷交朋結友，活動多多，買唔到樓做唔到中產，都起碼買得起starbucks扮中產，
但係咪開心左？
「我不知道，冚家...」
我只知道，當我好似呀爸呀媽一樣，開始講「以前邊有依家咁多野玩丫...」，我就真的長大了。
時光可變，世界可變，連當年一齊唱K既果班蛋散，都變了。
「老友們，幾時唱返晚通K？」