人渣誠自傳（完整版）: 九
所謂「唔見棺材，唔流眼淚」。唔去到最後一刻，人都係唔知死。
人，就係咁犯賤。
唔去到Heidi話要分手既一刻，我都唔知自己原來有幾重視佢。
「點解啊?」我馬上回應。
「其實我都諗左好耐架喇，我發現我地真係唔夾。」
「你唔愛我喇?」我問。
「冇以前咁愛喇...」
「我改丫，我知衰架喇，你唔好唔要我啦，好冇?」我死纏爛打。
「你唔好咁啦...」
求下你，比多次機會我。
但係，邊有咁多機會。錯過左，就係錯過左。
「我等你丫。」
「唔洗喇，我唔會再同你一齊喇。」睇黎，佢真係心淡喇。
「真係冇彎轉?」
「嗯。」
之後，無論我用盡一切既辦法去挽留Heidi，不過都唔成功。後來佢話想我死心，就block哂我whatspp同ig。
女人絕情既時候，真係可以好盡。
每晚，我都會諗起同佢既回憶。攞起手機，打開我地既對話，回想起佢既笑容，淚水就不自覺咁流出。
我真係好掛住佢。
點解當初我咁on勁，介意佢既過去?
點解我成日話佢，唔好好對佢?
點解，點解我唔識得珍惜佢...?
「你始終都係行左我條舊路...」阿偉黯然地說。
一晚，我約左阿偉係公園談心。
「咩舊路?」
「想當年，我同你都差唔多...」阿偉續道。
當晚，阿偉同我講左佢既往事。
佢一直念念不忘既女仔─阿盈。
識左阿偉咁耐，佢好少係我面前提佢自己既事。好多關於佢既野，都係由外人話我知。
唯一一次，佢自己行過黎同我講，
「喂，我有女喇。」
當時既我地啱啱識。
「唔向左走向右走係掛!?」當時既佢係毒向左走向右走黎，一個靚仔既毒向左走向右走。
對方係隔離班一個叫阿盈既女仔，公認既靚女黎。而阿偉又係公認既靚仔，佢地兩個一齊，可謂郎才女貌。
雖然當時我識佢唔係好耐，不過我真係代佢開心。
係學校既時候，見到阿偉既身影，自然就會揾到阿盈。我諗，就好似我同Heidi之前一樣。
身邊有唔少既朋友都睇好佢地兩個，覺得佢地兩個會長久。
但係，事實就總是殘酷的。
佢同阿盈散左，佢一直以黎都冇提起，我亦冇特別去問。
「其實當初，我同你都差唔多，成日因小事嘈交..」阿偉開始講。
「你知我份人架啦，一嘈起上黎就唔收口，一定要講贏佢架啦。」
的而且確，阿偉平時份人一係就唔講，一講就一定要窒到你冇野講。
後來佢地散左之後，阿盈就去左英國讀書，離開左香港。
阿盈去左外國之後，同佢一場相識既我都有同佢講過幾次野，我亦試過幫阿偉講下好說話。
「我地都好耐冇聯絡喇，不過仲係朋友黎既，希望佢DSE可以加油啦。」阿盈講既。
阿盈過左英國之後，阿偉都有試過識女仔既...但即使佢唔講我都知，佢仲好掛住阿盈。識
女，只係黎掩飾佢內心既寂寞。
「講起上黎，都已經三百三十三日喇...」阿偉望住夜空。
可能你會覺得，男人老狗特登去記分左手幾耐好婆媽。但係我眼中，佢好浪漫，好長情。
我搭住佢膊頭，心中只得一句說話。
I know that feel bro
然後我 然後我 恨不得當初 懂得愛惜你
同阿偉傾完之後，咪又係頹到成隻狗咁，我同Heidi都係冇好轉。
然後有一日，我發高燒，冇返到學。我Heidi會出現照顧我，好想佢會係我身邊，不過佢唔會。
出現係我身邊既人，唔係Heidi，係張彥琪。
我聽到門鐘聲，打開大門，就見到着住校服既佢，應該啱啱放學。
「點解你會係度既?」我問。
「知你病，咪黎睇下你囉。你食左野未啊?」
「未啊。」
病到Hi Hi既我，訓左成朝，乜都未食過。
「都估到你架喇，我買左粥上黎啊。」佢提起手上既白色袋。
咁好死，唔係鍾意我掛?
我打開鐵閘，比佢入黎。佢除左對皮鞋，慢慢行入黎。我接過佢手上既粥，打開就諗住食。
「嘩!好熱!」
「成個細路仔咁。」佢拍一拍我個頭。
張彥琪搶去我手上既匙羹，幫我吹凍羹上既粥。個一刻既佢，真係好靚。
「啊~」冇錯，佢餵我食。
「唔洗啦..我自己得啦。」唔多唔少，點都會有啲尷尬。
「怕咩醜啊，識左咁左年。黎，啊~」佢再次示意。
我亦乖乖就範，免得佢又煩。不過講真，有個靚女餵你食野，都幾爽。
短短既時間入面，基本上，我完全忘記左Heidi。眼中只有係我面前既張彥琪。
可能，我冇想像中咁愛Heidi。
食完粥之後，張彥琪係佢書包入面攞左盒必理痛出黎，叫我食左佢。
「李志誠，食左佢。」明明佢以前唔係咁叫我...
我好乖咁聽左佢話，食左兩粒藥，飲左啖水。
「搞掂喇。」我講。
「好，咁係時候要訓教教豬。」依個笑容，好懷念。都唔知幾多年冇見過。
我諗十幾歲人仲講教教豬既，應該得佢一個。
佢拖住我隻手，強逼我返房訓教。
佢坐係床邊，而我就訓係佢大脾上面。佢一邊掃我個頭，一邊觀察我間房。
「我都好耐冇黎呢度喇。」張彥琪說。
「嗯...」
當初入佢間房既時候，我都好感觸。種感覺好陌生，又好似曾相識咁，好怪。
「對唔住啊...」佢話。
「點解咁講呢?」我問。
「係我同阿龍講你問佢既野...」
其實，我一早估到。
「唔緊要啦...」我冇嬲佢。
「我有咩可以補償你啊?」睇得AV多既我知道，依個係一個性邀請。
我坐返起身，望住佢，慢慢靠近佢，錫左落去。佢冇回避，反而錫返我轉頭。
「咁就夠喇。」
「好...」
我糟蹋左，我既初戀。